Января Навечерие Богоявления. Сщмч. Феопемпта и мч. Феоны волхва. Прп. Синклитикии Александрийской.
Стихиры на «Господи воззвах», глас 4:
Фео́ну и Феопе́мпта му́дрыя воспои́м: / Христо́вым бо догма́том повину́ющеся, / служе́ние вся́ко нечести́вое све́тло упраздни́вше, / свя́те, и че́стне, и благонаде́жна послужи́ша, / Еди́наго Бо́га и Го́спода пред лице́м мучи́телей благодерзнове́нно испове́дающе, / и венча́еми свы́ше.
Слава, и ныне, глас 6:
Гото́вися, Иорда́не реко́: / се бо прихо́дит Христо́с Бог крести́тися от Иоа́нна, / да змие́в неви́димыя главы́ сокруши́т Божество́м в вода́х твои́х. / Ра́дуйся, пусты́не Иорда́нская, / го́ры, игра́йте с весе́лием: / прихо́дит бо Ве́чный Живо́т воззва́ти Ада́ма. / Глас вопию́щаго, возопи́й, о Иоа́нне Предте́че: / угото́вайте пути́ Госпо́дни / и стези́ Его́ пра́вы соде́лайте.
На стихо́вне стихи́ры, глас 6:
Земля́ и назе́мная, игра́йте и ра́дуйтеся: / Пото́к сла́дости в реце́ креща́ется, / излия́ние изсуша́я зло́бы, / и источа́ет Боже́ственное оставле́ние.
Стих: Сего́ ра́ди помяну́х Тя/ от земли́ Иорда́нски и Ермонии́мски.
Све́та сый пода́тель Иису́с,/ не тре́буя крести́тися,/ пло́тию восхо́дит на Иорда́нскии струи́,/ просвети́ти су́щия во тьме хотя́./ Ве́рою Сего́ усе́рдно сря́щем.
Стих: Ви́деша Тя во́ды, Бо́же,/ ви́деша Тя во́ды и у́боя́шася.
Поне́с раба́ зрак,/ предгряде́ши крести́тися, Христе́, от раба́/ во Иорда́нских струя́х,/ избавля́я от рабо́ты ветхаго греха́,/ и освяща́я, и просвеща́я нас.
Сла́ва, и ны́не, глас 6:
Да возра́дуется пусты́ня Иорда́нова, / и да процвете́т, я́ко крин, / глас бо вопию́щаго услы́шан бысть в ней: / уготова́йте путь Госпо́день. / Го́ры бо поста́вивый ста́вилом, и удо́лия ме́рилом, / вся исполня́яй, я́ко Бог, креща́ется от раба́, / обнищева́ти нача́т, бога́тныя да́ры да́руяй. / Услы́ша Е́ва: в печа́лех роди́ши ча́да. / Ны́не же услы́ша Де́ва: ра́дуйся, Обра́дованная, Госпо́дь с Тобо́ю, / име́яй ве́лию ми́лость.
Тропарь предпразднства, глас 4:
Возвраща́шеся иногда́ Иорда́н река́ ми́лотию Елиссе́евою, / возне́сшуся Илии́, / и разделя́хуся во́ды сю́ду и сю́ду / и бысть ему́ сух путь, и́же мо́крый, / во о́браз вои́стинну Креще́ния, / и́мже мы теку́щее жития́ прехо́дим ше́ствие: / Христо́с яви́ся во Иорда́не освяти́ти во́ды.
Кано́н предпра́зднства Богоявления, (18/ 5 января), глас 1.
1 Го́рькия рабо́ты избавлься, Изра́иль / непроходи́мое про́йде, я́ко су́шу, / врага́ зря потопля́ема, / песнь я́ко Благоде́телю пое́т Бо́гу, / чудоде́ющему мы́шцею высо́кою, // я́ко прославися.
3 Не му́дростию и бога́тством да хва́лится сме́ртный свои́м, / но ве́рою Госпо́днею, / правосла́вно взыва́я Христу́ Бо́гу / и поя́ при́сно: // на ка́мени Твои́х за́поведей утверди́ мя, Влады́ко.
4 Слы́ша дре́вле Авваку́м, Христе́, чу́дный Твой слух / и стра́хом взыва́ше: / от ю́га Бог прии́дет и Святы́й от горы́ приосене́нныя ча́щи / спасти́ пома́занныя. // Сла́ва си́ле Твое́й, Го́споди.
5 Свет Твой незаходи́мый возсия́й, Христе́, / в сердца́ ве́рно пою́щих Тя, / мир подава́яй нам па́че ума́. / Тем от но́щи неве́дения ко дню све́том Твои́м теку́ще, // славосло́вим Тя, Человеколю́бче.
6 Весь от страсте́й безме́рных содержу́ся / и кито́м зол снизпадо́х, / но возведи́ из истле́ния мя, Бо́же, / я́коже пре́жде Ио́ну, / и ве́рою безстра́стие ми да́руй, / я́ко да во гла́се хвале́ния и спасе́ния ду́хом пожру́ Ти.
7 Проидо́ша, я́ко черто́г, пе́щный пла́мень нестерпи́мый / и́же за благоче́стие иногда́ о́троцы святи́и, показа́вшеся я́ве, / и, согла́сно воспева́юще, песнь поя́ху: / отце́в Бо́же, благослове́н еси́.
8 Чу́да преесте́ственнаго пока́за о́браз огнеро́сная пещь дре́вле: / огнь бо не опали́ ю́ныя де́ти, / Христо́во явля́я безсе́менное от Де́вы Бо́жественное Рождество́. / Тем, воспева́юще, воспои́м: / да благослови́т тварь вся Го́спода и превозно́сит во вся ве́ки.
9 Неизглаго́ланное Де́вы та́инство: / Не́бо бо Сия́, и Престо́л Херуви́мский, / и светоно́сный Черто́г показа́ся / Христа́ Бо́га Вседержи́теля, / Сию́ благоче́стно я́ко Богоро́дицу велича́ем.
Катавасия по 3,6,8,9 песни канона преподобной Синклитикии (18 / 5 января), глас 2:
3 Утверди́ нас в Тебе́, Го́споди, / Дре́вом умерщвле́й грех, / и страх Твой всади́ // в сердца́ нас, пою́щих Тя.
6 В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.
Хвалим, благословим, покланяемся Господеви, поюще и превозносяще во вся веки.
8 В пещь о́гненную ко о́троком евре́йским снизше́дшаго / и пла́мень в ро́су прело́жшаго Бо́га, / по́йте, дела́, я́ко Го́спода, // и превозноси́те во вся ве́ки.
9 Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся / омраче́нная просвети́ти, собра́ти расточе́нная. // Тем Всепе́тую Богоро́дицу велича́ем.
На хвали́тех стихи́ры на 4, глас 6.
Что не домышля́ешися, Крести́телю, смотре́ния,/ е́же соверша́ю за всех спасе́ние?/ Дре́вняя оста́ви ны́не, и помышля́й поле́зная./ Ве́руй Бо́гу соше́дшему/ и, приступи́в, Мне послужи́:/ Бог бо приидо́х за благоутро́бие/ Ада́ма очи́стити от паде́ния.
Сла́ва, глас 6:
С тре́петом служа́ Иоа́нн Влады́це,/ ра́дуется душе́ю и вопие́т с весе́лием:/ сра́дуйтеся мне, вси ро́ди пра́отца,/ прии́де бо ча́яние на́ше,/ при́иде на Иорда́н Христо́с,/ вся от греха́ Ада́мова очи́стити, я́ко Благоутро́бен.
И ны́не, глас 6:
Воспои́м, лю́дие, Рожде́нному от Де́вы/ и в реце́ кре́щшемуся Иорда́не,/ и к Нему́ возопии́м:/ Царю́ вся́кия тва́ри,/ да́руй нам неосужде́нно/ чи́стою со́вестию ве́рно дости́гнути/ Твое́ свято́е из ме́ртвых тридне́вное воста́ние.
На стихо́вне стихи́ры, глас 2.
Се Царь, / се ча́яние / Изра́илево прии́де. / Лю́дие, ра́дуйтеся, / Свет бо явля́ется.
Стих: Сего́ ра́ди помяну́х Тя/ от земли́ Иорда́нски и Ермонии́мски.
Узре́ся су́щим/ на земли́ с пло́тию,/ Боже́ственный ны́не Свет/ су́щим во тьме яви́ся,/ и всем благода́ть возсия.
Стих: Ви́деша Тя во́ды, Бо́же,/ ви́деша Тя во́ды и убояшася.
Свети́льниче Све́ту,/ заре́ Со́лнцу,/ предтече́ Сло́ву,/ дру́же Жениху́,/ проро́че, послужи́.
Сла́ва, и ны́не, глас 8:
Иоа́нне Крести́телю, / во утро́бе позна́вый Мя, А́гнца, / на реце́ Ми послужи́, / со А́нгелы Ми слу́жбу принеси́: / просте́р, косни́ся руко́ю твое́ю верху́ Моему́ пречи́стому / и, егда́ у́зриши го́ры трепе́щущия / и Иорда́н возвраща́ются, с си́ми возопи́й: / воплоти́выйся от Де́вы в на́ше спа́сение, // Го́споди, сла́ва Тебе́.