Повесть о житии царя Федора Ивановича

ВСТУПЛЕНИЕ

«Повесть» написана в царствование Бориса Годунова, то есть между 1598 и 1605 гг. Автор «Повести» Иов в молодости принял постриг в Старице, в Успенском монастыре, где около 1569 г. стал архимандритом. Впоследствии настоятельствовал в столичных монастырях, Симоновом и Новоспасском. С апреля 1581 г. — епископ Коломенский, с января 1586 г. — архиепископ Ростовский, с 11 декабря 1586 г. — митрополит Московский и всея Руси. Иову было суждено стать первым русским патриархом (посвящен в кремлевском Успенском соборе 25 января 1589 г.). Близкий к Борису Годунову, Иов остался верен и несчастному его сыну Федору Борисовичу, убитому сторонниками Лжедмитрия. В июне 1605 г. приверженцы самозванца «свели» Иова с патриаршества, схватив его во время службы в Успенском соборе и ограбив его палаты. На убогой телеге Иов был увезен в Старицу; там, ослепший, он умер 19 июня 1607 г.

Иов был довольно плодовитым автором. Ему принадлежат «Духовная грамота» (с автобиографией и панегириком Борису Годунову), ряд посланий (царице Ирине по случаю смерти ее дочери Федосьи, грузинским царю и митрополиту, и др.), канон и службы Иосифу Волоцкому по случаю установления общерусского праздника этому святому. Творческие установки и стиль Иова типичны для официальной литературы «второго монументализма» с ее жесткой этикетностью, пышной риторикой и даже демагогией.

В «Повести» Иов изображал не столько то, «что было», сколько то, «что должно было быть». Это сказывается в отборе фактов, в их интерпретации, в обрисовке главных персонажей. Их в «Повести» три: последний монарх из дома Калиты Федор Иванович (1557—1598, венчался на царство 31 мая 1584 г.); его ровесница и жена (с 1580 г.) Ирина Федоровна Годунова, которая, овдовев, постриглась в Новодевичьей обители с именем Александры; царский шурин Борис Федорович Годунов, достигший полноты власти уже в царствование Федора Ивановича (Годунов получил высшие чины «конюшего боярина», «царского слуги», а также особый, ранее в государственной практике не существовавший титул «изрядного правителя»).

Из трех главных персонажей лишь царица Ирина осталась вне этикетной идеализации. Эта единственная в «Повести» женщина изображена любящей супругой и неутешной вдовой, что, насколько нам известно, вполне соответствует действительности. От реального царя Федора созданный Иовом персонаж унаследовал богомольность (Федор, как пономарь, и в последние свои годы хаживал звонить на колокольню) и кротость (совершенно лишенный властолюбия, Федор устранился от дворцовых интриг). Скудоумие болезненного, отечного, с неверной походкой и блуждающей улыбкой царя в «Повести» отражения не получило. Больше всех идеализирован Борис Годунов. Он, в частности, представлен выдающимся полководцем, хотя ратных заслуг у этого превосходного администратора не было.

О том, что Иов опускал все события, которые могли бы бросить тень на его идеальных героев, красноречиво говорит умолчание о трагической смерти царевича Дмитрия и вообще об углицком деле. О том, что все происходившее Иов трактовал исключительно в благоприятном для этих героев свете, свидетельствует рассказ об учреждении патриаршества на Руси. В «Повести» находим идиллию: приехавший в Москву константинопольский патриарх Иеремия с радостью и без раздумий посвятил Иова. На деле не обошлось без нажима и угроз, без щедрого «жалованья» Иеремии: боявшийся турок, он сам был не прочь остаться в Москве и занять русский патриарший престол и с большой неохотой пошел навстречу пожеланиям московских властей.

При всем своем почтении к литературному этикету Иов вовсе не лишен писательского дарования. Он не стремится блистать эрудицией, из Писания большей частью цитирует Псалтирь — книгу, которая в те времена заменяла букварь и которую знал наизусть каждый обученный грамоте. Это не случайно: Иов сочинял не для высокообразованной и малочисленной элиты, а для «широкого читателя». Отсюда — творческая установка на эмоциональность, отчетливо проявившаяся в «плачах» по царю Федору. В этом жанре, объединяющем традиции и письменности, и фольклора, Иову удалось достичь высокого художественного уровня.

Текст публикуется по списку БАН, 17.2.5, т. 2, л. 280 об.—308 об., второй половины XVII в. «Повесть» здесь дополняет Никоновскую летопись. По этому списку «Повесть» издана в кн.: ПСРЛ. СПб., 1910. Т. 14. С. 1—22.

ОРИГИНАЛ

ПОВЕСТЬ О ЧЕСТНѢМ ЖИТИИ БЛАГОВѢРНАГО И БЛАГОРОДНОГО И ХРИСТОЛЮБИВАГО ГОСУДАРЯ ЦАРЯ И ВЕЛИКОГО КНЯЗЯ ФЕДОРА ИВАНОВИЧА ВСЕА РУСИИ, О ЕГО ЦАРЬСКОМЪ БЛАГОЧЕСТИИ И О ДОБРОДѢТЕЛНОМЪ ИСПРАВЛЕНИИ, О СВЯТѢМ ЕГО ПРЕСТАВЛЕНИИ. ПИСАНО СМИРЕННЫМ ИЕВОМ ПАТРИАРХОМ МОСКОВСКИМ И ВСЕА РУСИИ

Небеси убо величества и высота недостижна и неописуема, земли же широта и долгота неосяжима и неизследима, морю же глубина неизмерима и неизпытуема. Святых же и крестоносных преславнейших росийских царей и великих князѣй многая добродетелѣм исправления неизчетна и недоумеваема. Аще убо кто будет и от силных в разсужении и глубокоразумного росийского языка, аще и грамотичными художествы и риторскою силою преукрашени будутъ доволне, но благочестивых сих самодержавнейших царей добродетелем величества по достоинству изповѣдати не могутъ.

Мы же убозии и груби разумом, аще и недоволнии о семъ помыслити, но благодать человѣкалюбиваго Бога в помощь призвавше и Святаго Духа наставника имуще, мала нѣкоя приемше добродетелных благодѣяний, в почесть всѣмъ предлагаемъ, да разумно будет всемъ слышащимъ нами днесь глаголемая ясно. Приидетѣ, услышите, и повем вамъ, вси боящиеся Бога, елика сотвори Господь в последнемъ нашем роде в земли благочестивыя Руския державы. Хощет бо ныне слово составити повесть, якоже нѣкую сладостнѣйшую и честную предложити ядь, да не многими лѣты великое Божие человѣколюбие, еже на нас сотворшѣеса, забвѣния глубина покрыетъ, но вмалѣ писанию предавше, да извѣстно будетъ всѣмъ и в вѣчныя роды, о немже нынѣ разумъ писания изъявляетъ.

Бысть убо, глаголю, во время, како убо бысть и в которое врѣмя, егда убо благочестивая и православная хрестиянская вѣра в Велицей Росии паче солнца сияющи и своя свѣтозарная луча во всю вселенную испущающе, якоже глаголетъ пророкъ, отъ моря и до моря и от рѣкъ до конец вселѣнные[1] слава ея простирашеся, и благочестивыхъ и крестоносныхъ християнских царей Руския державы скипетродержавъство велелѣпъне цвѣтуще, и благородный царский корень многими лѣты непременне влечашеся отъ великого Августа кесаря римского,[2] обладающего всею вселенною, якоже история повѣдаетъ, и до самого святаг сего царьствия богохранимыя державы великого Росиского государства благовѣрнаго и христолюбиваго царя и великого князя Федора Ивановича всеа Русии. Той же убо благочестивый царь и великий князь Федор Ивановичь всеа Русии сынъ бѣ преименитого государя и храброго царя и великого князя Ивана Васильевича всеа Русии, царьствовавшего в Велицей Росии 49 лѣтъ и мѣсяцъ 9 на престоле приснопамятнаго отца своего великого князя Василья Ивановича всеа Русии и дѣда своего великого князя Ивана Василевича всеа Русии. Той же убо благочестивый царь и великий князь Иванъ Васильевичъ всеа Русии бѣ разумомъ и мудростию украшен и въ храборскихъ побѣдахъ изряденъ и к бранному ополчению зело искусѣнъ и во всѣхъ царских исправлениих достохвален явися, великия израдныя побѣды показа и многия подвиги по благочестии совершив. Царьским своимъ бодроопасным правлениемъ и многою премудростию не токмо всѣхъ сущих богохранимыя державы своея в страх и в трепет вложи, но вся окрестныя страны невѣрныхъ языкъ, слышаще царьское имя его, с великою боязнию трепетаху. Прочая же его царьского исправления добродетѣли слово инде изъявитъ.

Тогда же убо благовѣрный царь и великий князь Иванъ Василиевичь всеа Русии преиде въ пятьдесят третьеѣ лѣто возраста своего, случися ему велия болѣзнь, в нейже проувидѣвъ свое к Богу отшествие, восприятъ великий ангелъский образ и наречен бысть во иноцех Иона, и по сѣмъ скорѣ остави земное царьство, ко Господу отиде лѣта 7092-го марта въ 19 день; и по преставлении своемъ вручивъ превеликий скифетръ Росийскаго самодержавного царствия и свой великий царьский престол предастъ благородному сыну своему благочестивому и христолюбивому царю и великому князю Федору Ивановичю всеа Русии. Царь же и великий князь Федор Ивановичь всеа Русии по преставлении приснопамятнаго отца своего царя и великого князя Ивана Василевича всеа Русии Божиим изволением и отческим благословением приемник бывает царского престола всея Великия Росии. Возведенъ же бысть и вѣнчанъ царским венцем преосвященным митрополитом всеа Русии кир Дионисиемъ,[3] иже в та лѣта содержаша кормило великия и кафолическия церкви Пречистые Богородицы чеснаго и славного ея Успения и содержаше престол великих чюдотворцовъ Петра и Алексѣя и Ионы внутрь царьствующаго града Москвы. Бѣ же тогда благочестивый царь и великий князь Федор Ивановичь всеа Русии яко лѣтом 27.

Сей убо благочестивый самодержецъ праведный и досточюдный и крестоносный царь и великий князь Федоръ Ивановичь всеа Русии древнимъ бо царемъ благочестивымъ равнославенъ, нынѣшним же красота и свѣтлость, будущимъ же сладчайшая повѣсть и слуха благое насладждения, не токмо единыя Росийския богохранимыя державы, но всея подсолнечныя пречестнѣйши быти явися. Еще бо от царьския своея юности исполненъ сый духовныя мудрости. Аще бо и безчисленными изрядными и многоценными красными вѣка сего обнимаем бѣ, ни о едином же их прилежнѣ внимая, ниже о сих когда веселя. Точию о памяти Божией и о всѣхъ добродѣтелѣхъ попечение имы, и не еже бо памя то вати ему житейских сихъ многоцѣнныхъ и красных и к симъ вседушно пригвоздитися, но жалая ото всѣхъ Содѣтеля и Промысленника вѣчных благих насладитися и Небесного Царьствия сподобитися. Кто убо доволенъ по достоянию явится сказати яже благочестиваго сего царя достохвалное добродетелемъ исправление? Или кто дерзнет коснутися повесть составити о святѣмъ его житии? Аще бы и превысочайшего Росийского царствия честный скифетръ содержаше, но Богу повсегда умъ свой вперяше и душевное око бодренно и неусыпно храняше и сердечную вѣру выну благими дѣлы исполняше. Тѣло же убо свое повсегда удручаше церковными пѣнии и дневными правилы и всенощными бдѣнии и воздержанием и постом, душу же свою царскую умащая поучением божественных глагол и вниманием, и благихъ нъравъ удобрѣние украшая прилѣжно.

Ныне же паки слово помянути хощетъ и другая его царская достохвалная исправления, да не предана будетъ забытию словеси, иже памяти достойна. Еже быша въ лѣта приснопамятного отца его благочестиваго царя и великого князя Ивана Васильевича всеа Русии нечестивыи болгари, иже близ Русии пребывающе, живуще по реце глаголемей Волзѣ, во мнозѣх лѣтех приходяще на предѣлы Русийскаго его государства[4] и многия пакости деюще православъным християном, брани составляюще и пленующе непрестанно. По вся лѣта воеваху и православнаго християнства кровь, яко рѣчьные быстрины, изливашеся. Мнози же православнии християне отъ нечестивыхъ побиени быша, ови же в плен отведени и многия и различные муки претерпѣша.

Царь же и великий князь Иванъ Васильевичь всеа Русии в лѣто 7061-го, видевъ нечестивых богомерское озлобление, подвижеся на нечестивыя, поиде во мнозе силе и град ихъ великий Казань взят, пределы их Казанския вся поплени и многое множество нечестивыхъ болгар погуби, оставших же от плѣна всѣхъ под свою под царскую десницу покори. Не по мнозех лѣтех по сем бранномъ ополчении Божиими судбами царь и великий князь Иванъ Васильевичь всеа Русии ко Господу отиде, по нем же достохвалный сынъ его благочестивый сей царь и великий князь Федор Ивановичь всеа Русии царствия скифетръ приемлет, якоже и преже явлено бысть. Нечестивии же болгари, гордостию бесовскою возношахуся, паки на благочестие востают и пришедше на пределы Росийскаго государства, якоже и преже, пленующе намнозе.

Видевъ же сия преблагий человѣколюбивый Богъ нашъ и не остави до конца погибнути наслѣдию христоимѣнитого звания, вложи в сердце благочестивому царю и великому князю Федору Ивановичю всеа Русии, яко да православное християнство от нечестивых насилования исторгнетъ. Благочестивый же царь, истинный рачитель благочестия, слышавъ сия, божественною ревностию разжегся, повелѣ изрядному своему правителю Борису Федоровичю послати многое свое воинство на нечестивые болгары. Достохвалный же правитель Борис Федоровичь вскоре повелѣние благочестиваго царя исполняетъ, собираетъ многое христолюбивое воинство и воеводы им поставляетъ и в велицей силе, изоруживъ, на болгары посылаетъ. Воинство же благочестиваго царя пришедше в предѣлы Болгарския области и тамо, намнозе пленующе, воеваше; и Божиим пособиемъ нечестивыи побежени быша и мнози от них острием мѣча падоша. Они же, видѣвше христолюбиваго воинства храброе ополчение и невозвратное устремление и свою погибель пред очима зряще, вскорѣ ко благочестивому царю рабское покорение принесше. Царь же и великий князь Федор Ивановичь всеа Русии повелѣ многия грады своя в предѣлех ихъ поставити,[5] и оттуду же царьским его благостройнымъ правителством вся страны Болгарския в велицем покорении и в рабском послушании под его царскою десницею и доселѣ пребываютъ. Не точию же сия нечестивыя болгары под свою царскую десницу покори и послушни во вѣки сотвори, но и Сибирскую страну всю и живущих въ ней злочестивых сыроядцевъ себѣ рабы сотвори и всею землею их облада, и многия от них своя царские уроки и дани по вся лѣта приимая, и тамо нечистыя и бесовския службы вся разоривъ и грады многия возгради[6] и православными християны вся насѣи, божественные церкви созда и благочестие велие царьскимъ его правлением устроися, даже и доныне непремѣнно пребываютъ.

К сим же и прочая царския добродетели да неумолчныи будутъ: зѣло бо бѣ нищелюбивъ, вдовица и сироты милуяй, паче же священнический и иноческий чинъ велми почитая и пространною милостынею повсегда удовляя. И толику ревность по благочестии показа: не токмо во всѣй державе богохранимаго его царствия, но и во всю всѣленную непремолчная слава благочестия его, яко солнечныя луча, простирашеся, и толма милостив бѣ, яко не точию въ своей богохранимой державе пространную милостыню требующим подавая, но и в далныя страны земля, яко нескудная река, повсегда изливашеся. Глаголю же, во Святую гору Афоня и во Александрѣю и в Ливию и в Великую Антиохию и во вся святая мѣста, да иже и до самого Божия града Иерусалима, пространная милостыня по вся лѣта от него посылашеся.

Изыде же слух о его благочестивомъ добродетелномъ исправлении и до самого царствующаго Констянтинаграда и вниде во уши святѣйшаго патриарха кир Иерѣмея. Той же убо патриархъ Иерѣмей, слышавъ сицева благовѣрного царя Федора Ивановича всеа Русии добродетелное исправление и великое благочестие, вскорѣ подщася преитти толики долгий и скорбный путь, прииде въ Великую Росию, жалая видети великия християнские соборные Церкви изрядное украшение и благовѣрнаго царя Федора Ивановича великое благочестие. Якоже и древле южеская царица Сивилла приходяще от востокъ во Иерусалим, хотя видети премудрость Соломанову,[7] такоже и сѣй свѣтѣйший патриархъ Иеремей, велиею ревностию о благочестии распалаяся, отложивъ многолѣтную старость и забывъ великий труд, вскоре ко благочестивому царю и великому князю Федору Ивановичю всеа Русии приходить, яко нѣкий добрый купѣцъ, несый с собою не злата богатства, ниже драгих камыков честности, но самое неистощимое духовное сокровище благодати безценного бисера Христа или, яко некий пречестный даръ, великого патриаршества сан. Престол же тогда Великия Руския митрополия содержашеся пресвященным кир Иевом митрополитом всеа Русии.

Царь же и великий князь Федор Ивановичь всеа Русии с великою любовию и неизреченною радостию патриарха Иерѣмея приемлетъ и достойную честь святителству его воздаетъ, от него же миръ и благословение приемлет и своими царскими многими потребами его по вся дни удоволяя. Посем же благочестивый царь и великий князь Федор Ивановичь всеа Русии совѣтъ свой царской с патриархомъ Иеремѣемъ полагаетъ, да поставитъ в Велицей Росии въ его богохранимой державе патриарха по правилом святых апостол и святых отецъ. Патриархъ же, слышав совѣтъ благочестиваго царя, зѣло удивися царскому великому благочестия желанию и нача помышляти в себѣ, како устроити на престоле Руския митрополии патриарха, поминая предания святыхъ апостол и заповеди святых отецъ, яко четырем токмо быти патриархомъ: въ Велицей Антиохии и во Иерусалимѣ и въ Констянтинеградѣ и во Александрѣи; пятому быти папе въ Римѣ. Известно бо, вѣды, яко римский папа многими лѣты благочестия отлучися и християнские истинные вѣры отпаде, ово же помышляя, яко ныне царьствующий Констянтинъград неверными обладаем и благочестивая вѣра ими нѣнавидима бываетъ, и многие брани на благочестие повсюду устрояютъ; в Велицей же Росии видѣвъ толикое православие, многими лѣты цвѣтуще, яко солнце на тверди небесней сияше, наипаче же пречестнѣйши сего узрѣ и самую Матери Божия Слова церковь, неизреченною лѣпотою украшену, и в ней многия священныя вещи и всякия святыни в различных и многообразных потребах устрояеми, иже в похвалу и славословие вседержителю Богу и Пречистой Богородицѣ и всѣмъ святым; и видѣвъ пречестные и златокованныя раки, в нихже яко некое многоценное сокровище лежаше многочюдесныя и целбоносныя мощи великих чюдотворцов, рускихъ митрополитовъ Петра и Алексѣя и Ионы,[8] многими лѣты ничим невредимы; и благочестиваго царя и великого князя Федора Ивановича всеа Русии теплое рачителство и вѣру к Богу и великое прилежание и многое попечение, еже имѣя о исправлении всего благочестиваго народа православного християнства, зѣло удивися о семъ и хвалу воздав всемогущему Богу и упование положи на его превеликих щедрот милость, и поставляетъ в Велицѣ Росии патриарха на Рускую митрополию бывшаго тогда митрополита Иова в лѣто 7097-го, нарицая его быти четвертому патриарху. В мѣсто же папино константянополский патриархъ оттуду начатъ нарицатися.

Царь же о семъ зѣло возрадовася и его превеликою честию потчте и многоценными великими дары одаривъ, не по мнозе времяни с великою честию отпустивъ ево во Царьград.[9] И егда убо патриархъ Иеремей достиже царского града, собирает все свое христоименитое стадо православнаго христианства и с велицем удивлением начат повѣдати, елико видѣ въ Велицей Росии благочестивыя християнския церкви греческаго закона пречюдное украшение и царское изрядное благочестие и всѣх православных християн божественных догмат исправление; к сему же и многоцѣнныя дары показуя, иже приятъ от руки благочестиваго християнского царя и великого князя Федора Ивановича всеа Русии; по сих же возвещает всемъ и патриаршеское иже в Велицей Росии поставление.

Они же, слышевше таковое благочестие, въ Велицей Росии просиявшеѣ, нача со слезами благодарити всемилостиваго Бога, глаголя: «Щедрый и милостивый Боже! Вся строя на ползу всѣмъ вѣрующимъ в тебѣ, единаго истинного Бога, яко утвердилъ еси толикое благочестие в послѣднем нашемъ роде в земли благочестивые Руския державы! Такоже, премилостивый Боже, сотвори с нами древнюю свою милость и не предаждь в поношение врагомъ достояния твоего! Ты бо еси Богъ нашъ, мы же — людие твои и овца пажити твоея, и сохрани, Владыко, церковъ и люди своя невреждены от всѣхъ навѣтъ вражиихъ, да не рекутъ супротивнии наши: „Гдѣ есть Богъ их?”[10] Ты бо еси Богъ нашъ, творяй чюдеса, единъ».

По сихъ же патриархъ Иеремия восписует ко всем триемъ патриархомъ, во Александрѣю и во Антиохию и во Иерусалимъ, возвѣщая, еже како бывъ в Велицей Росии и тамо патриарха постави на престолъ Руския митрополия, да воспишут к нему согласная и соединительная писания за своими руками, еже быти в Велицей Росии патриаршескому престолу во веки и к тому не требовати поставления от Констянътинополския церкви патриарха, но своими ему митрополиты в Велицей Росии и поставлятися. Они же, прочет писание, вскоре препослаша, яко достойно быти патриарху в Велицей Росии, въ такове благочестии сияюще, и митрополиты и архиепископы и епискупы коегожедо их пределов православных вси к писаниемъ патриаршеским руки свои приложиша. Сие же согласное написание триех патриарховъ с протчими своими митрополиты и архиепискупы и епискупы святѣйший патриархъ Иеремия вскорѣ посылаетъ в Великую Росию к благочестивому царю и великому князю Федору Ивановичю всеа Русии, моля его и глаголя: «Приими, о великий самодержавецъ и крестоносный царю, истинныя православныя вѣры теплый рачителю и непреклонный крѣпки поборниче, сие от нас твоему благочестивому царствию духовное дароприношение, еже от нас ныне принесеся в славу Святыя и Живоначалныя Троицы и в честь Пресвятѣй Владычицы нашея Богородицы и великихъ чюдотворцовъ руских и в достоинство похвал твоего самодержавного благочестия, да будетъ престол патрияршеский в твоей богохранимой державе во веки. Видев бо преблаги Богъ нашъ толикое твое достохвалное рачение и вѣру несуменну, юже имать царское твое благородие о исправлении всего православного благочестия, и подастъ ти дар возжъделѣненъ по желанию твоему, устроивъ престол великого сана патриаршества нашимъ смирениемъ. И да будет сие соединителное написание о Святѣм Дусѣ брату и сослужебнику нашего смирения, вашему же о Святѣмъ Дусѣ отцу и богомолцу Иеву патриарху на утвержение святителству его и по нем сущимъ патриархомъ всем во вѣки».

Слышав же сия благочестиваго царя добродѣтелное исправление и во всехъ странахъ невѣрных языкъ, июдеи же и еллины, скифи же и латыня и аравития и бесермени, нѣ точию прости, но и сами царюющгш, во всю бо землю, по пророку, изыде слава о нем[11] и в конце вселенныя его благочестие простирающеся — мнози убо оставляюще свою злоскверную прелесть и ихъ злочестивую и богомерскую вѣру проклинающе и со мнозем студом отревающе, ко благочестивому его царствию богохранимыя державы с великимъ тщанием приходяще и со мноземъ молениемъ и ревностию правую нашу християнскую вѣру прияти желающе и во Христа вѣровати непрелестна хотяще. Он же, великий самодержец и благочестивый царь, во всѣмъ, яко чадолюбивый отецъ, являшеся и своея прѣщедрыя милости всѣм неоскудную руку помощи простирая, овѣмъ убо великая села и многая стяжания во одержание подавая, овем же велѣдарными даянии презелнѣ обогащая.

В лѣто же благочестиваго его царствия управляя и строя под нимъ богохранимую державу шурин его, слуга и конюшей бояринъ Борисъ Федоровичъ Годунов. Бѣ же убо той Борисъ Федоровичь зело предизрядною мудростию украшен и саном паче всѣхъ и благимъ разумом превозходя, и пречестным его правителством благочестивая царская держава в мире и в тишине велѣлепней цвѣтуще; и многая тщания показа по благочестии и великъ подвиг совершивъ о исправлении богохранимыя царския державы, яко и самому благочестивому самодержцу царю и великому князю Федору Ивановичю всеа Русии дивитися превысокой его мудрости и храбрости, и мужеству. И не точию во своем царствѣ Руския державы изыде слух, но и по всѣмъ странамъ неверных язык проиде слава о нем, якоже никто же ин обрѣтеся в та лѣта во всѣм царстве Руския державы подобен ему храбростию и разумомъ и вѣрою, яже к Богу. И от многихъ стран языческих царей приходяще по славе к царю и великому князю Федору Ивановичю всеа Русии з дары многоценными, рабское поклонение и достойную честь царьскому его величеству воздающе и тому изрядному правителю царские богохранимыя его державы, пресвѣтлой красоте лица его и премудрости разуму его чюдящеся; и возвращеся во своя страны, со удивлением превеликую добродетель повѣдающе.

Сей же изрядный правитель Борис Федоровичъ своим бодроопасным правительством и прилежным попечением по царскому изволению многи грады камены созда и в них превеликие храмы в славословие Божие возгради и многие обители устрои. И самый царьствующи богоспасаемы град Москву, яко некую невѣсту, преизрядною лепотою украси: многия убо в нем прекрасные церкви камены созда и великие полаты устрои, яко и зрѣние их великому удивлению достойна; и стены градные окресть всея Москвы превелики камены созда и величества ради и красоты проименова его Царьград;[12]* внутрь же его и полаты купѣческии созда во упокоѣние и снабдение торжникомъ; и ина многа хвалам достойна в Руском государствѣ устроити. Протчая же добродетели пространное инде слово изъявитъ, мы же к повести слово подвигнем и на предлежащеѣ возвратимся.

В седмое же лѣто богохранимыя державы благочестиваго царя и великого князя Федора Ивановича[13] всеа Русии; тогда быша некия грады царского его достояния Корелския области, навѣтуемыи и озлобляемыи от нечестивых латын, иже нарицаютця германе. Видѣвъ же благочестивый царь свое царское достояние и отеческое наследие, ото многих лѣтъ невѣрными обладаемое, к себѣ возвратити и, яко неких волковъ, губящих стадо Христово, далече отгнати. Паче же и самъ изрядный правитель Борис Федоровичь велию ревностию по благочестии разгараяся; и по благому изволению благочестиваго царя вскоре собираетъ многое христолюбивое воинство и посылаетъ в предѣлы немецкия области, не яко да их пленити, ниже грады до основания разорити, но сим паче нечестивых в страх и в трепетъ вложити, да поне сии, мало убоявся нечестивии толикого множества ратных нашествие, благочестиваго царя отеческое наследие и оторженые грады без крове паки к нему возвратятъ. Злочестивыи же германе со христолюбивым воинством благочестиваго царя брань немалу поставляютъ.

Видев же великий самодержецъ жестокое их и непокорное сквѣрное сердце и сопротивное ополчение, ревностию велию по благочестии разгараяся, самъ подвижеся со многою ратию христолюбиваго своего воинства и в помощъ призва человѣколюбца Бога и Пречистую Богородицу и великихъ чюдотворцовъ и благословение приемъ ото отца своего и богомолца Иева патриарха и всего вселенского собора. И поиде на нечестивые немцы, ополчився во мнозѣ силе, моля в себѣ и глаголя: «Суди, Господи, обидящим мя и возбрани борющим мя со мною и помози ми, Господи, якоже дрѣвлѣ Моисѣю на Аммалика[14] и прадеду моему, великому князю Александру, на окоянныя сия нечестивыя немцы».[15] Егда прииде во свое отечество, в Великий Новград, тамо убо преосвященный митрополитъ Александръ, иже содержаше в то врѣмя кормило великия соборныя церкви Софѣи Премудрости Божияго Слова в Велицемъ Новѣграде,[16] и со въсѣм освященным собором и всѣнародное множество с великою радостию сретоша и царскому его величеству раболепное поклоняние и достойную честь воздающе. Туто же благочестивый царь и великий князь Федор Ивановичь всеа Русии паки христолюбиваго своего воинства тмочисленные полки устрояетъ и благоразсудныя им воеводы поставляетъ и на подвиг всѣх к бранному ополчению поощряетъ, аще и до смерти за имя Христово пострадати повелѣваетъ и свое царское жалованье всѣмъ обещеваетъ. С ними же и многие стенобитные пушки, всякие хитросодѣенные вѣщи к разорению градовом предпослати повелѣваетъ, не точию хотя еже бранию сею многое кровопролитие сотворити, но невѣрных на благочестие пременити. Самъ же во своем отечествѣ, в Великом Новѣграде, по семъ немноги дни пребывъ, непрестанныя молитвы повсѣгда Богови возсылая и, руцѣ горѣ воздевъ, на помощъ Всѣсилнаго Бога призывая, и непобѣдимаго воеводу Пречистую Богородицу в помощъ ратных поставляя, и великих чюдотворцов непрестанно умоляя, да на сопротивных помогут и без крове побѣду устоятъ. Оле крѣпкия и твердыя дерзости и мужества! Оле благия царския душа неуклонное ко всѣмъ милосердие! Оле благаго произволения и умышления неотложного избавления ради християнска!

По сем же благочестивый царь прииде в Немецкую область под град, нарицаемы Ругодивъ, и начатъ ко граду с великою бранною хитростию приступати. Видевше жѣ нечѣстивии, сущии во градѣ, благочестиваго царя храброе ополчение и многое воинское собрание, к бранному подвигу неложное устрѣмление и граду своему конечное разорение, и во ужась себѣ влагают, вскоре своея надежды отпадаютъ. И великий страх нападе нань: прислаша ко благочестивому царю неких от града сущих, моление царю предпосласта и ослабы от брани просяще, и царское его отечество обѣщеваютца без крови паки к нему возвратитися. Благочестивый же царь и великий князь Федор Ивановичь всеа Русии, видѣвъ рабское их покорение, в той часъ повелѣ ратнымъ от града отступити и о брани повелѣ престати и яростное стремление ратных повелѣ удержати и посланныхъ отъ града повелѣ о сем истязати, аще не лѣстию обещаютца и истинною покоряютца. Тогда же нечестивии обет свой вскорѣ исполняютъ и град свой, Иванъ нарицаемый, к сему же и протчии два, Копорью и Яму, благочестивому царю без закоснѣния предают.

Он же, благочестивый самодержецъ, вскорѣ повелѣ Иванъград от нечестивых истрѣбити и всяких еллинъскихъ богомерских гнусовъ повелѣ очистити, и божественные церкви в нем поставляти устрояетъ, и своего царского синклита некоего от бояръ в снабдения града воеводством поставляетъ. Во грады же Копорью и Яму такоже посылаше избранныхъ воевод своих и с ними многое воинство, да и тамо же такоже грады от нечестивых очистятъ. Самъ же благочестивый царь не по мнозех днѣхъ возвратися во свое царское достояние с великою и славною побѣдою и прииде во свое отечество, в Великий Новгород. Преосвященный же митрополитъ Великого Новаграда Александръ и весь освященный соборъ с честными и животворящими кресты и с чюдотворными иконами и всенародное множество изыдоша во сретение ему, хвалу Богу возсылающе и благодарные песни о побѣде его воспѣвающе: «Пособивый Господи кроткому Давыду побѣдити иноплеменники, сице и сему благочестивому царю нашему побѣду на сопротивных и одолѣние дарова». Благочестивый же царь и великий князь Федор Ивановичь всеа Русии немногое время тамо пребыв и свое христолюбивое воинство овѣхъ убо отпусти кождо восвояси, овѣхъ же остави в Велицем Новѣграде, самъ же поиде во свой великий царствующий град Москву.

Слышавъ же сия святѣйший Иев патриархъ, яко благочестивый царь к царьствующему граду уже приближашеся, собираетъ весь освѣщенный вселѣнский соборъ, и приемлютъ честные и животворящие кресты и чюдотворныя иконы вседержителя Бога и того Пренепорочныя Матери Владычицы нашея Богородицы и великихъ чюдотворцовъ и изыдоша во срѣтение благочестиваго царя, молебная совѣршающе. Егда же прииде благочестивый царь в царьствующий град Москву, и вниде в соборную церковъ Пречистые Богородицы чеснаго и славнаго ея Успения и припадает ко образу Пречистые Богородицы, иже нарицаетца Владимерская, и умиления глаголы с плачем к ней испущающе: «О Пречистая Госпоже Дѣво Богородице Владычице, крѣпкая стѣна и заступница царьствию нашему и всему нашему воинству непобѣдимый воевода! Тобою, Владычице, супротивнии наши побѣжаютъся и брани повсюду разсыпаютца! Ты, Владычице, ныне не престай молящи Сына своего Христа, Бога нашего, яко да устроит царьствие моея державы в мире и в тишинѣ и возвратит от неверных древняя грады наслѣдия нашего, яко да и тамо прославитца в них по достоинству пресвятое и поклоняемое имя его со Отцем и со Святым Духомъ во веки, аминь».

По сем же благочестивый царь и великий князь Федор Ивановичь всеа Русии от патриарха Иева благословение приемлетъ, возвѣщая ему, како Божиею помощию и Пречистые Богородицы и великих чюдотворцов молитвами и заступлением невѣрнии языцы победишася и отческие грады паки к нему возвратишася. Патриархъ же, слышав сия ото устъ благочестиваго царя, зело возрадовася со всѣмъ священным соборомъ и хвалу воздавъ Всемогущему Премилостивому Богу, победное славословие приносяще, глаголя: «Кто Богъ велий яко Богъ нашъ? Ты еси Богъ творяй чюдесная единъ; дивенъ еси, Господи, и вся дела твоя истинна и правии путии твои,[17] яко строиши вся на ползу по своему смотрѣнию к нашему спасению. Благодарим же и о сѣмъ великое человѣколюбие твоего благоутробия, яко предал еси в руцѣ благочестивому царю нашему невѣрныя языки незнающих тебѣ, истиннаго Бога нашего, сих же изгнал еси и вѣрными грады ихъ населил еси, въ нихъ же нѣпрестанно славится твое пресвятое имя, яко благословен еси во вѣки, аминь». По сих же патриархъ глаголя благочестивому царю: «О великий государь боговенчанный царь и великий князь Федор Иванович всеа Русии! Воистинну еси ты равен явися православному первому во благочестии просиявшему царю Констянтину и прародителю своему великому князю Владимеру, просвѣтившему Рускую землю святым крещением. Они же убо кождо во свое врѣмя идолы поправше и благочестие восприяша, ты же ныне, великий самодержце и истинный рачителю благочестия, не единех идол сокрушая, но и служащих имъ до конца истрѣбляя. Твоим же неуклоннымъ к Богу желанием и велиею вѣрою вся благая тебѣ даровашеся: которые грады православных самодержавънаго вашего царьствия во дни преже тебѣ в Велицей Росии царствовавшихъ невѣрными от благочестия быша отторжены и многими лѣты быша невѣрными обладаеми, ныне же твоимъ самодержавнымъ правлением вся православными населяеми. Идѣ же бѣша ельлинская капища, тамо ныне божественные церкви; идѣ же быша скверныя службы, тамо нынѣ безкровныя жертвы; иде же быша бесовския козни, тамо ныне богодухновенныя пѣсни; идѣ же дьявол величашеся, тамо ныне Христосъ прославляетца; иде же ельлини водворястася, тамо ныне твое царское имя во мнозе славе обношашеся». Царь же и великий князь Федор Ивановичь всеа Русии исполни моление свое, отиде в царския своя полаты.

Мало же по сем времении минувшу, яко двою лѣту или мало вяще, паки злочестивии немци лукавствием побѣжахуся и гордостию возношахуся, помышляют совѣты,[18] их же не возмогоша составити. Оле бѣзсрамнаго и безстуднаго их лицемерия! Беззаконие убо к беззаконию приложиша, совокупиша силу многу сии, суемыслиемъ шатающеся, глаголаху: «Поидем на пределы Великого Новаграда, да тамо победимъ и мѣсть срама нашего воздадим. Се днесь руский царь во свое ему отечество отиде и всѣ воинство ратныхъ с собою отведе». И собравше силу многу, приидоша в предѣлы Великого Новаграда, достигше же пленующе близ и до самого Новаграда. Слышав же сия христолюбивое воинство благочестиваго царя, бывшѣе тогда в Велицем Новѣграде, изыдоша противу ихъ и брань немалу на нихъ подвигоша и помощию Божиею нечестивых побѣдиша. Оставшии же убоявшеся и вспять возвратишася, рустии же полцы вслед по них гоняще, непрестанно их убивающе.

Вниде же слухъ побѣды сея во уши благочестиваго царя и великого князя Федора Ивановича всеа Русии, яко нечестивии немцы на наугородцкие пределы приходиша и тамо немалое время, плѣнующе, воеваша. Вскорѣ посылаетъ некоихъ своих избранных воевод и с ними многое свое христолюбивое воинство в предѣлы Немецкия области под град, нарицаемый Корелу. Полцы же рустии шедше и всю Корелскую область поплениша, и нечестивых немец безчисленно побиша. Видевше же нечестивыи немцы христолюбиваго воинста храброе ополчение и яростное стремление, паче же и свою погибель пред очима зряще, зело убоявшеся и послаша послы к полком благочестиваго царя с великим покорением и пагубы своея ослабы просяще и Корелскую свою землю благочестивому царю обещавшеся предати. Слышав же сия благочестивии полцы рустии