Ирмос: Грядите, людие, / поим песнь Христу Богу, / раздельшему море и наставльшему люди, / яже изведе из работы египетския, / яко прославися.
Припе́в: Святая преподобному́ченица Евдокия моли́ Бо́га о нас.
Д уше́вное озлобле́ние услади́ти ми́, Благи́й, благоизво́ли страстоно́сицы Твоея́ Евдоки́и мольба́ми, и сию́ воспе́ти, Сло́ве, пода́ждь ми́.
Припе́в: Святая преподобному́ченица Евдокия моли́ Бо́га о нас.
К то́ Твою́, Христе́, благосе́рдия пучи́ну я́ве испове́сть? я́ко спасе́ния соде́ла приста́нище, дре́вле прегреше́ний глубину́ су́щую.
Припе́в: Святая преподобному́ченица Евдокия моли́ Бо́га о нас.
Я коже земля́ блага́я, твоя́ душа́, пресла́вная, до́ждь прия́т уче́ния Ге́рмана преподо́бнаго, и кла́с благоче́стия пло́д принесе́.
Припе́в: Святая преподобному́ченица Евдокия моли́ Бо́га о нас.
М ы́сленный у́гль в се́рдцы — Христа́ — прие́мши, всечестна́я, креще́нием, я́коже хвра́стие, ле́сть и плотски́я стра́сти вои́стинну попали́ла еси́.
Припев: Пресвята́я Богоро́дице, спаси́ нас.
Б огоподо́бное селе́ние вои́стинну Ты́ яви́лася еси́, небе́с простра́ннейши и честне́йши, Богоро́дице Де́во, и ны́не о Тебе́ ра́дуется Ангельский ли́к.
Кано́н ХРА́МА на 4
Песнь 3
Кано́н минеи,прмц Евдокии глас 2:
Ирмос: Утверди нас в Тебе, Господи, / Древом умерщвлей грех, / и страх Твой всади / в сердца нас, поющих Тя.
Припе́в: Святая преподобному́ченица Евдокия моли́ Бо́га о нас.
У твержде́ние, Христе́, и сте́ну необори́му в пе́рсех преподо́бная Твоя́ стяжа́вши, прило́ги не поколеба́ся врага́, но сего́ до конца́ потреби́.(дважды)
|
|
Припе́в: Святая преподобному́ченица Евдокия моли́ Бо́га о нас.
В озжела́вши Христо́вы красоты́ и Сего́ любо́вию снеда́ема, страда́нием сочта́лася еси́ Ему́, Евдоки́е богому́драя и всесла́вная.
Припе́в: Святая преподобному́ченица Евдокия моли́ Бо́га о нас.
К реще́нием Христо́вым, и слеза́ми твои́ми, и по се́м кровьми́ муче́ния очи́стившися, хра́м была́ еси́ Тро́ице и ме́сто свяще́ния.
Припев: Пресвята́я Богоро́дице, спаси́ нас.
Богоро́дичен: О т Анны ра́дость ро́ду процвела́ еси́ и ражда́еши, Де́во, Царя́, и сра́дуются рождеству́ Твоему́ жены́, разре́шшеся Тобо́ю от кля́твы.
Кано́н ХРА́МА на 4
Ирмо́с: Небе́снаго кру́га Верхотво́рче Го́споди, / и Це́ркве Зижди́телю, / Ты́ мене́ утверди́ в любви́ Твое́й, / жела́ний кра́ю, ве́рных утвержде́ние, // Еди́не Человеколю́бче.
Ектения́ ма́лая:
Диакон: П а́ки и па́ки ми́ром Го́споду помо́лимся.
Хор: Г о́споди, поми́луй.
З аступи́, спаси́, поми́луй и сохрани́ нас, Бо́же, Твое́ю благода́тию.
Хор: Г о́споди, поми́луй.
Диакон: П ресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
|
|
Хор: Т ебе́, Го́споди.
Иерей: Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор: А ми́нь.
Конда́к, прмц Евдокии гла́с 4:
Во страда́нии твое́м до́бре подвиза́вшися, и по сме́рти на́с освяща́еши чуде́с излия́нии, всехва́льная, ве́рою прибега́ющия в Боже́ственную це́рковь твою́, и, торжеству́юще, мо́лим тя́, преподо́бная му́ченице Евдоки́е: да изба́вимся неду́г душе́вных и чуде́с благода́ть почерпе́м.
Икос прмц Евдокии:
Страстоте́рпческая це́рковь поро́да яви́ся, среде́ стяжа́вши са́д безсме́ртия, те́ло сея́ честно́е, и́же сего́ объе́млющии плоды́ ве́твьми кре́пко освяща́ются, зря́ще же, удивля́ются, ка́ко вои́стинну ме́ртво те́ло источа́ет исцеле́ния, вразумля́я вся́? Те́м со тща́нием прииди́те, ны́не вси́ со мно́ю, смире́нным, и, очи́щше скве́рну, чуде́с благода́ть почерпе́м.
Седа́лен, прмц Евдокии гла́с 8. Подо́бен: Прему́дрости.
Просве́щшися заре́ю Боже́ственною, преле́стную оста́вила еси́ тму́ и житие́ восприя́ла еси́ с пло́тию невеще́ственное, благода́тьми Боже́ственными испо́лнившися Ду́ха, ма́лым провеща́нием ме́ртвыя воскреси́ла еси́. Те́м при кончи́не муче́ния венце́м боже́ственне украси́лася еси́ и льсти́ваго посрами́ла еси́, Евдоки́е равноа́нгельная, моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.
|
|
Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.
Богоро́дичен:
Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии, о́гнь бо всели́ся в Тя́ Божества́, и я́ко младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.
Песнь 4
Кано́н минеи,прмц Евдокии глас 2:
Ирмос: Услышах, Господи, / слух Твоего смотрения / и прославих Тя, / Едине Человеколюбче.
Припе́в: Святая преподобному́ченица Евдокия моли́ Бо́га о нас.
Б езбо́жия пучи́ну реко́ю боже́ственных твои́х крове́й, Евдоки́е сла́вная, изсуши́ла еси́.(дважды)
Припе́в: Святая преподобному́ченица Евдокия моли́ Бо́га о нас.
Я же пе́рвее уловля́ющая блу́дными безу́мныя мре́жами, ны́не к Ца́рству Бо́жию уловля́ет ве́рныя.
Припе́в: Святая преподобному́ченица Евдокия моли́ Бо́га о нас.
Е же без пра́вды со́браное тебе́ бога́тство тле́нное расточи́вши пра́ведно, нетле́ния бога́тство насле́довала еси́.
Припев: Пресвята́я Богоро́дице, спаси́ нас.
Богоро́дичен: С ве́т возсия́л еси́, Го́споди, и́же в нощи́ и тме́ прегреше́ния, от Чи́стыя Де́вы воплоща́емь.
Кано́н ХРА́МА на 4
Песнь 5
Кано́н минеи,прмц Евдокии глас 2:
Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припе́в: Святая преподобному́ченица Евдокия моли́ Бо́га о нас.
С ве́т Невече́рний, озари́в вои́стинну сла́вную, от стра́стныя изъя́т мглы́ и, к безстра́стия пути́ наве́д, всесве́тлу показа́.(дважды)
Припе́в: Святая преподобному́ченица Евдокия моли́ Бо́га о нас.
Ц аря́ Бо́га, я́коже вневе́стившися Сы́ну, возста́вила еси́ честны́м Его́ призыва́нием уме́ршаго лю́те царе́ва сы́на, пресла́вная.
Припе́в: Святая преподобному́ченица Евдокия моли́ Бо́га о нас.
М у́жеским по́мыслом на суди́щи Христа́, сла́вная, испове́дуеши, Бо́га воплоще́нна, и, мече́м во главу́ усе́чена, лику́еши с му́ченики.
Припев: Пресвята́я Богоро́дице, спаси́ нас.
Богоро́дичен: Я коже наде́жду Твое́ предста́тельство ве́рнии иму́ще и беда́ми го́рьких боле́зней окруже́ни, к Тебе́ усе́рдно, Де́во, прибега́ем, Влады́чице.
Кано́н ХРА́МА на 4
Песнь 6
Кано́н минеи,прмц Евдокии глас 2:
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Припе́в: Святая преподобному́ченица Евдокия моли́ Бо́га о нас.
Я ко тепла́ ре́вность ве́ры твоея́, му́ченице Евдоки́е, е́юже попра́ла еси́ неве́рных настоя́ние и побе́ду пожа́ла еси́ страда́ния.(дважды)
Припе́в: Святая преподобному́ченица Евдокия моли́ Бо́га о нас.
С ле́зныя то́ки совоку́пльши муче́ния ка́плям кро́ве твоея́, еди́ну от обою́ ча́шу спасе́ния соверши́ла еси́.
Припе́в: Святая преподобному́ченица Евдокия моли́ Бо́га о нас.
Я же пре́жде смра́да испо́лнена, мно́жеством нечистоты́ су́щи, ны́не благово́ния испо́лнися и с деви́ческими ли́ки весели́тся.
Припев: Пресвята́я Богоро́дице, спаси́ нас.
Богоро́дичен: Я же ми́ра ра́дость, Богоро́дице Чи́стая, ра́дуйся, Тебе́ зову́щих со Ангелом ве́рно Твоея́ ра́дости сподо́би и печа́ль на́шу разори́.
Канон триоди
Припе́в: Святи́и му́ченицы,/ моли́те Бо́га о нас.
Святи́и мно́жайшими му́ками, / мно́гия враго́в тьмы низложи́ти сподо́бишася Спа́се, / и мно́гих благ Твои́х улучи́ша: / моли́твами их я́ко Благ, / мно́гая моя́ очи́сти прегреше́ния.
Припе́в: Святи́и му́ченицы,/ моли́те Бо́га о нас.
Воспои ́м Христо́вы страстоте́рпцы, / и возопии́м к ним единому́дренно: / Влады́чним подо́бницы страсте́м, / душ на́ших стра́сти исцели́те, / пости́тися же от зла́го обы́чая / нас укрепи́те.
Припе́в: Святи́и му́ченицы,/ моли́те Бо́га о нас.
Преложи́л еси́ смерть на сон, / боле́зненно во гро́бе поспа́л еси́, / и ме́ртвым живо́т дарова́л еси́: / преста́вльшияся у́бо Спа́се сподо́би стоя́ния избра́нных, / страстоте́рпец святы́х мольба́ми.
Припев: Пресвята́я Богоро́дице, спаси́ нас.
Богородичен: Пости́тися ми, и отступи́ти от вся́каго греха́ / укрепи́ Отрокови́це, / си́льнаго и безгре́шнаго Сло́ва, воплоще́нна неизре́ченно ро́ждшая, / и даждь ми чисти́тельную оскверне́ний, / Всенепоро́чная, сле́зу.
Иный канон триодигосподина Феодора, глас 3.Ирмос: Глубина́ страсте́й:
Припе́в: Святи́и му́ченицы,/ моли́те Бо́га о нас.
Му́чеников па́мять соверша́ем боже́ственно / мучениколю́бцы, прииди́те возра́дуемся, / пе́сньми ты́я венча́юще, / подвигополо́жника Христа́ благослови́м.
Припе́в: Святи́и му́ченицы,/ моли́те Бо́га о нас.
Ран пе́рвее и́скус прие́мше, / пото́м же ка́мением побие́ни бы́вше, претре́ни бы́вше, / звере́м на снедь да́ни бы́сте, / и закла́ни бы́сте я́ко а́гнцы Христо́вы, / но живе́те при́сно страстоте́рпцы.
Сла́ва Отцу́ и Сы́ну и Свято́му Ду́ху.
Троичен: Три еди́ным Естество́м совокупля́я, / еди́но же треми́ разсека́я Ли́цы, я́же Божество́ есть, / Саве́ллиа же и А́риа, / равноме́рныя стремни́ны отбега́ю.
И ны́не и при́сно и во ве́ки веко́в, ами́нь.
Де́ва яви́лася еси́ и по рождестве́, / чисто́тствуеши во обою́, и ражда́еши: / странноле́пное виде́ние, глаго́лемое и разумева́емое, / соде́янное в Тебе́ Богома́ти.
Сла́ва Тебе́, Бо́же наш, сла́ва Тебе́.
Мученичен: Кровь ва́шего терпе́ния, / Го́споду мо́лится непреста́нно о нас, му́ченицы, / те́мже и ны́не помоли́теся / пости́тися нам от страсте́й безче́стия.
Стих: Ду́ши их во благи́х водворя́тся.
Покоин: Всему́ хотя́й суди́ти ми́ру, / предстоя́щим тьмам а́нгелов, / неосужде́нно тогда́ предста́ти Тебе́ сподо́би усо́пшия, / ве́рно, Всеще́дрый.
Ирмос: Глубина́ страсте́й воста́ на мя, / и бу́ря проти́вных ве́тров, / но предвари́в мя Ты спаси́ Спа́се, / и изба́ви от тли, / я́ко спасл еси́ от зве́ря проро́ка.
Ектения́ ма́лая заупоко́йная:
Диа́кон: П а́ки и па́ки ми́ром Го́споду помо́лимся.
Хор: Г о́споди, поми́луй.
Диа́кон:Е ще́ мо́лимся о упокое́нии душ усо́пших рабо́в Бо́жиих пра́отец, оте́ц, и бра́тий на́ших, зде лежа́щих, и повсю́ду правосла́вных христиа́н, и о е́же прости́тися им вся́кому прегреше́нию во́льному же и нево́льному.
Хор: Г о́споди, поми́луй.
Диа́кон: Я́ ко да Госпо́дь Бог учини́т ду́ши их, иде́же пра́веднии упокоя́ются.
Хор: Г о́споди, поми́луй.
Диа́кон:М и́лости Бо́жия, Ца́рства Небе́снаго и оставле́ния грехо́в их, у Христа́, безсме́ртнаго Царя́ и Бо́га на́шего, про́сим.
Хор: П ода́й, Го́споди.
Диакон: Г о́споду помо́лимся.
Хор: Г о́споди, поми́луй. (40 раз)
Иерей: Бо́же духо́в и вся́кия пло́ти, сме́рть попра́вый и диа́вола упраздни́вый, и живо́т миру Твоему́ дарова́вый: Сам, Го́споди, упоко́й ду́ши усо́пших раб Твои́х: пра́отец, оте́ц, и бра́тий наших, зде лежа́щих, и повсю́ду правосла́вных христиа́н, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние. Вся́кое согреше́ние, соде́янное и́ми сло́вом, или́ де́лом, или́ помышле́нием, я́ко благи́й человеколю́бец Бог, прости́, я́ко несть челове́к, и́же жив бу́дет и не согреши́т. Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.
Возглас: Я́ко Ты еси́ воскресе́ние и живо́т, и поко́й усо́пших раб Твои́х: пра́отец, оте́ц, и бра́тий наших, зде лежа́щих, и повсю́ду правосла́вных христиа́н, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.
Хор: А ми́нь.
Кондак, глас 8:
Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.
Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши, / а́може вси челове́цы по́йдем, / надгро́бное рыда́ние, творя́ще песнь: / аллилу́иа.
Песнь 7
Кано́н минеи,прмц Евдокии глас 2:
Ирмо́с: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.
Припе́в: Святая преподобному́ченица Евдокия моли́ Бо́га о нас.
И же дре́вле уловля́яй, одожде́нии зло́бными всю́ объе́мь тя́, вра́г льсте́ц, попира́емь твои́ми нога́ми, вельми́ зва́ше: увы́ мне́, победи́хся, — глаго́ля, — Евдоки́е прехва́льная, твои́м непрело́жным к Бо́гу присвое́нием, чи́стая.(дважды)
Припе́в: Святая преподобному́ченица Евдокия моли́ Бо́га о нас.
В оздержа́нием мно́гим мудрова́ния твоея́ пло́ти умертви́вши, ме́ртвым подава́еши воскресе́ние к Бо́гу дерзнове́нием твои́м и к Нему́ несомне́нною, Евдоки́е, мольбо́ю твое́ю: и́бо во́лю твори́т боя́щихся Его́.
Припе́в: Святая преподобному́ченица Евдокия моли́ Бо́га о нас.
С тра́сти Христо́вы, я́коже украше́ние боголе́пно, на вы́и твоея́ души́ нося́щи, сего́ привлекла́ еси́ нетле́ния жела́нием, отону́дуже тя́ обручи́ неве́сту, непоро́чно зову́щую: благослове́н Бо́г оте́ц на́ших.
Припев: Пресвята́я Богоро́дице, спаси́ нас.
Богоро́дичен: П е́рвее Гедео́н, провозвеща́я Твое́, Чи́стая, Боже́ственное рождество́ я́ве, окри́н но́сит, по́лн воды́, ю́же от руна́ оцеди́: все́ бо в Тя́ Божество́ всели́ся, Пречи́стая, благослове́н Пло́д чре́ва Твоего́.
Канон триоди
Припе́в: Святи́и му́ченицы,/ моли́те Бо́га о нас.
Ту́чами крове́й угаси́сте / пресла́внии пла́мень пре́лести: / огня́ у́бо бу́дущаго нас / моли́твами я́же ко Христу́ изба́вите, / Госпо́дни страстоте́рпцы.
Припе́в: Святи́и му́ченицы,/ моли́те Бо́га о нас.
Уста́ загради́вше львов, / мук же опале́ния претерпе́вше страстоте́рпцы, / сла́дость лу́чшую насле́довасте, / ея́же улучи́ти моли́теся, / и нам во ве́ки.
Всем све́том просвети́вшеся Ду́ха / до́блии страстоте́рпцы, / преста́вльшимся ве́рным осла́бу проси́те, / и рая́ вход, и жи́зни прича́стие.
Припев: Пресвята́я Богоро́дице, спаси́ нас.
Богородичен: Песнь приношу́ Ти, Де́во, / не пре́зри мене́ злы́ми одержи́маго, / но даждь Чи́стая исправле́ние соверше́нное посто́м, / и всем житие́м благонра́вным.
Иный Канон триоди. Ирмос: Пла́мень ороси́вый пе́щный:
Припе́в: Святи́и му́ченицы,/ моли́те Бо́га о нас.
Огнь, и меч, и зве́ри, страстоте́рпцы, / я́ко сла́дость вмени́вше, внегда́ страда́ти / удиви́сте уби́йцы ва́ша, / воспева́юще Бо́га оте́ц на́ших.
Припе́в: Святи́и му́ченицы,/ моли́те Бо́га о нас.
На у́ды разсека́еми, и опаля́еми, / Бо́гу принесо́стеся же́ртва благово́нная, Христо́вы му́ченицы, / но Того́ о нас при́сно моли́те.
Сла́ва Отцу́ и Сы́ну и Свято́му Ду́ху.
Троичен: В Тро́ице еди́наго Бо́га сла́влю, / Отца́, Сы́на и Ду́ха, / Еди́ницу про́стую, Тро́ицу честну́ю, / нача́ло преднача́льное и единосу́щное.
И ны́не и при́сно и во ве́ки веко́в, ами́нь.
Всесвята́я Влады́чице Богоро́дице, / моли́твы рабо́в Твои́х прие́млющи, / принеси́ всех Бо́гу, / да спасе́т нас от вся́каго искуше́ния.
Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.
Мученичен: Му́чеников собо́ри, с небесе́ предста́вше, / вас воспева́ющия благослови́те, освяти́те, / усе́рдно посто́в вре́мя сконча́ти.
Стих: Блаже́ни, я́же избра́л, и прия́л еси́ Го́споди.
Мертвен: Ве́рою к Тебе́ преста́вльшияся, / ве́дый дела́ челове́ков, / во́льная и нево́льная прегреше́ния проща́я, / упоко́й, я́ко Бог.
Ирмос: Пла́мень ороси́вый пе́щный / и о́троки неопали́мы спасы́й, / благослове́н еси́ во ве́ки, / Го́споди Бо́же оте́ц на́ших.
Песнь 8
Кано́н минеи,прмц Евдокии глас 2:
Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Припе́в: Святая преподобному́ченица Евдокия моли́ Бо́га о нас.
Я коже прише́дши умо́м ко и́стинному Рачи́телю, удо́бь терпи́ши плотски́я я́звы и огня́ го́рькую боле́знь, му́ченице всесла́вная, благословя́щи Христа́ во ве́ки вся́.(дважды)
Припе́в: Святая преподобному́ченица Евдокия моли́ Бо́га о нас.
Т револне́ния бе́д сокруши́ла еси́ кре́стным я́дрилом и душе́вное корми́ло в Ца́рствия Бо́жия приста́нища спасла́ еси́, сла́вная, благословя́щи Христа́ во ве́ки.
Припе́в: Святая преподобному́ченица Евдокия моли́ Бо́га о нас.
Б езобра́зия страсте́й совлекла́ся еси́ и ду́шу обложи́ла еси́ кра́сною оде́ждею безстра́стия, те́мже Христо́с, тя́ неве́сту обручи́в, в небе́сныя всели́ хра́мы.
Припев: Пресвята́я Богоро́дице, спаси́ нас.
Богоро́дичен: С вобожда́ется Тобо́ю пра́баба, Богоро́дице, осужде́ния, и се́ ны́не жены́ стра́ждут за Христа́, и ра́дуется естество́ же́нское, я́коже первому́ченица вопие́т, де́ва Фе́кла.
Канон триоди
Припе́в: Святи́и му́ченицы,/ моли́те Бо́га о нас.
Мук ви́ды не́мощию те́ла претерпе́вше, / вра́чеве боля́щим страстоте́рпцы яви́стеся. / Те́мже зову́: / мою́ неду́гующую ду́шу исцели́те, / во вре́мя поста́ покая́нием.
Припе́в: Святи́и му́ченицы,/ моли́те Бо́га о нас.
Увы́ мне, ка́ко преидо́ша вси дни́е мои́ в ле́ности! / и се коне́ц приближа́ется, / вари́т несоверше́нна до́брыми де́лы прия́ти мя, / до́бре сконча́вшии тече́ние му́ченицы, / да ми коне́ц благи́й бу́дет, моли́теся.
Припе́в: Святи́и му́ченицы,/ моли́те Бо́га о нас.
Ка́плями крове́й запале́ния безбо́жия угаси́сте, / боже́ственнии страстоте́рпцы, / и отше́дшим от сего́ жития́ испроси́те вои́стинну Боже́ственный поко́й, / и соде́янных разреше́ние во ве́ки.
Припев: Пресвята́я Богоро́дице, спаси́ нас.
Иезеки́иль Тя дверь непроходи́мую, Чи́стая, прови́де, / покая́ния врата́ всем отверза́ющую отча́янным. / Те́мже молю́ Тя: стези́ мне отве́рзи, / ко о́ным веду́щия упокое́нием.
Иный Канон триоди Ирмос: Из безнача́льна Отца́:
Припе́в: Святи́и му́ченицы,/ моли́те Бо́га о нас.
Многострада́льныя ра́ны разли́чно претерпе́вше, / о́вии у́бо сгоре́вше, друзи́и сожже́ни бы́вше, / ини́и же посека́еми, / веселите́ся страда́льцы воспева́юще Христу́, / по́йте, благослови́те и превозноси́те во вся ве́ки.
Припе́в: Святи́и му́ченицы,/ моли́те Бо́га о нас.
Кровьми́ ва́шими освяща́ете концы́, / ма́лыми кропле́ньми, струи́ исцеле́ний всем источа́юще, всехва́льнии му́ченицы. / Те́мже вопиете́ при́сно: по́йте, благослови́те и превозноси́те во вся ве́ки.
Благослови́м Отца́ и Сы́на и Свята́го Ду́ха, Го́спода.
Триипоста́сная Еди́нице, О́тче, Сы́не и Ду́ше Живы́й, / еди́но Божество́, еди́но Ца́рство: / Тебе́ хва́лят незаходи́маго Све́та а́нгельская во́инства, / и мы, су́щии на земли́, пое́м, благослови́м и превозно́сим во вся ве́ки.
И ны́не и при́сно и во ве́ки веко́в, ами́нь.
Се вси ро́ди блажи́м Тя, Пречи́стая, / вели́чия Твоя́ зря́ще. / Ты бо ражда́еши преесте́ственно всех Творца́, / Бо́га су́ща и Челове́ка. / Те́мже Тя благослови́м, / и превозно́сим во вся ве́ки.
Стих: Ди́вен Бог во святы́х Свои́х, Бог Изра́илев.
Страстоте́рпцев ли́че, / моли́теся ко Спа́су спасти́ ны, / моли́твы и ны́не творя́ще, / служи́ти чи́сте воздержа́нием Ему́, / по́йте, благослови́те и превозноси́те во вся ве́ки.
Стих: Ду́ши их во благи́х водворя́тся.
Усо́пшия благоче́стно наде́ждею воскресе́ния, / к ве́чной жи́зни воста́ти, Го́споди, сподо́би, / хвали́ти Тя чи́сте, и сла́вити псало́мски, / по́йте, благослови́те, и превозноси́те во вся ве́ки.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Ирмос: Из безнача́льнаго Отца́ рожде́ннаго пре́жде век Бо́га, / и в после́дняя от Богоро́дицы в плоть обле́кшася, / я́ко соверше́нна Челове́ка и Бо́га и́стинна, / по́йте, благослови́те и превозноси́те во вся ве́ки.
Диакон: Б огоро́дицу и Ма́терь Све́та в пе́снех возвели́чим.
Песнь Пресвято́й Богоро́дицы:
Хор: В ели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.
Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.
Я́ ко призре́ на смире́ние рабы́ Своея́,/ се бо от ны́не ублажа́т Мя вси ро́ди.
Честне́йшую...
Я́ ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.
Честне́йшую...
С отвори́ держа́ву мы́шцею Свое́ю,/ расточи́ го́рдыя мы́слию се́рдца их.
Честне́йшую...
Н изложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.
Честне́йшую...
В осприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.
Честне́йшую...
Песнь 9
Кано́н минеи,прмц Евдокии глас 2:
Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.
Припе́в: Святая преподобному́ченица Евдокия моли́ Бо́га о нас.
Л ица́ твоего́ зре́ние духо́вною заре́ю, я́коже со́лнце, возсия́вши, чи́стая, стра́нно показа́шеся виде́ние зря́щим неве́рным, и́бо, я́коже возлюби́вши Христа́, от Него́ просла́вилася еси́ досто́йно, всечестна́я.
Припе́в: Святая преподобному́ченица Евдокия моли́ Бо́га о нас.
Д уши́ твоея́ свещу́ вже́гши, му́ченице, еле́ем крове́й твои́х све́тло, ра́дующися, ны́не возшла́ еси́ в Боже́ственный неве́стник Христо́в с му́дрыми де́вами, с ни́миже помина́й все́х, ве́рою хва́лящих тя́.
Припе́в: Святая преподобному́ченица Евдокия моли́ Бо́га о нас.
О т терно́вныя пре́лести, я́ко шипо́к, богому́драя, сладкоуха́нен, израсла́ еси́ кра́сно, и ве́рных облагово́нила еси́ ду́ши, Евдоки́е, неве́рных же отрази́ла еси́ тве́рдо смра́д преле́стный, те́мже тя́ блажи́м.
Припе́в: Святая преподобному́ченица Евдокия моли́ Бо́га о нас.
С оверша́ющих любо́вию моле́бную па́мять твою́, к Бо́гу и Изба́вителю, му́ченице чи́стая, моли́твами от вся́ких бе́д спаси́ и мою́ душе́вную скве́рну, и́же ху́до тя́ воспе́вшаго, отмы́й.
Припев: Пресвята́я Богоро́дице, спаси́ нас.
Богоро́дичен: О на́с моля́щи Сы́на Твоего́ не преста́й, Де́во, Человеколю́бца Бо́га, Тя́ бо наде́жду стяжа́хом и Твои́м предста́тельством избавля́емся бе́д, и страсте́й, и прегреше́ний, и боле́зней, ве́рою Тя́ сла́вящии.
Канон триоди
Припе́в: Святи́и му́ченицы,/ моли́те Бо́га о нас.
Яви́стеся боже́ственнии, я́ко у́глие, / вещество́ лука́вое безбо́жие попали́вше, / и мече́м бесо́вския полки́ посе́кше, / до́блии страстоте́рпцы, / светово́дцы серде́ц на́ших.
Припе́в: Святи́и му́ченицы,/ моли́те Бо́га о нас.
Тьму муче́ний проидо́сте,/и ксве́ту мы́сленному пресели́стеся,/ до́блии страстоте́рпцы,/ те́мже просвети́те смире́нную ду́шу мою́, / омраче́нную согреше́ньми.
Припе́в: Святи́и му́ченицы,/ моли́те Бо́га о нас.
Поболе́ша боле́зни пренося́ще / пресла́внии страстоте́рпцы телесе́, / и ны́не преста́вльшимся ве́рным, / неболе́зненный поко́й про́сят, / и рая́ наслажде́ние.
Припев: Пресвята́я Богоро́дице, спаси́ нас.
Яви́ся Чи́стая Влады́чице Боже́ственная помо́щница, / непотре́бным рабо́м Твои́м, / во вре́мя воздержа́ния, моли́твы на́ша принося́щи Го́сподеви, / ве́ки ца́рствующему.
Иный Канон триоди. Ирмос: Тебе́ безсме́ртный исто́чник:
Припе́в: Святи́и му́ченицы,/ моли́те Бо́га о нас.
Я́коже огнь вложе́ни бы́вше от Бо́га в зе́млю, / попали́сте вся́кую лесть и́дольскую, / вже́гше свети́ло в концы́ благоче́стия / страстоте́рпцы Христо́вы.
Припе́в: Святи́и му́ченицы,/ моли́те Бо́га о нас.
Вас ни пла́мень, ни заколе́ние, / ни коле́са, ни стягну́тия, ни опале́ния, / ни ина́я му́ка го́рькая, / разлучи́ от любви́ Христо́вы, страстоте́рпцы.
Сла́ва Отцу́ и Сы́ну и Свято́му Ду́ху.
Троичен: Еди́но и три воспева́ю благоче́стно / Божество́ зра́ком, Ли́цы совокупля́я и разделя́я, / Оте́ц, Сын и Святы́й Дух, / Сия́ еди́но суть.
И ны́не и при́сно и во ве́ки веко́в, ами́нь.
Богородичен: Тя от ко́рене Иессе́ова, / и Дави́да пра́отца прозя́бшии жезл, / Всепречи́стая Чи́стая велича́ем, / я́ко спаса́еши ду́ши на́ша.
Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.
Мно́жество му́ченик честно́е, Христа́ моли́те, / в ми́ре исполня́ющим нам тече́ние посто́в, / ви́дети и поклони́тися и страсте́м Его́.
Стих: Блаже́ни, я́же избра́л, и прия́л еси́ Го́споди.
Ме́ртвых и живы́х, я́ко Бог, / умертви́вый смерть / и жизнь воста́нием Твои́м всем подая́й, Христе́, / упоко́й и рабы́ Твоя́, я́же преста́вил еси́.
Ирмос: Тебе́ безсме́ртный исто́чник, / и святы́х исцеле́ния челове́чу ро́ду подаю́ща, / при́сно велича́ем, / я́ко спаса́еши ду́ши на́ша.
Досто́йно есть:
Д осто́йно есть я́ко вои́стинну/ блажи́ти Тя, Богоро́дицу,/ Присноблаже́нную и Пренепоро́чную/ и Ма́терь Бо́га на́шего./ Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,// су́щую Богоро́дицу, Тя велича́ем.
Ектения́ ма́лая:
Диакон: П а́ки и па́ки ми́ром Го́споду помо́лимся.
Хор: Г о́споди, поми́луй.
Диакон: З аступи́, спаси́, поми́луй и сохрани́ нас, Бо́же, Твое́ю благода́тию.
Хор: Г о́споди, поми́луй.
Диакон: П ресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.
Хор: Т ебе́, Го́споди.
Иерей: Я́ко Тя хва́лят вся си́лы небе́сныя, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.
Хор: А ми́нь.
Светилен Глас 5:
Светода́вче Го́споди, низпосли́ све́т тво́й, и просвети́ се́рдце мое́, предста́тельствы безпло́тных твои́х, и спаси́ мя.Молитвами, Господи, святых Твоих, и спаси мя
Сла́ва Отцу́ и Сы́ну и Свято́му Ду́ху И ны́не и при́сно и во ве́ки веко́в, ами́нь.
Светода́вче Го́споди, низпосли́ све́т тво́й, и просвети́ се́рдце мое́, предста́тельствы безпло́тных твои́х, и спаси́ мя. Молитвами, Господи, Богородицы, и спаси мя
Хвали́тны псалмы́, глас 5:
Хор: В ся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.
Х вали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.
И продолжать чтение псалма со слов: ЧТЕЦ
Х вали́те Его́, со́лнце и луна́, хвали́те Его́, вся зве́зды и свет. Хвали́те Его́ Небеса́ небе́с и вода́, я́же превы́ше небе́с. Да восхва́лят и́мя Госпо́дне: я́ко Той рече́, и бы́ша, Той повеле́, и созда́шася. Поста́ви я́ в век и в век ве́ка, повеле́ние положи́, и не ми́мо и́дет. Хвали́те Го́спода от земли́, зми́еве и вся бе́здны: огнь, град, снег, го́лоть, дух бу́рен, творя́щая сло́во Его́, го́ры и вси хо́лми, древа́ плодоно́сна и вси ке́дри, зве́рие и вси ско́ти, га́ди и пти́цы перна́ты. Ца́рие зе́мстии и вси лю́дие, кня́зи и вси судии́ зе́мстии, ю́ноши и де́вы, ста́рцы с ю́нотами да восхва́лят и́мя Госпо́дне, я́ко вознесе́ся и́мя Того́ Еди́наго, испове́дание Его́ на земли́ и на небеси́. И вознесе́т рог люде́й Свои́х, песнь всем преподо́бным Его́, сыново́м Изра́илевым, лю́дем, приближа́ющымся Ему́.
Псалом 149:
В оспо́йте Го́сподеви песнь но́ву, хвале́ние Его́ в це́ркви преподо́бных. Да возвесели́тся Изра́иль о Сотво́ршем eго́, и сы́нове Сио́ни возра́дуются о Царе́ свое́м. Да восхва́лят и́мя Его́ в ли́це, в тимпа́не и псалти́ри да пою́т Ему́. Я́ко благоволи́т Госпо́дь в лю́дех Свои́х, и вознесе́т кро́ткия во спасе́ние. Восхва́лятся преподо́бнии во сла́ве и возра́дуются на ло́жах свои́х. Возноше́ния Бо́жия в горта́ни их, и мечи́ обою́ду остры́ в рука́х их: сотвори́ти отмще́ние во язы́цех, обличе́ния в лю́дех, связа́ти цари́ их пу́ты, и сла́вныя их ручны́ми око́вы желе́зными.
С отвори́ти в них суд напи́сан./ Сла́ва сия́ бу́дет всем преподо́бным Его́.
Псало́м 150:
Х вали́те Бо́га во святы́х Его́,/ хвали́те Его́ во утверже́нии си́лы Его́.
стихиры Октоиха (мученичны), глас 5-й
Стих:Хвали́те Его́ на си́лах Его́,/ хвали́те Его́ по мно́жеству вели́чествия Его́.
Благослове́но во́инство Небе́снаго Царя́: / а́ще бо и земноро́дни бе́ша страстоте́рпцы, / но Ангельский са́н тща́хуся дости́гнути, / о телесе́х неради́вше, / и страсте́й ра́ди Безпло́тных сподо́бишася че́сти. / Те́мже моли́твами и́х Го́споди, // спаси́ ду́ши на́ша.