Иоанн Шанхайский – канон
Глас 4: Песнь 1
Ирмос: Моря чермную пучину, невлажными стопами, древний пешешествовав Израиль, крестообразныма Моисеовыми рукама, Амаликову силу в пустыни победил есть.
Припев: Святителю отче Иоанне, моли Бога о нас.
Благо есть воспевати угодники Божия, в их же лице нам радостне светит святый Иоанн, утешая, врачуя его призывающия, научая нас образом многотрудного жития своего ревновати о помощи сущим в бедах.
Припев: Святителю отче Иоанне, моли Бога о нас.
О желание сердца боголюбивого! Возжелал еси еще в возрасте детищном истины быти поборник! Тако бо плениша тя повести о непощадивших жизни своя за правду Божию множества дивных святых!
Слава Отцу и Сыну и Святому Духу, и ныне и присно и во веки веков. Аминь
Привременно недоуменен был еси, еже каковый путь, воинский или гражданский себе избрати. Но зреяше в душе твоей крепчайша мысль: всего себе предати на служение святей церкви Христовой.
Богородичен: Пресвятая Богородица, спаси нас!
(Величит душа Твоя, Владычице, Господа нашего и радуется дух Твой о Бозе Спасе и Сыне Своем! И како смели бы мы воспевати песнь Твою, аще не благоволила бы Сама пророчески рещи, яко ублажат Тя вси роди.)
Мы о Тебе хвалимся, Богородице, и к Богу тя имамы непостыдное предстательство, простри руку Твою необратимую и сокруши враги наша, ниспосли Твоим рабом помощь от святаго.
Песнь 3
Ирмос: Веселится о Тебе Церковь Твоя Христе, зовущи: Ты моя крепость, Господи, и прибежище, и утверждение.
Припев: Святителю отче Иоанне, моли Бога о нас.
С веселием совершаем память твою, архипастырю наш и наставниче, поклоняемся честным и нетленным мощем твоим, просяше молитв твоих.
|
|
Припев: Святителю отче Иоанне, моли Бога о нас.
Восприял еси образ ангельский, и оболкся еси во вся оружия Божия, ополчився еси противу духов злобы поднебесных и побеждая их.
Слава Отцу и Сыну и Святому Духу, и ныне и присно и во веки веков. Аминь
Не давал еси сна довольна очесем твоим, не возлегл еси на одр во еже почити. Уподобился еси отцем древлим, о подвижниче!
Богородичен: Пресвятая Богородица, спаси нас!
(Богоизбранная Отроковице, приведенная во храм Господень, воспитавшаяся во храме во Святая Святых, истинно вышши еси всех, Дево чистая.)
Рай жизни сущи, Богородице, смерти греховныя и страстей многообразных избави мя вскоре.
Господи помилуй, Господи помилуй, Господи помилуй
Седален, глас 4:
Молитва твоя, отче Иоанне, аки столп огненный до небес досягаяй явися, путеводящ Израиля новаго в житейстем странствии, сего ради чтущим тя терпение даруй и благодарение Господу в сердцах насади, да не якоже ропотницы оныя, египетских мяс рачителие осудимся, но да уподобимся земли Обетованныя нетленных благ насладитися.
Слава Отцу и Сыну и Святому Духу, и ныне и присно и во веки веков. Аминь
глас тойже: Молитва твоя, отче Иоанне, аки столп огненный до небес досягаяй явися, путеводящ Израиля новаго в житейстем странствии, сего ради чтущим тя терпение даруй и благодарение Господу в сердцах насади, да не якоже ропотницы оныя, египетских мяс рачителие осудимся, но да уподобимся земли Обетованныя нетленных благ насладитися.
Утверждение нам еси, Богомати, и священное прибежище влающимся прилоги вражиими, Тобою же покрываеми, прощение грехов и дерзновение ко Господу обретаем.
|
|
Песнь 4
Ирмос: Вознесена Тя видевши Церковь на Кресте, солнце праведное, ста в чине своем, достойно взывающи: "Слава силе Твоей Господи."
Припев: Святителю отче Иоанне, моли Бога о нас.
Множества российских архипастырей наставник, зарубежныя же Церкве начинатель, сам сый ревнитель монашеского жития, тя, святе Иоанне, чудом наших дней именова и в подвизех крепкостоятельна.
Припев: Святителю отче Иоанне, моли Бога о нас.
Аще хощете, людие, святаго жива видети, во град Битоль поспешайте, людие, зрите тамо отца Иоанна! Тако сербский именитый архипастырь изрече, нравом же и делы Иоанновыми восхищенный.
Слава Отцу и Сыну и Святому Духу, и ныне и присно и во веки веков. Аминь
Юноши карпаторусстии, сербкой богословии питомцы, о тебе с великим умилением повествоваху, о твоем к себе непощадении и к ним любве, еже како осенял еси их крестным знамением ты, ходя между спящими, покой их соблюдая.
Богородичен: Пресвятая Богородица, спаси нас!
Пречистая Мати Господа нашего и Дево, милующая и грешнейших рабов Своих, яко милосердия сокровищница пребогатая, обнови нас, безмерно обнищавших, всех скорбящих Заступнице и Радосте!
Песнь 5
Ирмос: Ты, Господи, мой, свет в мир пришел еси, Свет Святый, обращаяй из мрачна неведения, верою воспевающыя Тя.
Припев: Святителю отче Иоанне, моли Бога о нас.
Подражатель истинный Христов был еси, святителю, душу полагаяй за паству свою, и предстал еси пастыреначальнику непостыдно.
Припев: Святителю отче Иоанне, моли Бога о нас.
|
|
Исцелений дар дадеся ти еще в пресвитерстве, приумножил еси его во дни святительства и усовершаеши в ином и вечном житии.
Слава Отцу и Сыну и Святому Духу, и ныне и присно и во веки веков. Аминь
Преподобному Науму был еси содейственник во исцелениях, со иконою его святою посещая домы человеков страждущих.
Богородичен: Пресвятая Богородица, спаси нас!
Богородице Дево, вселенной благая Помощнице, Целительнице душ и телес наших, услыши нас и в день сей молящихся Тебе.
Песнь 6
Ирмос: Возопи прообразуя погребение тридневное пророк Иона, в ките моляся: От тли избави мя, Иисусе, Царю сил.
Припев: Святителю отче Иоанне, моли Бога о нас.
Приидите, восхвалим Богородице храм воздвигшаго, самого же всем скорбящим радость и храм Духа Святаго бывшаго.
(Яви тя, Святителю чудне, Владыка Христос Церкве Своея Святыя строителя и учителя, даром утешений же и исцелений облагодатствованна.)
Припев: Святителю отче Иоанне, моли Бога о нас.
Поспешал еси и в домы страждущих и в палаты больничныя к недугующим, о нихже сказа ти Господь, яко Пречистых Таин его преподатель.
Слава Отцу и Сыну и Святому Духу, и ныне и присно и во веки веков. Аминь
Ты болящим младенцем явился еси здравия ходатай, святый Иоанне, скорбь родительских душ пременяя на радость, и всем возрастом ты показался еси вожделенный помощник.
Богородичен: Пресвятая Богородица, спаси нас!
(О Тебе, Богородице Дево, святии всю радостне празднуют, и на Тя уповаем раби Твои мы, многогрешнии, веселися и радуйся, Мати Христа Вседержителя.
Отечества православного лишихомся, Владычице, внегда волны гнева Господня над ним проидоша, зане хранителие суетных и ложных содеяхомся, внегда же скончаватися душам нашим, Господа помянухом, да приидет к нему Тобою наша молитва и пение.
Господи помилуй, Господи помилуй, Господи помилуй
Слава Отцу и Сыну и Святому Духу, и ныне и присно и во веки веков. Аминь
Кондак, глас 4:
Христу пастыреначальнику последовав, во святителех изряднейший явился еси, спасл бо еси овцы своя от губительства безбожных, пристанище мирное тем учредив, и попечение непрестанное о пастве имея, врачевал еси их недуги душевныя же и телесныя, и ныне о нас к твоим честным мощем припадющих, моли Христа Бога, отче Иоанне, в мире спастися душам нашим.
Икос: Небеса ныне с нами радуются и лицы святых приемлют новое и преславное украшение: апостолы проповедника всемiрнаго целуют, мученицы древнии восхваляют дивно прославльшаго память их, святители собеседуют равному в словеси и премудрости, бденному же подвижнику преподобнии дивятся, царие святии дивнаго молитвенника за восстановление царства православнаго почитают, безсребренники с целителем безмездным мзду нетленную и неделимую разделяют, елико всеславно бысть служение твое, отче Иоанне, тако и венцев тебе исплетеся множество, но молися купно с лики святых ко Христу Богу от нас, к честным мощем твоим припадающих, в мире спастися душам нашим.
Песнь 7
Ирмос: В пещи Авраамстии отроцы персидстей, любовию благочестия паче, нежели пламенем опаляеми взываху: "Благословен еси в храме славы Твоея, Господи."
Припев: Святителю отче Иоанне, моли Бога о нас.
Сына света и дне благодать воистину тя содела: на всяк день бо святыми Тайнами укрепляем и обожаем утвердил еси в Господе сердце твое.
(Поспешая ко страждущим, присно душу твою за овцы твоя полагал еси, темже и чудотворений дар тебе дадеся, молитвами бо твоими немощствующии препоясашася силою, и нищии в добродетели от гноища страстей воздвигошася.
Зарею пресветлою людем паствы твоея просиял еси, отче Иоанне, внегда смутитися душам их в годину Божия гнева, но помянул есть Господь и милость Свою и смиренныя тобою утеши.)
Припев: Святителю отче Иоанне, моли Бога о нас.
Милостивым предстательством твоим верныя и неверныя спасахуся и дары благодатныя приимаху, ты же, даруя независтно исцеления, во тьме прелести не оставляеши пребывати заблуждшия, но единого Царя славы учиши православно воспевати во вся веки.
Слава Отцу и Сыну и Святому Духу, и ныне и присно и во веки веков. Аминь
Помощь и утешение изгнанным людем своим дивно сотвори Господь, даровав нам тя заступника, святителю Иоанне, но и ныне покрый нас от враг наших невидимых и из руки всех, ненавидящих нас.
Богородичен: Пресвятая Богородица, спаси нас!
Отцы наши согрешиша и предани быша в руки врагов беззаконных и лукавнейших паче всея земли, что убо сотворим, Владычице, согрешения родительская непрестанно умножающе, и како козней лютых избегнем, аще не ты заступиши кающияся и спасения требующия.
Песнь 8
Ирмос: Руце распростер Даниил, львов зияния в рове затче: огненную же силу угасиша, добродетелию препоясавшеся, благочестия рачители отроцы взывающе: "Благословите вся дела Господня Господа."
Припев: Святителю отче Иоанне, моли Бога о нас.
Сердце твое распространися ко всем, любовию молящимся, Иоанне святителю, поминающим подвиг всего многотрудного жития твоего, безболезненное же и легкое преставление твое, Одигитрии Пречистые верный служителю.
Припев: Святителю отче Иоанне, моли Бога о нас.
Ничтоже возможе препати ти, посещающу в больнице чад твоих, пастырю добрый, ни дождь, ни буря, ни тьма нощная, иногда никомуже зувущу, духом предвидя нужды их, Господу поспешствующу и указующу, да вси прославят Бога Отец наших.
Слава Отцу и Сыну и Святому Духу, и ныне и присно и во веки веков. Аминь
Егда царства православная на земли падоша и забвению предана быша, не престал еси победы просити царем благоверным в древних песнех неизменно, яко тех держава точию благословенна есть от Бога отец наших.
Богородичен: Пресвятая Богородица, спаси нас!
Величит душа моя, Владычице, Господа нашего и радуется дух Твой о Бозе Спасе и Сыне Твоем. И како смели быхом мы воспевати песнь Твою, аще не бы благоволила сама пророчески рещи, яко ублажат мя вси роди.
Песнь 9
Ирмос: Камень нерукосечный от несекомыя горы, Тебе Дево, краеугольный отсечеся, Христос совокупивый разстоящаяся естества, тем веселящеся, тя, Богородице, величаем.
Припев: Святителю отче Иоанне, моли Бога о нас.
Поспешая ко страждущим, присно душу твою за овцы твоея полагал еси, темже и чудотворений дар тебе дадеся, молитвами бо твоими немощствующии препоясашася силою, и нищии добродетелию от гноища страстей воздвигошася.
Припев: Святителю отче Иоанне, моли Бога о нас.
Зарею светлою людем паствы твоея просиял еси, отче Иоанне, внегда смутитися душам их в годину Божия гнева, но помянул есть Господь милость свою и смиренныя утеши тобою.
Слава Отцу и Сыну и Святому Духу, и ныне и присно и во веки веков. Аминь
К царству Божию пути наша направи, послуживый ему преподобием и правдою вся дни живота твоего, настави разум людей твоих ко спасению и просвети во тьме и сени смертней седящия, отче блаженне Иоанне, да радостно поюще совершаем память твою.
Богородичен: Пресвятая Богородица, спаси нас!
Настави ноги наша на путь мирен, Всечистая Владычице, мир истинный к человекам приведшая, Сына Твоего Крестом вражду упразднившаго и древняго супостата победно низложившаго.
Светилен: Аще и умрох плотию, но жив есмь, не скорбите, людие, сице по преставлении твоем возвестил еси, светом таинственным просвещая тя поющия, отче Иоанне, Святителю предивный.
Слава Отцу и Сыну и Святому Духу, и ныне и присно и во веки веков. Аминь
О Тебе, Богородице Дево, святии вси празднующи радуются, и на Тя уповаем мы раби Твои многогрешнии, зовуще: веселися и радуйся, Мати Христа Вседержителя.
Молитва
О святителю чудне Иоанне, толико распространил еси сердце свое, яко нетесно вмещается в нем множество почитающих тя человеков от различных племен и народов.
Призри на убожество словес наших, обаче от любве к тебе приносимое и помози нам, угодниче Божий, поне отныне очищати себе от всякия скверны плоти и духа, работая Господу со страхом и радуяся Ему с трепетом.
И что воздамы тебе за радость оную, юже ощутихом, зря в храме святем мощи твоя святыя и прославляюще память твою.
Воистину, не имамы чим воздати, точию: аще начнем себе исправляти, бывая новыми вместо ветхих.
Сея благодати обновления буди нам ходатай, о святе Иоанне, преставленный от сего временного во иное житие вечное, в неже настави тя Пречистая Владычица, Одигитрия зарубежия и рассеяния русского, чудотворною Своею иконою Коренно- Курскою, Ея же спутник ты явился еси в день преставления своего, о Ней же радуешися ныне в лице святых, славящих единаго в Троице славимаго Бога, Отца и Сына, и Святаго Духа ныне и присно и во веки веков. Аминь.
Молитва иная
О, святителю отче наш Иоанне, Пастырю добрый и тайновидец душ человеческих. Ныне у Престола Божия за нас молишися, яко же и сам посмертне изрек: «Хотя я и умер — но я жив». Умоли Всещедраго Бога прощение нам во гресех даровати, да смело воспрянем духом и уныние сего мира отряхнем и Богу возопиим о даровании нам смирения и Богодухновения, Богосознания и духа благочестия на всяких путях жизни нашея. Яко милостивый сиропитатель и опытный путеводитель на земле бывший, ныне буди нам вождем Моисеовым и в смутах церковных всеобъемлющее Христово вразумление. Услыши стенание смущенных юношей нашего лихолетия, обуреваемых беснованием вселукавым и отряхни лень уныния изнемогающих пастырей от натисков духа мира сего и томящихся в оцепенении праздном. Да слезно вопием ти, о теплый молитвенниче, посети нас сирых, во тьме страстей утопающих, ждущих твоего отеческаго наставления, да озаримся светом невечерним, идеже ты пребываеши и молишися за чад твоих, по лицу вселенныя рассеянных, но любовию слабою к свету все же тянущихся, идеже свет Христос Господь наш пребывает, Ему же честь и держава ныне и присно и во веки веков. Аминь.