На велицей вечерни поем Блажен муж: 1 антифон. На Господи воззвах, стихиры праздника 3, и святаго 5, глас 8:
Подобен: О преславнаго чудесе:
Безбожие якоже ино пресекая море / в небесное царство вшел еси / достойно, Викторе, / идеже сладости поток истекает, / и свет непреложный сияет / Христа светодавца, / егоже наслаждающеся / вкупе с мученики и исповедники / моли спастися душам нашым.
Словом души управляя, / божественный строитель показался еси, / мудре Викторе, / тайныя Церкве столп и правды уста / в изгнаниих горьких и в темнейших местех затворяем / райское селение в уме обносил еси / и терпением оное стяжал еси / от Христа Бога / и Спаса душ нашых.
Яко тезоименитна звание прием, / мудре Викторе, / облаки лжи разгнал еси / и истину утвердил еси / в стезях правых Богу работая, / веру Божию до смерти опасно храня, / взят быв к неизреченней славе / Христа Бога нашего, / Егоже моли спастися душам нашым.
Яко свидетельства течение скончав, / победы венец восприем,/ славне Викторе, / ныне на небесех ликуеши/ со всеми мученики российскими / нам же мощи своя оставил еси, / от нихже цельбы даются приходящым с верою, / отступником на посрамление, / истинней же Церкви на утверждение.
Словесы твоими лесть Сергиеву помрачая, / мудре Викторе, / мудростию Христовою озаряем, / просиял еси на тверди церковней / якоже звезда пресветлая / и пути правыя верным уясняя / и злочестивыя заграждая уста, / Христу Царю работая / Егоже моли спастися душам нашым.
Слава, глас 4:
Вятская страна и вотский край / стяжа тя, отче, пастыря предобра / и учителя истиннейша / душу свою за овцы полагающа, / егоже гласа верныя послушаша / соуз советов лестных отвергоша, / и исповеданием и мук страданием / взыдоша с тобою вкупе к пастыреначальнику единому Христу, / к отечеству нетленному, / земнаго вещества служителем неведомому.
И ныне: праздника.
Вход, прокимен дне и чтения святаго 3 мученичны.
На стиховне стихиры святаго, глас 1:
Подобен: Всехвальнии мученицы:
Оставив долувлекущая мудрования, / последовал еси Христу, / славне мучениче Викторе, / святителю кротчайший, / и крест скорбей злолютых прием, / восшел еси на первое достояние радуяся, / Христову доброту созерцая / Егоже сияньми ум же и мысль озарив / просвещаеши ны чудесы твоими.
Стих: Многи скорби праведным / и от всех сих избавит я Господь.
Огнем разжизаем / божественнаго рачения, / не убоялся еси, Викторе, / тесным путем шествовати, / сквозе море неверия и отступления / прешел еси яко посуху / на Христа единаго взирая / и многим был еси путь ко спасению, / и ныне молися присно спастися нам.
Стих: Блажен муж, бояйся Господа / в заповедех Его восхощет зело.
Отче священне Викторе, / православия светом облистав, / озарил еси мысли верных, / и Сергия зеницы омрачив, / отринул еси от Церкве Христовы / яко ярму неверных подклоншася. / Темже светильника тя стяжавше вси, / священную память твою / почитаем и ублажаем.
Слава глас 4:
Единоумием едино мысляще, / Виктор со Нектарием прекраснии, / с нимиже Синесий и Иларион мученицы, / вятския страны удобрение / и Церкве Российския похвало / исповедницы веры пламеннии / и сынов противления обличители / вкупе с патриархом Тихоном и святым царем Господу предстоят / и молят спастися нам.
И ныне: праздника.
Тропарь, глас 4:
Победы тезоименит воистинну, / Викторе вятская похвало, / узам и скорбем темничным вдался еси веры ради, / слово истины исправляя, / и лесть безбожных посрамил еси, / моли Христа Бога / спастися душам нашым. Дважды и Богородице Дево единожды.
На утрени:
На Бог Господь тропарь праздника дважды, Слава, святаго, И ныне: праздника.
По 1 кафизме седален праздника, Слава и ныне: тойже.
По 2 кафизме: седален святаго, глас 3: Многая гонения и неослабная искушения претерпел еси, Викторе, православием сияя и вся зрящая просвещая, терпению твоея крепости бесов состояния ужасив, возмогл еси сим, священномучениче.
Слава ин, глас 8:
Тяготу недугов, страсти сердечныя и болезни телесныя, всяку же ину скорбь находящую претерпел еси Викторе, Христа ради, и Царствие небесное получил еси, в немже ныне ликующе, поминай нас совершающих память твою.
И ныне: праздника.
Величание: Величаем тя, священномучениче Викторе, и чтем честная страдания твоя яже за Христа претерпел еси.
Псалом избранный: Бог нам прибежище и сила, помощник в скорбех, обретших ны зело.
По полиелеи седален глас 1:
Исповеданием веры правой ныне красится Виктор, Глазовская и Вятская похвало, Церкве мучеников слава, лукавым же слугам сталеименнаго укор и обличение, тии бо спасти душя своя текоша, сей же отдаде живот свой за Христа Бога, и Спаса душ нашых.
Слава и ныне: праздника или богородичен.
Степенна 1 антифон 4 гласа. Прокимен, глас 4: Праведник яко финикс процветет: Стих: Насаждени в дому Господни:
Евангелие от Луки зачало 63.
Воскресение Христово видевше: и псалом 50.
Стихира, глас 6: Сребро разженое и злато явистася / мученик новых множество, / пещь бо Господня тех испытоваше, / и десница Вышняго разделяше, / с теми вкупе Виктор славный, / в кротости и ревности Владыце своему подобен сый, / светильник явися Церкве российския, / истины стези верным уясняя.
Канон праздника со ирмосом на 6, и святаго на 8. Катавасия праздника.
Канон, глас 1:
Песнь 1
Ирмос: Поим песнь новую Богу, от работы фараоновы избавльшему сыны Израилевы, и в пустыни тыя препитавшему, яко славно прославися.
Припев: Священномучениче отче Викторе моли Бога о нас.
Радуются ныне лицы мученичестии, зря исповедника новаго течение и еже о вере борение, вопиюща: слава Ти, Христе, мучеником крепость.
Возшумеша ныне воды злобы и разлияшася реки нечестия еже подвигнути дом души твоея, мучениче, но камень имел еси основание, вопия: слава Ти, Христе, мучеником крепость.
Обыдоша мя богоборцев полки, претя муками и скорбьми злыми, но укрепи сердце мое Бог спасения моего еже вопити: слава Ти, Христе, мучеником крепость.
Богородичен: Восток Дево пречистая была еси Солнца правды, имже неразумия тьмы избавихомся.
Песнь 3:
Ирмос: Утверждение ми буди, основавый землю на водах, яко несть свят паче Тебе, Господи.
Умертвив плотския сласти воздержанием, огнь страстей росою Духа попалил еси, Викторе, и воду живу стяжа в сердце своем, в вечную жизнь текущую и вопиющую присно: несть свят паче Тебе, Господи.
Исполнися издетска сердце твое, Викторе, ревности о иже во тьме неверия седящих людех, и манием Божиим познаша тя людие чувашстии и иерусалимляне пастыря, веры глашатая и светом богознания просвещающа, учаща пети: несть свят паче тебе, Господи.
Законы Божественными огражден, беззаконных соборища уклонился еси, спасая стадо твое, отче Викторе, и делы учаще, яко никтоже имать власти пременяти или отщетевати вся, яже отцы святии рекоша и соборы сих утвердиша.
Богородичен: Мольбу из тебе воплотившемуся Слову сотвори Богородице Дево, яко да нас ущедрит смиренных.
Кондак и икос праздника.
Седален, глас 1: Полк мученик новых смерти не убояшася, от нихже един бе святитель Виктор, исповедник доблий, жизнь бо обрет Христа, скорби горчайшия в сладость вменил есть, и узы темничныя в радование. Слава укрепльшему тя Богу, слава Венчавшему тя, слава Деющему тобою всем исцеления.
Слава и ныне: праздника.
Песнь 4:
Ирмос: Слух силы твоея пророк Аввакум услышав, убояся, дела твоя, Боже, разумев, ужасеся и вопияше: слава силе Твоей, Господи.
Волцы хищницы иже во двор овчий внити желая, обретоша тя стену крепку и дверь затворенну, мучителем тя предаша, ты же сим радостию вдался еси, вопия: слава силе Твоей, Господи.
Соловецкий остров иже мученики новыми освященный и кровьми и поты их окропленный, прием тя, Викторе яко бисер драгий, ин ко иному прилагая и собор святых собирая, вопиет: слава силе Твоей, Господи.
Бездна терпения и милости быв, отче Викторе, в молитве присно пребывая и врагом кротко прощая, вселил еси Христа в душу свою, вся твоя к Нему шествия направляюща, Емуже пел еси: слава силе Твоей, Господи.
Богородичен: Воплощеное из тебе, Чистая, пройде Слово, падение первозданных за милосердие щедрот исправляяй.
Песнь 5
Ирмос: От нощи утренююще, тебе славу воссылаем, Господи Боже наш, твой мир даждь нам, яко разве Тебе бога иного не вемы.
Уклонися ити путем удобным и широким мученик Виктор, и внити в Царствие потщася путем тесным, имже истина едина входит, Христос, благословен Бог отец нашых.
Отроком святым подражающе, не поклонился еси, мучениче, идолу громадному иже безумнии людие себе изваяша и нарекоша его советище, но пребыл еси непоколебим, и жерцов того оплевал еси, вопия Христу: разве тебе иного бога не вемы.
Ныне предал есть нас Господь в руце злых и безбожных, да испытает люди своя и очистит гумно Свое, кротко рекл еси отче мучителем, и несть ныне пути иного аще не исповедания веры в Него и обличения якоже Филипп святый и Предтеча нам явиша.
Богородичен: Яко небес вышшая и херувимов лучшая, всесвятая Дево, с мученики моли Творца и Избавителя спастися нам.
Песнь 6
Ирмос: Со Ионою вопием Ти, Господи, со гласом хваления молящеся: возведи от тли живот наш.
Погрузися во дно адово, и поглощена бысть китом безбожия Церковь русская, но возопиша пастыри Христови: возведи от тли живот наш.
Мерзка есть служба сергиевцев, хлеб же их скверна в очах Господних, вопиял еси пастырь добрый овцам, сего ради бежим их, да не внидет с нами в суд Господь.
Возжег еси себе отче Викторе, огнем ревности по Церкви, юже ти вручи пастыреначальник Христос, учаще блюсти себе обновления онаго, и пребыти в вере, юже Господь апостолом предаде.
Богородичен: Тя светлый облак солнца умнаго, Богорадованная, поюще славим: сердца наша просвети, тьму отгоняющи всю уныния и страстей, Богоневесто.
Кондак, глас 4:
Победы венец с небесе прием, преславне Викторе, просиял еси учении и страдании паче солнца, тьму безбожия и ереси отгнав, спасай верою празднующих память твою.
Икос:
Зиме злобы прешедши, благодати весну достигл еси святителю, и процвете ти вечныя жизни цвет, вонями веселящь Божиих оружников и красящ главы исповедавших Того пред мучители. Сих веселия исполнен сый, не забуди нас молитвами си да выну с тобою зовем Отцу и Сыну со Святым Духом: Аллилуия.
Песнь 7
Ирмос: Пещь, Спасе, орошашеся, отроцы же, ликующе, пояху: отцев Боже, благословен еси.
Смущенным же пастырям церковным, и лютою зимою зол истаеваемым, взывал еси отче Викторе, аще соль обуяет, чим верные осолятся? Не устрашимся ити за Христом, вопиюще: отцев Боже, благословен еси.
Вдался еси воем безбожным, Викторе, и яко адамант твердейший показася, имел бо еси Христа в сердце и Духа Святаго во устнех вопиюща: отцев Боже благословен еси.
Не убояся советский мучитель темничным тя мукам предати, но тщи отыде от тебе, огнем исповедания твоего попален, темже яко немощный в места северная тя посылает.
Александра верная и Ангелина преподобная вслед тебе текоша, Викторе, в чертог небесный внити желая, и с тобою воспети песнь спасительную: отцев Боже благословен еси.
Богородичен: Плоть прият из тебе, Чистая, Содержай тварь всю и земли концы, и умрети нас ради изволи: Егоже зрящи воскресша со славою от гроба, возвесилися.
Песнь 8
Ирмос: Царя славы и Победителя смерти, Иисуса Назорея, Того превозносите во вся веки.
Хлеб небесный в себе имуще, питал еси алчущих, отче, хлебом земным ти присылаемым, да прославится Бог милости и щедрот, и посрамится советская власть велиара.
В любви кротчайший, и в вере твердейший пребыл еси, Викторе, словеса бо Павловы возжелел еси исполнити, яже ни муки ни мразы ни меч от любве Христовы отлучити ны не возмогоша.
Богородичен: Силою твоею, Пречистая, озари люди во тьме неведения седящия, да уклонятся злых и притекут к мученикам новым, и тех вере последуют, и вкупе с нами прославят Господа.
Песнь 9
Ирмос: Тя, гору Божию усыренную, в нейже благоволи Бог плотию вселитися, Богородицу Марию величаем.
Верою прешел еси, Викторе, мучения от безбожных, и лесть сергиеву посрамил еси яко ересь хульную, победителя воистину яви тя Бог, Егоже величаем.
Зырянстии люди питал еси словом и наставлением еже к вере, Викторе, и видеша тя яко Христа щедра и милостива, и прославиша Бога отец наших, Егоже величаем.
Блаженны вы, мученицы новии, Христа бо до смерти возлюбисте, и иже на вас мук не убоявшеся, явили есте нам путь прав и стезю неблазненну к вышнему Царствию.
Богородичен: Радуйся, Марие, серафим и херувим честнейшая, человеком Бога Слова рождшая, смерти врата сокрушившаго и мертвыя от гроб воздвигшаго.
Светилен:
Света солнечнаго светлейше мучеников слава, от нихже един бе Виктор Вятский, земли севера озарив своими страдании, и венец победы прием от Христа светодавца, просвещает душы наша.
Слава и ныне: праздника.
На хвалитех стихиры святаго, глас 4:
Подобен: Яко добля в мученицех.
Всеял еси, мучениче Викторе, / страдании своими / семя жизнетворное / в мертвенное человеческое естество, / и возрасте в тебе / клас безсмертия,/ егоже пожа обильно в небесную житницу, / идеже лицы святых сияют / и славят воскресшаго Христа.
Внешняго человека тлеемаго / небрегл еси, Викторе, / паче внутренняго обновляя, / и твердым веры исповеданием / всего себе Богу присвояя, / обрел на небеси славу некончаемую, / нам же тело твое нетленное оставил еси, / яко Духа скинию божественную, / воскресения конечнаго уверительную.
Адаманта веры каменя / не возможе тя сокрушити меч безбожных, / аще и крепко биюще, но тщи отыдоша, / тем и течение совершив, / горняго Сиона достигл еси, Викторе / с мученики водворяяся, / и почести вышняго звания прием, / божественнаго света наслаждаешися / моли спастися всем нам.
Ученьми твоими пресветлыми святителю, / упасл еси стадо твое / на пажити евангельстей, / и при водах преданий спасительных, / и безбожия закла отверстая уста, / ярящаяся верныя поглотити / и имя Христово забвению предати, / темже твою совершающе память / поем Воскресшаго из гроба.
Слава, глас 2:
Желанием божественным распалився / и святых отец предания держа, / удержал еси правду церковную Викторе, / в годину искушения противостал еси диаволу, / духом не смущаяся / и упование имуще на единаго Господа, / силен бо Господь управити Церковь Свою / и мглы и бури злобы разгнати / аще пребудем Ему верными до смерти.
И ныне, праздника.
По славословии тропарь святаго, Слава и ныне: праздника. Ектении и отпуст, и дается святый елей от кандила святаго, и час 1.
На литургии: блаженна праздника, песнь рядовая, и от канона святаго песнь 3. Прокимен праздника и святаго, глас 7: Возвеселится праведник о Господе: Стих: Услыши, Боже, глас мой:
Апостол дне и святаго
Аллилуия дне и святаго глас 4: Праведник яко финикс процветет:
Евангелие дне и святаго: Луки зачало 67.
Аще случится память священномученика Виктора в един от дней Светлой седмицы или в Неделю мироносиц, или разслабленнаго, или самаряныни, зри о сем указ о празднице великомученика Георгия.