Фото: erziapr.ru
Овсе вишкинестэ цёрынем, мартонзо чопоньбелев ульцява якамсто, дивазь кевкстекшнимим: «Менельсэ валдонть кие кирвазтизе?» (Рузкс: «Кто на небе свет зажёг?») Сонзэ шкава-порава минськак арсинек: велькссэнек кить-бути алкукс эрить. Менеленть эзга таргавозь ашназа «Каргонь кись» («Млечный путь») – шлязь-нардазь, пракстакс таргавозь ютамо тарка, кува якить Сынь, Менелень Эрицятне…
Покшсто касозь, сельменек а саевить липниця тештетнень эйстэ ды сы превс: паряк, конаськак эйстэст алкукскак кирвазтезь минек лемс? Ды зярс сон а мади, карматано эрямо…
Истямо мельс сыть Кочкуровань раськень ломантне, кинь эйстэ ванькс эрзянь кельсэ ёвтни В.С.Брыжинский «Каргонь кинь ломанть » драматической сагасонть. Ёвтни эрямодост раськень ушодыцятнестэ саезь – Нечаень, Нуянза нинзэ, Радай цёрынест ды Алешко ялгаст марто вастовомстонок – поладыцязост, неень шкантень пачкодезь. Те – колмо покш книгат. Колмоцесь эйстэст лиссь вана ней, ды Саранскойсэ Печатень кудосо ульнесь сонзэ невтемась (презентациясь).
Паро, неень шкане, зярдо истя ламось а саты, удалась нолдамс неть книгатнень. Лиякс кадоволь бу ловномс ансяк васенценть, конань эсь шкасто аламонь-аламонь печатызе «Сятко» журналось.
Сайсыть неть эчке книгатнень ды ванат: эрьванть лангсо рисовазь ашо лишме азоронзо марто. Кавтотнесэ сон ласте, колмоцесэнть – раськень калмазыренть вакссо ашти чалгадо, кунсолыця лишмензэ кирдезь.
Н.С.Макушкин содавикс художникенть те рисовавксось уш чарькодевти: икеленек панжови ламо пингень перть эрзянь раськенть эрямозо. Сеске ёвтасынек: лия истямо произведения костояк а мутадо – а рузонь, а эрзянь эли кодамояк лия кельсэ. Ловномсто карми марявомо: тонськак теке соват Куз велень эрзятнень юткс, мартост вейсэ вастоват ламодояк ламо – содавикс ды аволь – ломантнень марто. Марясыть кортамост, кунсолосыть морост, чарькодьсыть ризксэст-мелявксост ды салавань арсемасткак.
Ёвтнемась ушодови Пугачёвонь восстаниянть шкасто. Сонзэ войскасо ульнесть Нечайгак, Алешкояк. Те «бунтонть», содатано, лепштизь, ды неть эрзянь цёратне оргодсть мельгаст пансицятнень эйстэ. Ков тенст молемс? Оймасть тусто вирь потсо Локсей ды Дигань кавто эрькетнень малас, ванькс ведь лейненть чирес. Кода меремс, оймасть? Пеень сускозь кармасть важодеме, чаво таркасо эрямост ладямо. Арась, эзть ёма: стявтсть васня «мода кудо» (землянка), мейле тонадсть пертьпельксэнь сюпавчитнень вельде весе эрявиксэнть эсест лезэс тееме-нолдамо. Мень тенк а Робинзонт?
Эрямодонть ялатеке а кекшат. Вана минек эрзятнень юткс понгсь рузонь офицер. Сонзэ, Борис Симбирскоень, цёратне менстизь вачо верьгизэнь кургосто. Кода маштсть, витизь шумбрачинзэ. Баславазь, ильтизь. Шкань ютазь те Симбирскоенть нуцьказо, Василий Родионович (Радаевич) генералось, вастови Нечаевень раськень поладыцянть Артем марто. Те уш тиринь мастордонть ве ёно: болгартнэнь олячист кис туркатнень каршо тюремстэ. Теде икеле ульнесь 1812 иень Отечественной войнась, зярдо пансть Россияс эцезь французтнэнь – Наполеононь войскатнень. Седе мейле ульнесть Россиянь-Япониянь войнась, Васенце мировоесь ды Ине Отечественноесь. Весе неть кирви толтнэнь-даволтнэнь пачк ютасть эрзятне. Чарькодеви, Кочкуровтнеяк. Эрсесть шкат, целанек те раськесь овсе ёмиксэль: апаро ормадо кулсесть, ды ванстовсь эйстэст ансяк вейкесь. А уш зярошка тенст савсь печтямс-цидярдомс! Войнатнеде башка, минень-сюнонь апарот, нарьгамот, чумовтомо пекстамот, кулакокс ловомат, малавикстнэнь калмамот… Виевть, нардевть эрзятне! Косояк пря эзть максо, цидярдсть. Ансяк вана ризнэвти авторонть ды минекак седейтнень: кадови-арась масторлангсо эрзянь велесь? Зяро уш эйстэст ёмасть минек шкане?
Саганть ловномсто маряви: тонськак ютат весе неть ашожда китнева, козонь пупорькшнесть, вайсесть ды лисевсть Кочкуровтне. Мартост вейсэ вастсыть сеть ломантненьгак, кинь эйстэ савкшнось марсемс ансяк историянть тонавтнемстэ. Неть – Денис Давыдов гусарось, Верещагин художникесь, Василий Корж генералось – Белоруссиянь партизантнэнь вейсэндявксонь прявтост, Советской Союзонь Героесь, ды истя седе тов. Лия персонажтнень ютксо – «анеявикс вийть», конатнес свал кемсть эрзятне: Юртавась, Юртатясь, Кардаз Сяркось, Калмазырь атясь. Сынь а невтить пряст весенень, ансяк кода стувтнемс эйстэдест? Кие эно карми ванстомо эрицятнень кудост-чист, шумбрачист, эрямосткак?
Авторось кемевти: аволь ансяк неть анеявикс вийтне ванстыть раськенть. Лезды тенст пертьпельксэнть чарькодемась, виезэнзэ кемемась. Нузяксчинть асодамось. Эрьва тевс апак пеле кундамось. Мазычинь неемась ды теемась. Чувтосто кодат дивань керсевкст маштыть тейнеме Кочкуровтне! Ды истя мазыйстэ налксить эсест кедьсэ «чачтозь» кайгасонть! Паро оякс тейневить раськень ломантненень ракшатне. Кода лезды азортнэнень Давол кискась! Тюрьган айгорось идизе аволь ансяк пек ранязь Занёконь эрямонзо – эзизе максо ваявтомс Нина Петровнаньгак. Тюжалкай алашась чумовтомо мари чумо Борискань чавовоманзо кис…
Те весе истя. Ансяк авторось апак кавтолдо ёвты: сехте покш, валдо, весементь изниця виесь – вечкемась. Истямо ёжомарямось лезды цидярдомс покштояк покш стакачитнень. Вечкемавтомо а ушодови вейкеяк паро тев. А тееви паро семия. А кастовить вадря эйкакшт. Апак вечке кастозтне чалгить нолажа ки лангс. Авторось тенень кемевти Керязь Яшкань ды Фирцань семиятнень невтезь. Бико – аволь сонсензэ Яшкань пельде чачтозь, ды апак вечке эйкакшось апаро тевензэ коряс мик икельдизе тетянзо. Фирцань ламо эйкакшонзо эйстэ а кинь лангс кемемс, ды эстензэ, наксадо ойме ломанентень, кадовсь ансяк вейке: ледемс прянзо. Сень кис Микита атя пурнызе-кастызе Валерия уроз тейтерьканть, ды Ленинградсто вачодо пельскулозь эйкакшось, атянть вечкеманзо марязь, аволь ансяк вельмесь – панжовсть обуцянь сехте паро ёнксонзо, скрипкасо седямонь талантозо.
Апаро ойме муевсь сынсест Кочкуровтнень ютксояк. Те – мик профессорокс теевезь Фёдор, кинь окойники сасызе сонсензэ цёранть кедьсэ нолдазь пулясь… Тесэяк чумось – аванзо ёндо седей лембень асатомась… Ды вана сагань смустенть нурькинестэ ёвтызе Поля баба Занёк марто кортамсто: «Вечкезь, цёра, эрямось пек тантей маряви ».
Валдо вечкемась эзь максо тюрьгавтомс верде-верьс, черде-черьс (кода эрси лиясто) Нина Петровнань ды Ганнань – Белоруссиянь партизанканть, кона идизе мирдензэ, Сергеень, куломадо ды чачтсь пельдензэ эйкакш. Меремс, теевсь тензэ омбоце никс. Мекевлангт, Яринка, вечкевикс ломанест пельде чачозь тейтерькась, теевсь кавонест аватнень туртов сырнень покольнекс…
Эсень ёндо меревлинь: койсэнь, сагасонть весемеде пек удалась невтемс, кода кирвазсь-виензась Радаень ды Наталянь вечкемаст. Наталянь мельс пек тусь Радай. Ансяк сонзэ пек ацирьгавтызе, мекс тона салазь салызе, ды… баксоризе цёранть чаманзо, раздизе панаронзо. Тейтересь ды цёрась пек виздить вейке-вейкедест – секень вант, семияськак тенст а тееви. Алешко лелясь вечкезь згили лангсост ды пек лезды теемс вейке-вейкенень эскелькстнэнь. Истя Наталянь кедьстэ нолашты Радаень эшкемс анокстазь пенгеполенась, ды тейтересь лекшкады цёранть ёжос…
Тешкставлия сень, кода В.С.Брыжинский машты валтнэсэ налксеме. Каня, алкукс паро ладсо апак чарькоде, каня, згилязь, велень ломантне коньяконтень мерить – «коник», мезонинэсь тенст – «мазый ни» (Петра Артемыч купецесь бажась тень вельде тердемс од кудозонзо ошс кадовозь нинзэ), Амазонкатнень лемдизь «амазынкакс» (кода лиякс меремс неть авинетненень сынст апаро тевест кис?). Мезе ашти сельмень сявадыцянть сялдомась: «Ва пейсалазкетне эзнестэ лисить »… Ёжов тейтернеденть мереви «ривезь патя».
Сагасонть комсьветее ёвтамот. Кой-мезесь аволь сеске невтеви – панжови ансяк шкань ютазь. Те седеяк касты ловныцянть мелензэ содамс, мезе ули седе тов? Кие те, Нечаень ды Алешконь ялгаст, сынст «Колмоськесь »? Монгак тень тесэ а ёвтаса: кадык ловныцятне сынсь вешнесызь-мукшносызь вейке-вейке марто эсь ютковаст ломантнень сюлмсиця суринетнень…
А чарькодеви лиясь: мекс зярс кияк а бажи путомс сцена лангс – мельга-мельцек – эрзятнень эрямодост те пек паро произведениянть? Снимамс корязонзо ламо сериясо кинофильма? Тень пингстэ, кеман, витевить келень тия-тува нолдазь ильведевкстнэ. Васняяк, «жо» эрзянь кельс а ладиця пелькскетне, валонь а истят петне (… пештязь книгасо… ашо винасо… Эряволь «книгадо, винадо»). Эли «Учи цёранзо самонзо », «пенерьванзо лавтовонзо» – эряволь «самонть», «лавтовонть». Кортамсто эдь ламось ёвтави седе видестэ-чарькодевиксстэ. Паряк, тень кирдсь мельсэ сагань редакторось Н.Ишуткин, конась целанек важодсь лангсонзо аволь аламо.
Учневи, минек театратнесэ, икелевгак Национальнойсэ, Культурань министерствасо, тевень ветицятнень ютксо окойники муевить панжадо сельметь, тиринь культуранть кис раськень тевтнеде алкуксонь мелявтыцят, ды минь авторонть марто вейсэ кенертяно аволь ансяк ловномо – нееме эрзянь литературань од, покш изнявксонть. Зярс сюкпря авторонтень – искусствоведэнтень, режиссёронтень, профессоронтень Брыжинский Василий Сергеевичнень – мельспаронть кис, зярдо телевизоронть ваномань таркас капшат панжомс седейлембеде пешксе книгатнень.
Татьяна Ковалева,
журналист, Россиянь ды Мордовиянь культурань заслуженной роботник.