Песнь 1.
Кано́н пра́здника вторы́й, со ирмосо́м на 6.
Ирмо́с: Ше́ствует морску́ю волня́щуюся бу́рю,/ су́шу а́бие Изра́иль я́вльшуюся./ Че́рмный же понт триста́ты еги́петския/ покры ку́пно, водостла́нен гроб,/ си́лою кре́пкою десни́цы Влады́чни.
У́тру я́вльшуся челове́ком светоно́сну/ ны́не из пусты́ни, к вода́м Иорда́нским преклони́л еси́, Царю́ со́лнца, Твою́ вы́ю,/ ли́ка мра́чна родонача́льника исхи́тити,/ скве́рны же вся́кия очи́стити тварь.
Безнача́льне, струя́м спогре́бшася Тебе́, Сло́ве,/ но́ваго прево́диши, истле́вшаго ле́стию,/ Сего́ несказа́нно от Отца́ прие́м глас держа́вен:/ Сей возлю́бленный, ра́вен же Мне О́трок естество́м.
Кано́н му́чеников, глас 8.
Ирмо́с: Пои́м Го́сподеви вси лю́дие,/ в мо́ри Чермне́м фарао́на погрузи́вшему,/ побе́дную песнь пою́ще, я́ко просла́вися.
Честны́я я́коже зве́зды Богосия́нныя,/ тве́рди му́дрии Це́ркве яви́стеся,/ озаря́юще ны Боже́ственными светлостьми́, му́ченицы.
Яви́стеся я́коже у́глие мы́сленное, возжже́ни огне́м Ду́ха, сла́внии,/ и и́дольское огни́ще струя́ми крове́й угаси́сте.
Вода́ми потопля́еми Христа́ ра́ди, в вода́х на́ше нече́стие погрузи́вшаго,/ безбо́жия ре́ки, му́ченицы, изсуши́сте.
Богоро́дичен: Уста́ви моя́ грехо́вныя пото́ки,/ я́же сме́ртную тлю́ Рождество́м Твои́м увяди́вши,/ и умиле́ние ми да́ждь, Богороди́тельнице Всенепоро́чная.
Ин кано́н преподо́бных, глас 4.
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма,/ Амали́кову си́лу в пусты́ни победи́л есть.
Воздержа́нием светови́дни бы́вше, блаже́ннейшии,/ богови́дни яви́стеся я́ве истоще́нием кро́ве./ Те́мже сра́дуетеся по́стником Христо́вым и му́чеником.
Мо́рем слез пе́рвее удави́сте фарао́на, му́дрии, мы́сленнаго,/ кро́вными по́слежде тече́ньми погуби́сте,/ и безве́стию препосла́сте.
Просвеща́я Светода́вец Госпо́дь ва́ше поще́ние терпе́нием, уго́дницы Христо́вы,/ светоза́рно соде́ла и я́вственно страда́ние,/ па́че зари́ со́лнечныя сия́ющее.
Богоро́дичен: Сый по естеству́ Госпо́дь, всем невмести́м,/ в Тебе́ вмеща́ется, Влады́чице, Челове́к благоутро́бием быв,/ да челове́ки за неизрече́нное человеколю́бие спасе́т.
Песнь 3.
Кано́н пра́здника вторы́й, со ирмосо́м на 6.
Ирмо́с: Ели́цы дре́вних изреши́хомся се́тей/ бра́шен львов, сотре́нных члено́вными,/ ра́дуимся и разшири́м уста́,/ сло́во плету́ще от слове́с сладкопе́ния,/ и́мже к нам наслажда́ется дарова́ний.
Умерщвле́ние пе́рвее насади́вый тва́ри,/ зве́ря злоде́йственнаго вообра́жься в естество́,/ омрача́ется плотски́м прише́ствием:/ у́тру я́вльшуся, прирази́вся Влады́це сокруши́ти свою́ вражде́бную главу́.
Влече́т к себе́ Богозда́нное естество́, утро́бы мучи́теля, погребе́нное преде́лы;/ ражда́ется па́ки земноро́дных Обновле́ние,/ де́ло держа́вно соверша́я Влады́ка:/ прии́де бо, то́е очи́стити хотя́.
Кано́н му́чеников, глас 8.
Ирмо́с: Страх Твой, Го́споди, всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющих.
Теку́щих непостоя́тельное возненавидевше,/ бу́дущих возжела́сте нетле́нное наслажде́ние,/ до́блии страда́льцы Христа́ Всеца́ря́.
Му́жески проти́вистеся, Богому́дрии, пребеззако́нно повелева́ющему нече́стию покори́тися,/ и побе́ды с Небесе́ прия́сте венцы́.
Тре́бища пре́лести низложи́сте,/ неле́стны же Христо́вы му́ченицы себе́ воздвиго́сте хра́мы че́стны/ и столпы́ Богоразу́мия.
Богоро́дичен: Ору́жие пре́жде обраща́емо вхо́ды мне дае́т, стыдя́щися пробо́дшаго, Де́во Ма́ти, копия́, из Тебе́ рожде́ннаго.
Ин кано́н преподо́бных, глас 4.
Ирмо́с: Не му́дростию, и си́лою,/ и бога́тством хва́лимся,/ но Тобо́ю Отчею Ипоста́сною му́дростию, Христе́:/ несть бо свят, па́че Тебе́,/ Человеколю́бче.
Сокруше́нною мы́слию Богу угоди́вше,/ сокруши́сте вра́жие велехвале́ние, блаже́ннии,/ мече́м сокруша́еми и умерщвля́еми.
Смотря́юще пребыва́ющих му́дрии, присносу́щное,/ нестоя́нных и тле́нных до́лу влеку́що отри́нусте,/ те́мже ублажа́етеся, преподобному́ченицы.
Зако́ну Боже́ственному благопоко́рною мы́слию повину́вшеся,/ плотски́я сла́сти воздержа́нием погуби́сте,/ и ны́не пострада́вше, сла́ву улучи́сте.
Богоро́дичен: Пресвята́я, Пресвято́е Сло́во ро́ждшая,/ освяти́ на́ша и ду́ши и телеса́,/ блажа́щих Тя, Всенепоро́чную.
Конда́к, глас 2. Подо́бен: Вы́шних ища́:
От мирски́я молвы́ избего́сте, и к ти́хому приста́нищу преста́вистеся,/ му́ченичества кровьми́ и по́стничества труда́ми венча́еми./ Те́мже и показа́стеся му́чеников и преподо́бных единовсе́льницы.
И́кос:
Я́же на земли́ умертви́вше у́ды,/ жизноно́сною ме́ртвостию Христа́ и Бо́га страсть изобрази́сте,/ пе́рвее в до́брем поще́нии, и второ́е па́ки во страда́нии./ Те́мже и Сам сугу́бы венцы́ низпосла́ глава́м ва́шим, отцы́,/ угото́вив жили́ще Небе́сное и ме́сто ве́чное,/ иде́же ны́не ра́дующеся,/ яви́стеся му́чеников и преподо́бных единовсе́льницы.
Седа́лен, глас 1. Подо́бен: Гроб Твой:
В вода́х ку́пно блаже́нный коне́ц прия́сте, му́дрии,/ и в них велиа́ра погрузи́вше благода́тию Бо́га на́шего, му́ченицы,/ те́мже венцы́ я́ко победоно́сцы прие́мше,/ ра́дуетеся со А́нгельскими ли́ки,/ с ни́миже нас помина́йте.
Сла́ва, преподо́бных, глас 4. Подо́бен: Ско́ро предвари́:
Я́ко пресе́льницы явля́еми и прише́льцы на земли́,/ ку́щи водрузи́вше в пусты́нях,/ я́ве пости́стеся, преподо́бнии, нагото́ю украси́вшеся доброде́телей оде́ждею,/ сообра́зни бы́вше Христо́вых страсте́й,/ те́мже и претерпе́сте ва́рварское заколе́ние.
И ны́не, то́йже подо́бен:
Струи́ освяти́л еси́ Иорда́нския,/ держа́ву сокруши́л еси́ грехо́вную, Христе́ Бо́же наш,/ преклони́л еси́ дла́ни Себе́ Предте́чеве,/ и спасл еси́ от ле́сти челове́ческий род./ Те́мже Тя мо́лим:/ спаси́ ду́ши на́ша.
Песнь 4.
Кано́н пра́здника вторы́й, со ирмосо́м на 6.
Ирмо́с: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние явля́ющ неизрече́нна Сло́ва,/ И́мже си́льных держа́вы сотро́шася.
По́слан от Отца́, всесве́тлое Сло́во, но́щи отгна́ти зломра́чное стремле́ние,/ и искорени́ти гряде́ши челове́ков грехи́,/ сы́ны же привлещи́, Твои́м Креще́нием, Бла́же,/ све́тлы от струй Иорда́нских.
Са́мое прови́дев нарече́нное Сло́во, я́сно пропове́дник вопие́т тва́ри:/ Сей пре́жде мене́, вторы́й пло́тию сообра́зен,/ просия́ Боже́ственною си́лою вражде́бный наш отъя́ти грех.
Па́жить у Себе́ животво́рну нося́, уловля́ет змие́в,/ гне́здам натека́я мно́гими сетьми́, низлага́я, Бог Сло́во,/ запина́ет же уязви́вшаго всеми́рный род,/ сего́ потре́бль, избавля́ет тварь.
Кано́н му́чеников, глас 8.
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Я́ко Сло́ва служи́тель,/ словесы́ твои́ми безслове́сное обличи́л еси́, му́чениче Ерми́ле,/ неразу́мие беззако́ннующих, усе́рднейше.
Еди́но естество́ Божества́,/ еди́ну власть и госпо́дство, Богому́дрии, пропове́давше,/ многобо́жную лесть преоби́десте.
Пове́шен и стро́ган, и ра́нами озлобля́емь,/ непрекло́нен пребы́л еси́, страстоте́рпче,/ Богому́дре му́чениче Ерми́ле.
Богоро́дичен: Уны́нием дре́млюща, и грехо́м спокрыва́ема,/ к покая́нию мя, Пречи́стая, я́ко Сло́ва Ма́ти, воззови́.
Ин кано́н преподо́бных, глас 4.
Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Не страстьми́ теле́сными победи́вшеся, врага́ победи́ли есте́/ и умертви́вшеся мече́м, всеблаже́ннии,/ к жи́зни Небе́сней ра́дующеся ку́пно преста́вистеся.
Утучни́стеся я́ко а́гнцы воздержа́нием,/ и я́ко овни́ назнамени́тии, рука́ми кровопи́йц волко́в убие́ни бы́сте,/ и соверше́нна заколе́ния, преподо́бнии, Христу́ приведо́стеся.
Свяще́нницы же и ста́рцы и ю́ноши,/ и́же в Раи́фе и Сина́и горе́ живу́щии, му́ченицы бы́ша,/ преподо́бно жи́вше, и ну́ждно уме́рше.
Богоро́дичен: Новоде́лает челове́чество, нов Младе́нец Преве́чный Госпо́дь,/ яви́вся от Де́вы, и Челове́к быв./ То́му воспои́м:/ сла́ва си́ле Твое́й, Го́споди.
Песнь 5.
Кано́н пра́здника вторы́й, со ирмосо́м на 6.
Ирмо́с: Врага́ те́мнаго и оскверне́ннаго я́да/ очище́нием Ду́ха измове́ни,/ к но́вой приста́хом небла́зненной стези́,/ вводя́щей в непристу́пную ра́дость, Еди́нем присту́пну,/ и́мже Бог примири́ся.
Ви́дев Зижди́тель во мра́це прегреше́ний плени́цами неизбе́жными/ его́же вообрази́ персты́, поставля́ет на обою́ ра́му, воздвиг горе́, ны́не во многотеку́щих вода́х омыва́я студа́ дре́вняго/ Ада́мова зла́го нра́ва.
Со благоче́стием притеце́м приле́жно ко исто́чником пречи́стым тече́ния спаси́тельнаго,/ Сло́во усмотря́юще от Нетле́нныя,/ почерпа́ла принося́ще жа́жди Боже́ственныя,/ ми́ра сла́достне исцеля́я неду́г.
Кано́н му́чеников, глас 8.
Ирмо́с: Вску́ю мя отринул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма окая́ннаго?/ Но обрати́ мя, и к све́ту за́поведей Твои́х/ пути́ моя́ напра́ви, молю́ся.
Мук о́блацы, му́ченицы всехва́льнии, не покры́ша ва́шего му́жества:/ па́че со́лнца бо яви́ся благоче́стия сия́нием,/ благочести́выя световодя́щее, и де́монский мрак отъе́млющее.
Преше́дше преде́лы челове́чества, Богоблаже́ннии,/ и па́че есте́ственному соедини́вшеся соверше́нными чище́ньми,/ го́рькия му́ки и строга́ния и ра́ны претерпе́сте ума́ тве́рдостию.
Кре́пко сопроти́вился еси́, му́чениче, судя́щему, сла́вне Ерми́ле,/ и глас слы́шати с Небесе́, преблаже́нне, сподо́бился еси́,/ зову́щему любо́вию прибли́житися я́ко Подвигополо́жнику/ и Сего́ укрепля́ющему му́ченики.
Богоро́дичен: Я́ко добра́, я́ко красна́, я́ко чистото́ю облиста́ющи,/ кра́снаго добро́тою воплоти́ла еси́ Сло́ва и родила́ еси́,/ е́же бы́ти всем богоде́льно, Де́во Ма́ти,/ подаю́щаго бога́тством бла́гости.
Ин кано́н преподо́бных, глас 4.
Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Ра́й сла́дости, жи́зни дре́во Го́спода, яви́стеся,/ посреди́ име́яй ва́шу я́ко же́ртву кровь прии́мшаго.
Крове́й то́ки со сле́зными смеси́вше струя́ми, Богоно́сцы,/ многообра́знаго зми́я в сих погрузи́сте.
Красоту́ Бо́жию зре́ти сподо́бистеся,/ ве́чное весе́лие вместо́ трудо́в и боле́зней, блаже́ннии, прия́сте.
Богоро́дичен: Родила́ еси́ Бо́га, па́че сло́ва и мы́сли/ и пребыла́ еси́ по рождестве́, я́ко пре́жде рождества́ Де́ва,/ Чи́стая Богора́дованная.
Песнь 6.
Кано́н пра́здника вторы́й, со ирмосо́м на 6.
Ирмо́с: Вожделе́ннаго я́вствова со всеблаже́нным гла́сом Оте́ц,/ Его́же из чре́ва отры́гну:/ ей, – глаго́лет, – Сей соесте́ствен Сын,/ Сый светоза́рен,/ произни́че из челове́ча ро́да:/ Сло́во же Мое́ жи́во и Челове́к промышле́нием.
От глуби́ннаго льва, тревече́рний стра́нне проро́к во вну́тренних валя́яся,/ а́бие произы́де, пакибытия́ спасе́ние/ от зми́я человекоуби́йцы всем предъявля́я в после́дняя ле́та.
Отве́рсту Не́бу всесве́тлых писа́ний, учени́к зрит от Отца́ посыла́емый,/ пребыва́ющ же Дух на Пречи́стем Сло́ве,/ наше́д я́ко го́лубь неизрече́нным о́бразом,/ лю́дем же явля́ется, прише́дшим ко Влады́це.
Кано́н му́чеников, глас 8.
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зо́л душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли́, Бо́же, возведи́ мя.
Во́д животво́рных испо́лнившеся, в речны́я вве́ржени бы́сте струи́/ и, в них прие́мше кончи́ну, зло́бы предста́теля удави́сте, всехва́льнии,/ и ны́не нам исцеле́ний пото́ки источа́ете.
В ко́шницу вве́ржени бы́вше, усе́рдно преда́стеся глубине́, страстоте́рпцы,/ и к жи́зни вознесо́стеся Боже́ственней,/ я́же от ве́ка ва́ми наде́емая обре́тше ра́достно,/ велему́дрии святи́и му́ченицы.
Яви́лся еси́ в го́рцей му́це му́чимь, и па́лицами бие́мь, Стратони́че му́чениче,/ терпе́ния необори́мь столп возвы́шен степе́нем ве́ры,/ сопротивле́ние гони́телей потребля́я и словесы́ и дея́ньми.
Богоро́дичен: Страсти немощны́я души́ моея́, и боле́знь се́рдца, Де́во,/ и ума́ преложе́ния многообра́зная, я́ко ми́лостива, Пресвята́я, исцели́/ и ути́ши лю́тое зол мои́х волне́ние, молю́ся.
Ин кано́н преподо́бных, глас 4.
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х/ исте́кшею кро́вию.
Отве́ргше пристра́стия у́зы по́стничеством,/ ну́жнейшею сме́ртию уз теле́сных разреши́стеся/ и нереши́мою любо́вию связа́стеся Зижди́теля.
Я́ко го́ры высо́кия жи́тельством я́вльшеся,/ объя́ти го́ры, и созда́ние все претя́щаго си́лою Христо́вою под но́ги покори́сте.
Вода́ми напои́вшеся слез, блаже́ннии, я́ко земля́ добра́ же и ту́чна,/ муче́ния клас плодоноси́сте, в жи́тницах ве́чных Христу́ соблюда́емый.
Богоро́дичен: Успи́ страсте́й пло́ти моея́ во́лны/ неусы́пною Твое́ю, Де́во, моли́твою, молю́ся,/ и не даждь грехо́вным усну́ти мне сном тяжча́йшим.
Конда́к и́кос пра́зника.
Песнь 7.
Кано́н пра́здника вторы́й, со ирмосо́м на 6.
Ирмо́с: Опали́ струе́ю зми́евы главы́ пе́щный высо́кий пла́мень,/ ю́ноши нося́щ благочести́выя,/ ути́шивый неудободержи́мую мглу из греха́/ всю же омыва́ет росо́ю Ду́ха.
Тебе́ живопису́ющий ассири́йский пла́мень ужа́сен поставля́еши, в ро́су преведе́н;/ те́мже вода́ ны́не, я́коже пла́мень, одева́яй, вре́дную зло́бу, Христе́, прикрове́нную опаля́ет,/ от поползнове́нныя стези́ призыва́ющи.
Разде́льшуся Иорда́ну дре́вле, по су́ху прехо́дят лю́дие Изра́ильстии,/ Тебе́, Держа́внейшаго, содержа́ща тварь некосни́тельне,/ ны́не в вода́х напису́ющии, к нетле́нней и поле́зней стези́.
Ве́мы, пе́рвее всепа́губный пото́п/ ми́лостивно Тя всех во тлю привести́,/ о, тревели́кия сотворя́я и стра́нная́/ Ны́не же пото́пльша, Христе́, грех за благосе́рдие и челове́ческое спасе́ние.
Кано́н му́чеников, глас 8.
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша вопию́ще:/ благослове́н еси́, Го́споди Бо́же, во ве́ки.
Теча́ше медото́чное от уст твои́х сло́во,/ го́ресть уны́ния Стратони́ка, твоего́ сострада́льца, укроща́ющее, вопию́щаго, Ерми́ле:/ Бо́же, благослове́н еси́ во ве́ки.
Жезл си́лы держа́, спаси́тельный крест, до́блий му́чениче,/ жезло́м бие́ния терпи́ши усе́рдно, воспева́я Творцу́ твоему́, Ерми́ле:/ Бо́же, благослове́н еси́.
Спасы́й от чре́ва ки́това содержи́маго проро́ка пресла́вно/ от ре́чных вод ва́ша спаса́ет победоно́сныя мо́щи, по кончи́не, страда́льцы.
Богоро́дичен: Разреша́я Е́вину кля́тву, во Всенепоро́чную всели́лся еси́ Де́ву,/ благослове́ния исто́чники источа́я вопию́щим:/ благослове́н еси́, Го́споди Бо́же, во ве́ки.
Ин кано́н преподо́бных, глас 4.
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Просвеще́ни воздержа́ния светлостьми́/ и страда́ньми свяще́нными, му́ченицы, явле́нно освяща́еми,/ преидо́сте к Све́ту Незаходи́мому, и Дне сы́нове бы́сте.
Во́лею су́щих в ми́ре сла́дких устраня́ющеся,/ стра́нно челове́ком Я́вльшемуся пло́тию, присво́истеся,/ пребыва́ющая и неистлева́ющая блага́я насле́довавше, преподо́бнии.
Боже́ственный Па́вел и Иоа́нн, и Феоду́л, Нил, и вку́пе вси/ всесла́вно и уме́рше и пожи́вше,/ да ублажа́тся по́стницы и сла́внии му́ченицы.
Богоро́дичен: Тя ма́нну жи́зни во чре́ве Твое́м нося́щую,/ дре́вле манноприе́мная ста́мна, я́ко вои́стинну прообража́ше явле́нно./ Благослове́нна Ты в жена́х еси́, Всенепоро́чная Влады́чице.
Песнь 8.
Кано́н пра́здника вторы́й, со ирмосо́м на 6.
Ирмо́с: Свобо́дна у́бо тварь познава́ется/ и сы́нове Све́та пре́жде омраче́ннии;/ еди́н сте́нет тьмы предста́тель./ Ны́не да благослови́т усе́рдно Вино́внаго/ пре́жде окая́нное язы́ков всенасле́дие.
Трие́ Богови́днии, во огни́ ороша́еми, озаря́ющеся треми́ всесве́тле святы́нями,/ я́ве показова́ху Превы́шнее Естество́ смеше́нием челове́ческим,/ огнепаля́щее росо́ю ми́лостивно вся́ку па́губную лесть.
Да убели́тся вся́кое земно́е естество́,/ от паде́ния ны́не на Не́бо возводи́мо,/ И́мже бо вся соблюда́ются, Сло́вом, теку́щими струя́ми омы́вшеся,/ прегреше́ний пре́жних убеже́, пресве́тло измове́но.
Кано́н му́чеников, глас 8.
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Терпи́ши, бие́мь и лю́те стру́жемь, сло́тами44 боле́зней окружа́емь, сла́вный Ерми́ле,/ Стратони́ка же наста́вник бо бла́гоче́стия подвиго́м был еси́,/ с ни́мже и вопия́л еси́:/ свяще́нницы, благослови́те, лю́дие, превозноси́те Го́спода во ве́ки.
Непрекло́ннии мудрова́нием, и до́блии страда́нием,/ и Небе́сных даро́в досто́йни, ка́мение честно́е и ве́рных предсто́лпия,/ ка́мению, повеле́ни бы́вше, не принесо́ша че́сти,/ Бо́гу же всех вопия́ху Влады́це:/ лю́дие, превозноси́те Его́ во ве́ки.
Твоя́ ре́бра ноготьми́ стружя́ мучи́тель/ и мечи́ неми́лостивно ссека́я тя, ума́ не укра́де, укрепле́на Боже́ственною любо́вию/ и Изба́вителя насмотря́юща добро́ту./ Ему́же ны́не со дерзнове́нием предстоя́, взыва́еши:/ лю́дие, превозноси́те Го́спода во ве́ки.
Богоро́дичен: Сый по всему́ соверше́н и естество́м Непристу́пный,/ яви́ся присту́пен мне, пло́тию обложе́н из Тебе́, Неискусобра́чная,/ Его́же приле́жно моли́, беззако́ний мои́х бре́мя расточи́ти и спасти́ песнопою́ща:/ свяще́нницы, благослови́те,/ лю́дие, превозноси́те Го́спода во ве́ки.
Ин кано́н преподо́бных, глас 4.
Ирмо́с: Ру́це распросте́р Дании́л/ льво́в зияния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.
Велича́йший лик по́стническими доблестьми́ укра́шен,/ преподо́бных днесь вся лико́вники Боже́ственныя показу́ет,/ восхваля́ющия у́бо того́, Христу́ же пою́щия:/ благослови́те, вся дела́ Госпо́дня, Го́спода.
Закла́ни бы́сте, я́коже а́гнцы, ва́рварскими мечи́ ссека́еми,/ и приведо́стеся соверше́нна закла́вшемуся Сло́ву заколе́ния/ и в ски́ниих перворо́дных всели́стеся, песнопою́ще:/ благослови́те, вся дела́ Госпо́дня, Го́спода.
На́зи вся́кия су́ще сла́дости, пра́отцы обнажи́вшаго,/ отцы́ преподо́бнии, зле́йшаго врага́ обнажи́сте:/ оде́жду же свяще́нну я́ко пострада́вше прии́мше,/ сего́ в студ, му́дрии, облеко́сте.
Богоро́дичен: Отверза́ется па́ки Тебе́ ра́ди дре́вний рай,/ и в онь вво́дится пре́жде осужде́нный челове́к, и обожа́ется и́стиннейше,/ Богоблагода́тная Чи́стая,/ челове́ков на обновле́ние вопию́щих:/ благослови́те, вся дела́ Госпо́дня, Го́спода.
Песнь 9.
Кано́н пра́здника вторы́й, со ирмосо́м на 6.
Ирмо́с: О, па́че ума́ Рождества́ Твоего́ чуде́с'/ Неве́сто Всечи́стая, Ма́ти Благослове́нная,/ Е́юже получи́вше всесоверше́нное спасе́ние,/ досто́йно хва́лим, я́ко Благоде́теля,/ дар нося́ще – песнь благодаре́ния.
Уве́дехом Моисе́ю купино́ю явле́нная, гряди́, стра́нными уста́вы соде́ланная:/ я́ко бо спасе́ся, Огнь нося́щи, Де́ва, Светоно́сна ро́ждши Благоде́теля,/ во Иорда́нских же струя́х явле́нна.
Помазу́еши, соверша́я челове́ческое существо́, Царю́ Безнача́льне,/ Ду́ха обще́нием, струя́ми чи́стыми отмы́в/ и тьмы кре́пость же посра́мль возвы́шенную,/ ны́не в безпреста́ннем возда́ти житии́.
Кано́н му́чеников, глас 8.
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сниде да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
Ве́трилом му́ченицы Христо́вы му́к преплы́вше пучи́ну,/ устреми́стеся ко приста́нищем поко́я, иде́же му́чеников ли́ки, пра́ведных собо́ри,/ иде́же незаходи́мый Свет, и ра́дость пра́зднующих в Ду́се.
Днесь па́мять свяще́нную страда́ния ва́шего, всеблаже́ннии, Це́рковь Христо́ва соверша́ющи,/ пра́зднует ра́достный и светоно́сный пра́здник, Бо́га велича́ющи, Венцеда́вца ва́шего,/ велича́ющаго вас, я́ко уго́дники.
Взя́стеся к пресве́тлей свиде́тельства и́стинно высоте́, святи́и,/ и восприя́сте жела́ния край,/ и́стинно блаже́ннии Ца́рствие Бо́жие прие́мше недви́жимое,/ му́чениче Стратони́че с Ерми́лом му́дрым и Богоразу́мным.
Богоро́дичен: Пощади́ мя, Спа́се, рожде́йся и сохрани́вый Ро́ждшую Тя нетле́нну по рождестве́,/ егда́ ся́деши суди́ти дела́ моя́,/ беззако́ния презира́я и грехи́ моя́, я́ко Безгре́шен,/ я́ко Бог Ми́лостив и Человеколю́бец.
Ин кано́н преподо́бных, глас 4.
Ирмо́с: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́:/ Тем веселя́щеся, Тя, Богоро́дице, велича́ем.
Священносло́вии преподо́бными свяще́нныя, прииди́те,/ отцы́, в Раи́фе и в Сина́и пожи́вшия в преподо́бии, благоче́стно пострада́вшия/ велегла́сно велича́ем.
Те́ло и ду́шу Го́споду освяти́сте преподо́бно,/ воздержа́ния по́ты освяти́вшеся/ и кро́вными тече́нии изсуши́вше ва́рварския зло́бы мо́ре.
Богосия́нная ва́ша па́мять, восто́ками просвеща́ема,/ за Христа́ ва́ших боле́зней, помышле́ния всех, блаже́ннии, озаря́ет/ благода́тию Вседе́теля и Боже́ственнаго Ду́ха.
Богоро́дичен: Трепе́щут Херуви́ми, зря́ще на Них:/ неизглаго́ланным сло́вом седя́щаго Сло́ва,/ Ма́терними рука́ми Младе́нца держи́ма Твои́ми, Пресвята́я Влады́чице,/ вы́шши вся́кия тва́ри.
Свети́лен. Подо́бен: Духом во святи́лищи:
Боле́зньми по́стничества злонача́льнаго зми́я до конца́ уби́сте,/ при кончи́не же вене́ц муче́ния прия́сте,/ отце́в похвало́ и му́чеников сла́ва,/ и́же в Раи́фе и Сина́и всесвяще́нное мно́жество чу́дных отце́в.
Сла́ва, и ны́не, пра́здника:
Све́та незаходи́маго бысть настоя́щий день:/ Христо́с бо И́стина прии́де ны́не и яви́ся./ Псалмы́ Того́ досто́йно и пе́сньми воспои́м, я́ко Соде́теля же и Влады́ку./ О но́ваго та́инства!/ Ада́мов Творе́ц во́лею Челове́к яви́ся.
На стихо́вне стихиры, глас 6. Подо́бен: А́нгельския:
Прииди́те, и мы в чу́встве се́рдца притеце́м, ве́рнии,/ к струя́м Иорда́нским,/ и Христа́ виде́вше,/ пло́тию креща́ема от Иоа́нна Предте́чи,/ ны́не с ним славосло́вяще, Тому́ возопии́м:/ бла́гослове́н, явле́йся Бо́же наш, сла́ва Тебе́.
Стих: Мо́ре ви́де и побеже́,/ Иорда́н возврати́ся вспя́ть.
Иессе́ев ны́не прозябе́ же́зл,/ Боже́ственный Киво́т и ма́нны Прия́телище,/ из Него́же произы́де Цвет жи́зни Нетле́нный:/ Его́же Иорда́н убоя́вся,/ и Иоа́нн руко́ю прикосну́вся Христу́ зовя́ше:/ благослове́н, явле́йся Бо́же наш, сла́ва Тебе́.
Стих: Что ти есть, мо́ре, я́ко побе́гло еси́?/ И тебе́ Иорда́не, я́ко возврати́лся еси́ вспя́ть?
Воспо́йте пе́сни, Небе́сныя си́лы,/ по́йте, челове́цы, и ра́дуйтеся согла́сно:/ се́ бо Влады́ка, О́тчее сия́ние,/ гряде́т к струя́м Иорда́нским, да крести́тся от раба́./ Лю́дие, воззове́м:/ благослове́н, явле́йся Бо́же наш, сла́ва Тебе́.
Сла́ва, глас 8:
Блаже́нни есте́, преподо́бнии и му́ченицы Христа́ Бо́га:/ преподо́бнии у́бо, я́ко пра́вды ра́ди изгна́стеся,/ му́ченицы же, я́ко меч вас не разлучи́ от любве́ Христо́вы./ И сего́ ра́ди ра́дуетеся,/ я́ко мно́га мзда́ ва́ша на Небесе́х.
И ны́не, глас то́йже:
Днесь тварь просвеща́ется,/ днесь вся́ческая веселя́тся,/ Небе́сная вку́пе и земна́я,/ А́нгели и челове́цы смеша́ются,/ иде́же бо Царе́во прише́ствие, и чин прихо́дит./ Теце́м у́бо на Иорда́н,/ и ви́дим вси Иоа́нна, ка́ко креща́ет Верх Нерукотворе́нный и Безгре́шный./ Те́мже апо́стольский глас припева́юще, согла́сно возопии́м:/ яви́ся благода́ть Бо́жия, спаси́тельная всем челове́ком,/ озаря́ющая и подаю́щая верным ве́лию ми́лость.
На литурги́и
Блаже́нна, пра́здника песнь 8-я, на 4, и отце́в песнь 6, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Ри́мляном, зача́ло 99. Аллилу́иа, глас 4. Воззва́ша пра́веднии, и Госпо́дь услы́ша их. Ева́нгелие Луки́, зача́ло 24. Прича́стен: Ра́дуйтеся, пра́веднии, о Го́споде, правым подобает похвала.
Святые мученики Ермил и Стратоник
Славяне по происхождению, пострадали в царствование императора Ликиния (307 – 324), ревностного язычника, воздвигшего на христиан сильное гонение.
Святой Ермил был диаконом в городе Сингидоне (ныне Белград). Он осмеивал языческих богов и тех, кто поклонялся им. Некий воин донес об этом императору. Святой Ермил был схвачен и предстал перед Ликинием. Он назвал языческих богов бездушными идолами, делом рук человеческих и исповедал Иисуса Христа Истинным Богом. Император приказал бить святого по устам, а затем бросить в темницу. В заточении святой Ермил молился Богу, поя псалмы: «Господь мне Помощник» (Пс. 117), «На Бога уповах» (Пс. 55) и другие. Ангел Господень явился святому Ермилу и укрепил его дух обетованием помощи Божией и победного исповеднического венца.
Через три дня святого Ермила вновь привели к Ликинию. После бесплодных попыток уговорами и угрозами склонить святого к поклонению идолам, святого Ермила подвергли жестоким пыткам: шесть воинов растянули его на земле и били железными прутьями. Во время жестоких мучений святой Ермил молил Бога о даровании ему крепости. С неба раздался голос, обещавший через три дня вознаградить святого мученическим венцом. Воины пришли в смятение, но Ликиний не вразумился этим чудом и приказал бросить святого Ермила в темницу.
Темничным стражем оказался Стратоник, тайный христианин и друг святого Ермила. Видя его мучения, святой Стратоник скорбел сердцем, но радовался душой о стойкости друга. На третьем допросе святого Ермила подвергли страшным пыткам: орлиными когтями ему растерзали живот так, что видны были внутренности. Стратоник, присутствовавший на допросе, заплакал от сострадания к другу. Император тотчас был извещен о том, что темничный страж Стратоник сочувствует христианину. Стратоника призвали к императору. Исповедав Христа Истинным Богом, святой Стратоник стал убеждать императора перестать поклоняться бездушным идолам и уверовать в Единого Бога Творца и Промыслителя. Тогда святого исповедника Стратоника также подвергли пыткам: его нещадно били до тех пор, пока он не умолк в изнеможении.
Брошенные в темницу, оба мученика молились Богу словами псалма «Помоги нам, Боже наш, Спасителю наш, славы ради Имени Твоего» (Пс. 78). И вновь услышали глас с небес, обещающий им венцы исповеднические.
После жестоких пыток, на следующий день, не добившись от святых мучеников отречения от веры Христовой, Ликиний приказал их утопить. Святых опутали сетями и бросили в Дунай. На третий день христиане нашли тела святых мучеников (†315) на берегу и с честью погребли их в одном гробе в окрестностях Белграда.