Песнь 1.
Кано́н пе́рвый пра́здника на 4, творе́ние кир Космы́ мона́ха, его́же краегране́сие: Креще́ние очище́ние земноро́дных грехо́в. Глас 2.
Ирмо́с: Глубины́ откры́л есть дно/ и су́шею Своя́ влече́т,/ в ней покры́в проти́вныя,/ кре́пкий во бране́х Госпо́дь,/ я́ко просла́вися.
Ада́ма истле́вшаго обновля́ет струя́ми Иорда́нскими/ и змие́в главы́ гнездя́щихся сокруша́ет Царь веко́в, Госпо́дь,/ я́ко просла́вися.
Огне́м Божества́ Невеще́ственным/ в плоть веще́ственну оде́явся, Иорда́нскою облага́ется водо́ю/ воплоще́йся от Де́вы Госпо́дь, я́ко просла́вися.
Скве́рну омыва́яй челове́ков, сим очи́щся во Иорда́не,/ и́мже, восхоте́в, уподо́бися, е́же бе пребы́в,/ су́щия во тьме просвеща́яй Госпо́дь, я́ко просла́вися.
Ин кано́н на 4, творе́ние Иоа́нна Дамаскина́, глас 2.
Ирмо́с: Ше́ствует морску́ю волня́щуюся бу́рю,/ су́шу а́бие Изра́иль я́вльшуюся./ Че́рмный же понт триста́ты еги́петския/ покры ку́пно, водостла́нен гроб,/ си́лою кре́пкою десни́цы Влады́чни.
У́тру я́вльшуся челове́ком светоно́сну/ ны́не из пусты́ни, к вода́м Иорда́нским преклони́л еси́, Царю́ со́лнца, Твою́ вы́ю,/ ли́ка мра́чна родонача́льника исхи́тити,/ скве́рны же вся́кия очи́стити тварь.
Безнача́льне, струя́м спогре́бшася Тебе́, Сло́ве,/ но́ваго прево́диши, истле́вшаго ле́стию,/ Сего́ несказа́нно от Отца́ прие́м глас держа́вен:/ Сей возлю́бленный, ра́вен же Мне О́трок естество́м
|
|
Канон святе́й Ни́не кано́н на 6, глас 1.
Ирмо́с: Спа́се лю́ди чудоде́йствуяй Влады́ка,/ мо́крую мо́ря во́лну оземлени́в дре́вле;/ во́лею же ро́дждся от Де́вы,/ стезю́ проходну Небесе́ полага́ет нам./ Его́же, по Существу́ ра́вна же Отцу́ и челове́ком, сла́вим.
Отве́рзи устне́ мои́, Христе́ Бо́же,/ да восхвалю́ де́ву равноапо́стольную и пропове́дницу Ни́ну воспою́,/ и просвети́ ум мой,/ да досто́йную цве́ты слове́с укра́шу по достоя́нию.
Ре́чи чужды́х ти племе́н уразуме́ла еси́, прехва́льная Ни́но,/ и, от Ду́ха Свя́та умудре́на бы́вши, в виде́нии Сама́го Го́спода узре́ла еси́./ Те́мже в земли́ непло́дней, Богому́драя де́во,/ лю́ди И́верския ко Христу́ привела́ еси́.
Жестосе́рдыя ва́рвары, куми́ром служа́щия,/ я́ко голуби́ца, от за́пада воспари́вшая,/ любо́вию твое́ю обрати́ла еси́ ко Творцу́/ и, благода́тию обновле́нныя, неве́сто Христо́ва непоро́чная,/ Жениху́ твоему́ обручи́ла еси́.
Богоро́дичен: Сосу́д благосты́ни Твоея́, Пречи́стая Де́во Богоро́дице, бысть свята́я де́ва/ и страну́, жре́бием Тебе́ свиде́тельствовану, просвети́./ Сего́ ра́ди мо́лим Тя:/ сию́ приими́ с Тобо́ю в моли́тву о вопию́щих Тебе́:/ поми́луй жре́бий Твой.
Катава́сия: Глубины́ откры́л есть дно: и друга́я: Ше́ствует морску́ю:
Песнь 3.
Кано́н пе́рвый пра́здника на 4. Глас 2.
|
|
Ирмо́с: Кре́пость дая́й царе́м на́шим Госпо́дь/ и рог пома́занных Свои́х вознося́й/ от Де́вы ражда́ется, гряде́т же ко Креще́нию./ Тому́, ве́рнии, возопие́м:/ несть свят, я́ко Бог наш.
Непло́дная дре́вле и безча́дная лю́те, днесь весели́ся, Христо́ва Це́рковь:/ водо́ю бо и Ду́хом сы́нове тебе́ роди́шася, ве́рою взыва́юще:/ несть свят, я́коже Бог наш.
Ве́лиим гла́сом в пусты́ни вопие́т Предте́ча:/ Христу́ угото́вайте пути́/ и стези́ Бо́гу на́шему пра́вы соде́лайте, ве́рою взыва́юще:/ несть свят, я́коже Бог наш.
Ин кано́н праздника на 4, глас 2.
Ирмо́с: Ели́цы дре́вних изреши́хомся се́тей/ бра́шен львов, сотре́нных члено́вными,/ ра́дуимся и разшири́м уста́,/ сло́во плету́ще от слове́с сладкопе́ния,/ и́мже к нам наслажда́ется дарова́ний.
Умерщвле́ние пе́рвее насади́вый тва́ри,/ зве́ря злоде́йственнаго вообра́жься в естество́,/ омрача́ется плотски́м прише́ствием:/ у́тру я́вльшуся, прирази́вся Влады́це сокруши́ти свою́ вражде́бную главу́.
Влече́т к себе́ Богозда́нное естество́, утро́бы мучи́теля, погребе́нное преде́лы;/ ражда́ется па́ки земноро́дных Обновле́ние,/ де́ло держа́вно соверша́я Влады́ка:/ прии́де бо, то́е очи́стити хотя́.
Канон святе́й Ни́не кано́н на 6, глас 1.
Ирмо́с: Призри́ на пе́ния рабо́в, Благоде́телю,/ врага́ смиря́я вознесе́нную горды́ню,/ нося́й же, Всеви́дче, греха́ превы́ше,/ непоколе́блемо утвержде́ныя, Бла́же, певцы́/ основа́нием ве́ры.
|
|
Милосе́рдия ра́ди Своего́ ми́лостивно помяну́в нас,/ усе́рдну благове́стницу соде́ла тя Бог,/ жену́ су́щу, му́жеским смы́слом укра́шену,/ и испо́лнену Ду́ха Свя́та яви́ нам,/ и твое́ю про́поведию о Христе́, чрез ве́ру в Него́, нас усынови́л есть.
Покрыва́ло от серде́ц на́ших безчу́вственных отпаде́,/ отягче́нный слух наш от гла́са про́поведи твоея́ откры́ся,/ омраче́ние ума́ на́шего разсе́яся све́том уче́ния Христо́ва, тобо́ю возвеще́ннаго,/ о свята́я равноапо́стольная Ни́но, до́блественная учени́це Христо́ва.
Покланя́вшиися иногда́ куми́ром и пребыва́вший во тьме нече́стия/ от ле́сти и́дольския твои́м прише́ствием, блаже́нная Ни́но, свободи́шася,/ Арма́з же вострепета́, егда́ гром возгреме́,/ и неи́стовства За́дена преста́ша.
Богоро́дичен: Тобо́ю, Богоро́дице Де́во, от ро́ва нече́стия подъя́ти бы́хом,/ егда́ Ти уго́дно бысть просвеще́ние на́ше жено́ю сотвори́ти,/ повнегда́ же изы́ти нам от купе́ли святы́я,/ позна́хом Сы́на Твоего́ и Бо́га на́шего блаже́нною Ни́ною.
Конда́к, глас 4:
Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́ и яви́лся еси́,/ Свет Непристу́пный.
И́кос:
Галиле́и язы́честей, Завуло́нстей стране́ и Неффали́мстей земли́,/ я́коже рече́ проро́к, Свет вели́к возсия́, Христо́с./ Омраче́нным све́тла яви́ся Заря́, из Вифлее́ма облиста́ющая,/ па́че же из Мари́и Госпо́дь, всей вселе́нней возсиява́ет лучи́ Со́лнце пра́вды./ Те́мже, и́же от Ада́ма нази́и, прииди́те вси, облече́мся в Него́, да согре́емся,/ покрыва́ет бо наги́я и просвеща́ет те́мныя./ Прише́л еси́ и яви́лся еси́, Свет Непристу́пный.
Седален, глас 2:
Я́коже со́лнце незаходи́мое, Со́лнца Пра́вды – Христа́ Бо́га/ пропове́дница, светоза́рная звезда́, све́тлый вселе́нныя свети́льник,/ неоцене́нное сокро́вище И́верския страны́,/ днесь Ни́на в земли́ на́шей сия́ет и благоуха́ет,/ наста́вница на́ша, равноапо́стольная раба́ Христо́ва.
Сла́ва, и ны́не, пра́здника.
Егда́ явле́нием Твои́м просвети́л еси́ вся́ческая,/ тогда́ сла́ное неве́рия мо́ре побеже́,/ и Иорда́н, до́ле теки́й, возврати́ся,/ к Небеси́ возвыша́я нас./ Но высото́ю Боже́ственных за́поведей Твои́х/ соблюди́, Христе́ Бо́же, моли́твами Богоро́дицы и поми́луй нас.
Песнь 4.
Кано́н пе́рвый пра́здника на 4. Глас 2.
Ирмо́с: Услы́шах, Го́споди, глас Твой, его́же рекл еси́,/ глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/ весь быв соше́дшаго Ду́ха, возопи́:/ Ты еси́ Христо́с, Бо́жия му́дрость и си́ла.
Очища́емо со́лнце кто ви́де, -/ пропове́дник вопие́т, – пресве́тлое естество́м?/ Да Тебе́ вода́ми, сия́ние Сла́вы, Отца́ о́браз Присносу́щнаго, омы́ю/ и, се́но сый, Огню́ прикосну́ся Твоего́ Божества́?/ Ты бо еси́ Христо́с, Бо́жия му́дрость и си́ла.
Яви́ Боже́ственное, е́же име́, благогове́ние Моисе́й, прилучи́вся Тебе́,/ я́ко бо из купины́ Тя, возгласи́вша, разуме́, а́бие отврати́ лице́./ Аз же ка́ко Тя уви́жу я́сно?/ Или́ ка́ко руку́ положу́ на Тя?/ Ты бо еси́ Христо́с, Бо́жия му́дрость и си́ла.
Душе́вное соверша́я му́дре и сло́вом почте́нный, безду́шных стыжду́ся./ А́ще бо крещу́ Тя, клеве́тна ми есть огне́м дымя́щаяся гора́,/ побе́гшее же мо́ре на дво́е и Иорда́н сей, возврати́выйся:/ Ты бо еси́ Христо́с, Бо́жия му́дрость и си́ла.
Ин кано́н праздника на 4, глас 2.
Ирмо́с: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние явля́ющ неизрече́нна Сло́ва,/ И́мже си́льных держа́вы сотро́шася.
По́слан от Отца́, всесве́тлое Сло́во, но́щи отгна́ти зломра́чное стремле́ние,/ и искорени́ти гряде́ши челове́ков грехи́,/ сы́ны же привлещи́, Твои́м Креще́нием, Бла́же,/ све́тлы от струй Иорда́нских.
Са́мое прови́дев нарече́нное Сло́во, я́сно пропове́дник вопие́т тва́ри:/ Сей пре́жде мене́, вторы́й пло́тию сообра́зен,/ просия́ Боже́ственною си́лою вражде́бный наш отъя́ти грех.
Па́жить у Себе́ животво́рну нося́, уловля́ет змие́в,/ гне́здам натека́я мно́гими сетьми́, низлага́я, Бог Сло́во,/ запина́ет же уязви́вшаго всеми́рный род,/ сего́ потре́бль, избавля́ет тварь.
Канон святе́й Ни́не кано́н на 6, глас 1.
Ирмо́с: Ро́да челове́ча обновле́ние/ дре́вле, поя́, проро́к Авваку́м предвозвеща́ет,/ ви́дети неизрече́нно сподо́бився о́браз:/ млады́м Младе́нец бо из горы́ – Де́вы изы́де,/ люде́й во обновле́ние, Сло́во.
Я́коже лев, безстра́шна пребы́вши,/ кре́пце Христа́ Бо́га пропове́дала еси́:/ па́рфян си́лою чуде́с улови́ла еси́,/ Гаиани́ю же и Рипсими́ю по́двигом до́блественнаго их му́ченичества в дар Христу́ принесла́ еси́./ Той же сохрани́ тебе́ саму́ю,/ во еже́ просвети́ти тобо́ю И́верскую страну́.
Я́коже оре́л, во о́чию твое́ю возобрази́ла еси́ И́верскую страну́ на́шу, пресла́вная Ни́но,/ и, свято́ю ре́вностию по Бо́зе разже́гшися,/ святы́м Ева́нгелием сию́ просвети́ла еси́.
Власть иму́щи разгна́ти мглу,/ му́драго царя́ просвети́ла еси́,/ равноапо́стольному царю́ Константи́ну уподо́бльшися, наста́внице на́ша и врачу́ смы́сленный./ Сего́ ра́ди ублажа́ем и́мя твое́, де́во,/ пропове́днице Христа́, вели́кая равноапо́стольная Ни́но.
Богоро́дичен: От ле́сти и́дольския Тобо́ю, Богоро́дице, изба́влены бы́вше лю́дие И́верстии,/ и́хже Тебе́ жре́бий показа́,/ и, благове́стием преподо́бныя ма́тере на́шея Ни́ны озаре́ни бы́вше,/ взыва́ют к Тебе́:/ избавле́ние на́ше, спаси́ ны, Ма́ти Христа́ Бо́га.
Песнь 5.
Кано́н пе́рвый пра́здника на 4. Глас 2.
Ирмо́с: Иису́с, живота́ Нача́льник,/ разреши́ти осужде́ние гряде́т Ада́ма первозда́ннаго,/ очище́ний же, я́ко Бог, не тре́буя,/ па́дшаго очища́ет во Иорда́не,/ в не́мже вражду́ уби́в,/ преиму́щ всяк ум мир да́рует.
Сше́дшимся без числа́ лю́дем от Иоа́нна крести́тися, сам посреде́ их ста./ Провозгласи́ же предстоя́щим:/ кто показа́, непокори́вии, гне́ва вам уклони́тися, хотя́щаго бы́ти?/ Плоды́ досто́йны Христу́ сотвори́те:/ Предстоя́й бо ны́не мир да́рует.
Де́латель и Зижди́тель, посреде́ стоя́й, я́ко Еди́н всех сердца́ испыту́ет,/ чисти́тельную же лопа́ту руко́ю прие́м,/ всеми́рное гумно́ всему́дре разлуча́ет, непло́дие паля́,/ благопло́дным ве́чный живо́т да́рует.
Ин кано́н праздника на 4, глас 2.
Ирмо́с: Врага́ те́мнаго и оскверне́ннаго я́да/ очище́нием Ду́ха измове́ни,/ к но́вой приста́хом небла́зненной стези́,/ вводя́щей в непристу́пную ра́дость, Еди́нем присту́пну,/ и́мже Бог примири́ся.
Ви́дев Зижди́тель во мра́це прегреше́ний плени́цами неизбе́жными/ его́же вообрази́ персты́, поставля́ет на обою́ ра́му, воздвиг горе́, ны́не во многотеку́щих вода́х омыва́я студа́ дре́вняго/ Ада́мова зла́го нра́ва.
Со благоче́стием притеце́м приле́жно ко исто́чником пречи́стым тече́ния спаси́тельнаго,/ Сло́во усмотря́юще от Нетле́нныя,/ почерпа́ла принося́ще жа́жди Боже́ственныя,/ ми́ра сла́достне исцеля́я неду́г.
Канон святе́й Ни́не кано́н на 6, глас 1.
Ирмо́с: Из но́щи дел омраче́нный пре́лести/ очище́ние нам, Христе́,/ бо́дренно ны́не соверша́ющим песнь, я́ко Благоде́телю,/ прииди́, подава́яй удо́бну стезю́,/ по не́йже востека́юще, обря́щем сла́ву.
Падо́ша и́доли во стране́ И́верстей/ и созда́шася хра́мы Госпо́дни тобо́ю, ма́ти на́ша./ Мы же, ча́да Сио́на, тобо́ю просвеще́ни бы́вше,/ днесь прославля́ем Триипоста́сное Божество́,/ сла́вим Честны́й Крест Христа́ и чествуе́м цельбоно́сный хито́н Его́.
Сы́нове тех, и́же от дней столпотворе́ния Вавило́нска злоче́стием плене́ни бы́ша/ и песнь Госпо́дню воспева́ти не разуме́ша,/ ны́не изше́дше от святы́я купе́ли, глаго́лют:/ во Христа́ облеко́хомся, во Христа́ крести́вшеся.
Егда́ ца́рствова фарао́н над еги́птяны,/ ти́и, во тьме еги́петстей седя́ше,/ и́стинному Бо́гу служи́ти не мого́ша;/ днесь же мы, ча́да Сио́на, Ни́ною изба́влены бы́вше,/ ра́достно пои́м Го́сподеви.
Богоро́дичен: Егда́ приспе́ ко мне врач, Пресвята́я Богоро́дице,/ тогда́ воста́х от одра́ моего́, немощству́яй,/ и преподо́бною Ни́ною изба́вихся от ле́сти и́дол нечи́стых, сия́ род И́верский взыва́ет, глаго́ля:/ воспева́ю Тя, упова́ние мое́, Ма́ти Бо́жия.
Песнь 6.
Кано́н пе́рвый пра́здника на 4. Глас 2.
Ирмо́с: Глас Словесе́, свети́льник Све́та,/ денни́ца Со́лнца, Предте́ча в пусты́ни, -/ пока́йтеся́ – всем вопие́т лю́дем, – и предочи́ститеся:/ се бо предстои́т Христо́с,/ от тли мир избавля́яй.
Ро́ждься нетле́нно от Бо́га и Отца́,/ от Де́вы кроме́ скве́рны воплоща́ется Христо́с,/ Ему́же реме́нь, я́же от нас Сло́ва сочта́ния, разреши́ти неудо́б, учи́т Предте́ча,/ земноро́дныя от ле́сти избавля́я.
Огне́м крести́т коне́чным Христо́с проти́вныя,/ а не Бо́га му́дрствующих Его́,/ Ду́хом же обновля́ет водо́ю благода́ти разумли́выя Божества́ Его́,/ от прегреше́ний избавля́я.
Ин кано́н праздника на 4, глас 2.
Ирмо́с: Вожделе́ннаго я́вствова со всеблаже́нным гла́сом Оте́ц,/ Его́же из чре́ва отры́гну:/ ей, – глаго́лет, – Сей соесте́ствен Сын,/ Сый светоза́рен,/ произни́че из челове́ча ро́да:/ Сло́во же Мое́ жи́во и Челове́к промышле́нием.
От глуби́ннаго льва, тревече́рний стра́нне проро́к во вну́тренних валя́яся,/ а́бие произы́де, пакибытия́ спасе́ние/ от зми́я человекоуби́йцы всем предъявля́я в после́дняя ле́та.
Отве́рсту Не́бу всесве́тлых писа́ний, учени́к зрит от Отца́ посыла́емый,/ пребыва́ющ же Дух на Пречи́стем Сло́ве,/ наше́д я́ко го́лубь неизрече́нным о́бразом,/ лю́дем же явля́ется, прише́дшим ко Влады́це.
Канон святе́й Ни́не кано́н на 6, глас 1.
Ирмо́с: Обита́я Ио́на в преиспо́дних морски́х,/ приити́ моля́шеся и бу́рю утоли́ти;/ унзе́н же аз муча́щаго стрело́ю,/ Христу́ воспева́ю, зол губи́телю,/ ско́ро приити́ Тебе́ к мое́й ле́ности.
Возсия́вшу све́ту от за́пада, преста́ни, се́вере, и пове́й, ю́же49,/ со́лнце бо восхо́дит разгна́ти мглу,/ и близ есть дхнове́ние теплоты́, во еже́ та́яти ле́ду:/ се гряде́т пропове́дница Христа́, Ни́на свята́я.
От тьмы и́дольския изба́влени бы́вше тобо́ю, равноапо́стольная Ни́но,/ вси лю́дие Картали́нстии воспева́ют тя и умиле́нно взыва́ют:/ отжени́ от нас зло́бу, диа́вола же и супоста́ты на́ша порази́.
Угото́ванная тобо́ю при столпе́ животво́рнем/ и ме́сте хране́ния хито́на Госпо́дня купе́ль свята́я/ не мертви́т младе́нцы, но сия́ возражда́ет, еле́ем святы́м умаща́ющи./ Те́мже вопие́м ти:/ ра́дуйся, дево, равноапо́стольная Ни́но.
Богоро́дичен: Наде́ждо непосты́дная наде́ющихся на Тя,/ еди́на, ро́ждшая па́че естества́ пло́тию Христа́ Бо́га на́шего,/ Того́ со блаже́нною Ни́ною моли́ пода́ти И́верстей стране́ утвержде́ние и преспе́яние в ве́ре/ и всем нам пре́жде конца́ жития́ исправле́ние.
Конда́к, глас 2:
Прииди́те днесь вси,/ воспои́м избра́нную от Христа́/ равноапо́стольную пропове́дницу Бо́жия сло́ва,/ му́друю благове́стницу,/ лю́ди Картали́нии приве́дшу на путь живота́ и и́стины,/ Богома́тере учени́цу,/ усе́рдную засту́пницу и неусыпа́ющую храни́тельницу на́шу,/ Ни́ну прехва́льную.
И́кос:
В гу́слех духо́вных да восхва́лится му́драя пропове́дница, Иве́рии просвети́тельница,/ в купе́ли Креще́ния избра́нными па́стырьми освяти́вшая лю́ди,/ жре́бием свиде́тельствованный,/ равноапо́стольная, возлю́бленная раба́ Христо́ва,/ я́же де́сять за́поведей Бо́жиих прия́т, я́коже Моисе́й Богови́дец./ Прииди́те у́бо, днесь ублажи́м пе́сньми/ усе́рдную засту́пницу и неусыпа́ющую храни́тельницу на́шу,/ Ни́ну прехва́льную.
Песнь 7.
Кано́н пе́рвый пра́здника на 4. Глас 2.
Ирмо́с: Ю́ноши благочести́выя, пе́щи о́гненней приобщи́вшияся,/ шумя́щ дух ро́сный невреди́мы сохрани́/ и Бо́жия А́нгела снизхожде́ние./ Те́мже, в пла́мени ороша́еми, благода́рственно воспева́ху:/ препе́тый отце́в Го́споди и Бо́же, благослове́н еси́.
Я́коже на Небеси́, с тре́петом и чу́дом предстоя́ху/ во Иорда́не си́лы А́нгельския, смотря́юще толи́ка Бо́жия схожде́ния:/ я́ко Держа́й превы́шних вод соста́в, в вода́х Плотоно́сец стоя́ше,/ Бог отце́в на́ших.
О́блак дре́вле и мо́ре Боже́ственнаго прообража́ху Креще́ния чу́до,/ в ни́хже дре́внии крести́шася, исходя́ще зако́ннии лю́дие./ Мо́ре же бе о́браз воды́, и о́блак – Ду́ха./ И́миже соверша́еми, – благослове́н еси́, – зове́м, – Го́споди Бо́же, во ве́ки.
Вси ве́рнии, в Не́мже соверше́ние прия́хом,/ богосло́вяще немо́лчно со А́нгелы, просла́вим Отца́, и Сы́на, и Ду́ха Свята́го:/ се бо – Тро́ица, Ипоста́сьми Единосу́щная, Еди́н же Бог./ Ему́же пое́м: благослове́н еси́, Го́споди Бо́же, во ве́ки.
Ин кано́н праздника на 4, глас 2.
Ирмо́с: Опали́ струе́ю зми́евы главы́ пе́щный высо́кий пла́мень,/ ю́ноши нося́щ благочести́выя,/ ути́шивый неудободержи́мую мглу из греха́/ всю же омыва́ет росо́ю Ду́ха.
Тебе́ живопису́ющий ассири́йский пла́мень ужа́сен поставля́еши, в ро́су преведе́н;/ те́мже вода́ ны́не, я́коже пла́мень, одева́яй, вре́дную зло́бу, Христе́, прикрове́нную опаля́ет,/ от поползнове́нныя стези́ призыва́ющи.
Разде́льшуся Иорда́ну дре́вле, по су́ху прехо́дят лю́дие Изра́ильстии,/ Тебе́, Держа́внейшаго, содержа́ща тварь некосни́тельне,/ ны́не в вода́х напису́ющии, к нетле́нней и поле́зней стези́.
Ве́мы, пе́рвее всепа́губный пото́п/ ми́лостивно Тя всех во тлю привести́,/ о, тревели́кия сотворя́я и стра́нная́/ Ны́не же пото́пльша, Христе́, грех за благосе́рдие и челове́ческое спасе́ние.
Канон святе́й Ни́не кано́н на 6, глас 1.
Ирмо́с: Всецаря́ любо́вию уловле́ннии, о́троцы/ укори́ша безчи́сленно яря́щася мучи́теля злобо́жное языковре́дие./ И́мже повину́ся огнь мно́гий,/ Влады́це глаго́лющим:/ во ве́ки благослове́н еси́.
Черто́зи царя́ и цари́цы я́ко пле́нницу и стра́нницу тя призре́ша,/ оба́че и сия́ от пле́на преиспо́дняго благода́тию Христо́вою привела́ еси́ ко Христу́ Бо́гу,/ Ни́но равноапо́стольная, благове́стнице спасе́ния.
Внегда́ воздви́гнути тебе́ столп святы́й и возде́яти ру́це твои́,/ устраши́шася си́лы диа́вола и со тре́петом бежа́ша, возрыда́ша го́рько./ Мы же вопие́м:/ благослове́н еси́, Христе́ Бо́же, во ве́ки.
Возвеща́емым словесе́м твои́м, падо́ша ниц лю́дие,/ я́ко от гла́са труб царе́вых, и ца́рства и ца́рие вострепета́ша, глаго́люще:/ о пле́ннице и пле́нных свобожде́ние!/ Буди́ благослове́но прише́ствие твое́.
Богоро́дичен: Я́ве предрече́нная проро́ки, Ма́ти Бо́жия, Пренепоро́чная Де́во Мари́е,/ пребыва́нием Твои́м во Еги́пте с Богомладе́нцем Иису́с Христо́м/ истука́ны еги́петския сокруши́ла еси́ до основа́ний/ и Ни́ною потреби́ла еси́ куми́ры Картали́нии,/ бу́ди благослове́на, Присноде́во.
Песнь 8.
Кано́н пе́рвый пра́здника на 4. Глас 2.
Ирмо́с: Та́йну пресла́вную вавило́нская показа́ пещь,/ источи́вшая ро́су,/ я́ко струя́ми имя́ше невеще́ственный Огнь восприя́ти Иорда́н/ и объя́ти пло́тию креща́ема Зижди́теля,/ Его́же благословя́т лю́дие и превозно́сят во вся ве́ки.
Отложи́ страх весь, – Изба́витель Предте́чи рече́, -/ Мне же повини́ся, я́ко Благо́му,/ Мне приступи́, сие́ бо естество́м бых,/ Мои́м повеле́нием покори́ся и крести́ Мя, соше́дшаго,/ Его́же благословя́т лю́дие и превозно́сят во вся ве́ки.
Глаго́лы я́коже услы́ша Крести́тель Влады́чни, с тре́петом длань простира́ет,/ оба́че же, руко́ю косну́вся верху́ Зижди́теля своего́, Кре́щшемуся вопия́ше:/ освяти́ мя, Ты бо еси Бог мой,/ Его́же благословя́т лю́дие и превозно́сят во вся ве́ки.
Тро́ицы явле́ние во Иорда́не бысть,/ са́мое бо Пребоже́ственное Естество́, Оте́ц, возгласи́:/ Сей креща́емый – Сын возлю́бленный Мой,/ Дух же прии́де к Подо́бному,/ Его́же благословя́т лю́дие и превозно́сят во вся ве́ки.
Ин кано́н праздника на 4, глас 2.
Ирмо́с: Свобо́дна у́бо тварь познава́ется/ и сы́нове Све́та пре́жде омраче́ннии;/ еди́н сте́нет тьмы предста́тель./ Ны́не да благослови́т усе́рдно Вино́внаго/ пре́жде окая́нное язы́ков всенасле́дие.
Трие́ Богови́днии, во огни́ ороша́еми, озаря́ющеся треми́ всесве́тле святы́нями,/ я́ве показова́ху Превы́шнее Естество́ смеше́нием челове́ческим,/ огнепаля́щее росо́ю ми́лостивно вся́ку па́губную лесть.
Да убели́тся вся́кое земно́е естество́,/ от паде́ния ны́не на Не́бо возводи́мо,/ И́мже бо вся соблюда́ются, Сло́вом, теку́щими струя́ми омы́вшеся,/ прегреше́ний пре́жних убеже́, пресве́тло измове́но.
Канон святе́й Ни́не кано́н на 6, глас 1.
Ирмо́с: Утро́бу неопа́льно образу́ют Отрокови́цы/ и́же в Ве́тсем опаля́емии ю́ноши,/ преесте́ственно ражда́ющую запечатле́нну;/ обоя́ же содева́ющи чудоде́йство еди́но,/ лю́ди к пе́нию возставля́ет благода́ть.
Па́мяти святы́я Ни́ны подоба́ет пра́зднество./ Прииди́те у́бо, ве́рнии, Христу́, просла́вим и возблагодари́м ми́лостиваго Бо́га./ Ро́ди же, и племена́, и ча́да Сио́на, в духо́вней ра́дости торжеству́йте ку́пно с на́ми, глаго́люще:/ сла́ва пропове́днице Христа́ и Бо́га на́шего.
Ра́дуйся, стране́ Картали́нская,/ от Ни́ны венце́м Христо́вым венча́нная, свети́ся и благоукраша́йся:/ призыва́ет бо ны равноапо́стольная свята́я Ни́на,/ све́том Госпо́дним вся озаря́ющи.
Ты запове́дала еси́ нам, равноапо́стольная, ве́ру свя́то блюсти́,/ е́йже новообраще́нныя лю́ди научи́ла еси́./ Сего́ ра́ди вертогра́ды, яже насади́ла еси́ в духо́вней па́стве твое́й,/ посети́ и утверди́.
Богоро́дичен: О Ма́ти Христа́ Бо́га, Творца́ су́щих,/ сподо́бльшийся Тобо́ю жи́зни ве́чныя род Картали́нский храни́/ моли́твами Ни́ны блаже́нныя.
Песнь 9.
Кано́н пе́рвый пра́здника на 4. Глас 2.
Ирмо́с: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице,/ оба́че, Блага́я су́щи, ве́ру приими́,/ и́бо любо́вь ве́си Боже́ственную на́шу:/ Ты бо христиа́н еси́ Предста́тельница, Тя велича́ем.
Дави́де, прииди́ Ду́хом к просвеще́нным, -/ ны́не приступи́те, – пой к Бо́гу, -/ ве́рою, – глаго́ля, – просвети́теся/ Сей ни́щий воззва́ Ада́м в паде́нии, и́бо Того́ услы́ша Госпо́дь,/ прише́д, струя́ми Иорда́нскими тле́ннаго же обнови́.
Иса́ия, – измы́йтеся, очи́ститеся – глаго́лет, -/ лука́вствия пред Го́сподем оста́вите./ Жа́ждущии, на во́ду жи́ву иди́те:/ кропи́т бо водо́ю, обновля́я, Христо́с приступа́ющия к Нему́ ве́рою/ и к животу́ нестаре́емому креща́ет Ду́хом.
Соблюда́емся благода́тию, ве́рнии, и печа́тию./ Я́ко бо губи́теля, бежа́ша пра́га евре́и, дре́вле окрова́влена,/ та́ко и нам исхо́дное Боже́ственное сие́ пакибытия́ ба́ня бу́дет./ Отсю́ду и Тро́ицы у́зрим Свет Незаходи́мый.
Ин кано́н праздника на 4, глас 2.
Ирмо́с: О, па́че ума́ Рождества́ Твоего́ чуде́с'/ Неве́сто Всечи́стая, Ма́ти Благослове́нная,/ Е́юже получи́вше всесоверше́нное спасе́ние,/ досто́йно хва́лим, я́ко Благоде́теля,/ дар нося́ще – песнь благодаре́ния.
Уве́дехом Моисе́ю купино́ю явле́нная, гряди́, стра́нными уста́вы соде́ланная:/ я́ко бо спасе́ся, Огнь нося́щи, Де́ва, Светоно́сна ро́ждши Благоде́теля,/ во Иорда́нских же струя́х явле́нна.
Помазу́еши, соверша́я челове́ческое существо́, Царю́ Безнача́льне,/ Ду́ха обще́нием, струя́ми чи́стыми отмы́в/ и тьмы кре́пость же посра́мль возвы́шенную,/ ны́не в безпреста́ннем возда́ти житии́.
Канон святе́й Ни́не кано́н на 6, глас 1.
Ирмо́с: Люби́ти у́бо нам я́ко безбе́дное стра́хом/ удо́бее молча́ние;/ любо́вию же, Де́во,/ пе́сни тка́ти, спротяже́нно сложе́нный, неудо́бно есть./ Но и, Ма́ти, си́лу, ели́ко есть произволе́ние, даждь.
Вожделе́нна нам па́мять твоя́,/ ди́вно чудоде́йство твое́, свя́то житие́ твое́ -/ вся нам быва́ют во бла́го тобо́ю, Ни́но целому́дренная.
Прия́телище моще́й твои́х, благода́ть источа́ющих,/ утвержде́ние есть стране́ Ивери́йстей./ Сего́ ра́ди и взыва́ет к тебе́:/ блаже́нная Ни́но, охраня́й нас твои́м заступле́нием.
Пропове́днице и просвети́тельнице,/ при́зри на пе́ние на́ше умиле́нное и уми́лостиви к нам Го́спода,/ не попусти́ нам, хвалы́ твоея́ ревни́телем, во гресе́х поги́бнути/ и, предстоя́щи Престо́лу Бо́жию,/ моли́ Христа́ Бо́га спасти́ся душа́м на́шим.
Богоро́дичен: Услы́ши моле́ния на́ша, Ма́ти Бо́жия,/ и преподо́бныя Ни́ны заступле́нием отжени́ от нас вся искуше́ния,/ да́руй нам ми́лость Твою́ и побе́ду на враги́.
Свети́лен.
Подо́бен: Посети́л ны есть Восто́к свы́ше:
Равноапо́стольная пропове́днице и благове́стнице Христо́ва,/ от наве́т вра́жиих избавля́ющая ны!/ А́ще и в не́дрех земли́ сокрове́на еси́ от о́чию на́шею,/ оба́че жива́ пребыва́еши у Престо́ла Христа́ Бо́га на́шего./ Буди́ у́бо засту́пница усе́рдно чту́щим тя.
Сла́ва, и ны́не, пра́здника.
Яви́ся Спас, благода́ть и и́стина, во струя́х Иорда́нских/ и су́щия во тьме и се́ни спя́щия просвети́л есть,/ и́бо прии́де и яви́ся Свет Непристу́пный.
На хвали́тех стихи́ры на 6, пра́здника 3 и святы́я 3, глас 1:
Ра́дуйся, Це́рковь Бо́жия/ со ча́ды твои́ми,/ блаже́нныя Ни́ны собо́ру сла́вному,/ ра́дуйся и соста́ви духо́вное торжество́,/ во е́же пе́ти пропове́дницу на́шу,/ Ца́рствия Небе́снаго равноапо́стольную благове́стницу.
Зна́мение духо́вное,/ святы́й Крест Христо́в запечатле́ нас,/ прие́мших про́поведь Ни́ны блаже́нныя./ Те́мже и воскли́кнем, глаго́люще:/ о Животворя́щий Кре́сте Госпо́день!/ Храни́ вся ны:/ во Христа́ бо крести́хомся и во Христа́ облеко́хомся./ Ты же, Христе́ Бо́же, спаси́ лю́ди Твоя́.
Сла́ва, глас 2:
Днесь си́лы Небе́сныя с земны́ми ра́дуются,/ днесь страна́ Картали́нская,/ Кресто́м огражде́нная, облека́ется си́лою/ и рог Це́ркве возно́сится,/ днесь храм Пресвяты́я Богоро́дицы/ па́мятию святы́я Ни́ны благоле́пно украша́ется./ Мы же, ве́рнии, воспои́м Христа́, Бо́га же и Челове́ка, и возопии́м:/ сла́ва в Вы́шних Бо́гу.
И ны́не, пра́здника.
Днесь Христо́с на Иoрда́н прии́де крести́тися,/ днесь Иоа́нн каса́ется верху́ Влады́чню./ Си́лы Небе́сныя ужасо́шася,/ пресла́вное ви́дяще та́инство./ Мо́ре ви́де и побеже́,/ Иoрда́н, ви́дев, возврати́ся./ Мы же, просве́щшеся, вопие́м:/ сла́ва яви́вшемуся Бо́гу,/ и на земли́ ви́денному,/ и просвети́вшему мир.
Славосло́вие вели́кое. По трисвяте́м тропа́рь святе́й. Сла́ва, и ны́не, пра́здника. Ектении́ и отпу́ст
На Литурги́и
Блаже́нны от кано́на Богоявле́ний и святы́я, пе́сни 3-я и 6-я. Проки́мен, глас 8: Во всю зе́млю изы́де веща́ние их/ и в концы́ вселе́нный глаго́лы их. Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь. Апо́стол к Кори́нфяном, зача́ло 131. Аллилу́йя, глас 1: Испове́дят небеса́ чудеса́ Твоя́, Го́споди. Стих: Бог прославля́ем в сове́те святы́х. Ева́нгелие от Матфе́я, зача́ло 104. Прича́стен: Во всю зе́млю изы́де веща́ние их и в концы́ вселе́нный глаго́лы их.
Моли́тва
О всехва́льная и преди́вная равноапо́стольная Ни́но, вои́стинну вели́кое украше́ние Це́ркве Правосла́вный и изря́дная похвало́ наро́ду Ивери́йскому, просвети́вшая всю страну́ Грузи́нскую Боже́ственным уче́нием и по́двиги апо́стольства победи́вшая врага́ на́шего спасе́ния, трудо́м и моли́твами насади́вшая зде вертогра́д Христо́в и возра́щшая его́ в плод мног. Пра́зднующе святу́ю па́мять твою́, притека́ем к честно́му ли́ку твоему́ и благогове́йно лобыза́ем всехва́льный дар тебе́ от Бо́жия Ма́тере, чудотво́рный крест, его́же ты обви́ла еси́ драги́ми власы́ твои́ми, и уми́льно про́сим, я́ко при́сную предста́тельницу на́шу: огради́ нас от вся́ких зол и скорбе́й, вразуми́ враго́в Святы́я Це́ркве Христо́вы и проти́вников благоче́стия, охраня́й твое́ ста́до, упасе́нное тобо́ю, и моли́ Всеблага́го Бо́га, Спаси́теля на́шего, Ему́же ты ны́не предстои́ши, да да́рует наро́ду на́шему мир, долгоде́нствие и во вся́ком до́брем начина́нии поспеше́ние, и да приведе́т Госпо́дь нас в Небе́сное Свое́ Ца́рствие, иде́же вси святи́и славосло́вят всесвято́е Его́ И́мя ны́не,и при́сно,и во ве́ки веко́в. Ами́нь.
А́ще пое́м еди́ну слу́жбу пра́здника, а преподо́бных оте́ц на́ших, в Сина́е и Раи́фе избие́нных, пое́м всю слу́жбу в 13-й день, поне́же в си́й день отдае́тся пра́здник Просвеще́ния, пое́м слу́жбу пра́здника си́це:
Ве́чер обы́чная кафи́зма, на Го́споди, воззва́х: стихи́ры на 6: пое́мыя на са́мый пра́здник. Сла́ва, и ны́не: Приклони́л еси́ главу́ Предте́чи: Проки́мен дне́. Вхо́да несть, пареми́й не чтем. Та́же, Сподо́би, Го́споди: и ектения́: Испо́лним вече́рнюю моли́тву: На стихо́вне стихи́ры пра́здника, со стихи́ их. Сла́ва, и ны́не, пра́здника. По Ны́не отпуща́еши, и по трисвято́м тропа́рь пра́здника. Та́же ектениая́: Поми́луй нас, Бо́же: и отпу́ст. Свята́го же, и́же на ряду́, помина́ем на отпу́сте. Воу́трие полу́нощницу пое́м по обы́чаю с кафи́змою, и тропари́ глаго́лем рядовы́я, и моли́тву глаго́лем: Помяни́, Го́споди, в наде́жди воскресе́ния: И отпу́ст.
На у́трени на Бог Госпо́дь: тропа́рь пра́здника три́жды. По кафи́змах седа́льны пра́здника. И чте́ние пра́здника. Кано́н пе́рвый со ирмосо́м на 8: други́й кано́н со ирмосо́м на 6. Ирмосы́ пое́м обою́ кано́нов по два́жды. Катава́сиа, ирмо́с пое́м пе́рваго кано́на, на схо́де. По 3-й пе́сни ипакои́, глас 5: Егда́ явле́нием Твои́м: по 6-й пе́сни конда́к пра́здника, и и́кос. На 9-й пе́сни Честнейшую: не пое́м, но пое́м припе́вы пра́здника, я́коже и на са́мый пра́здник. Свети́лен пра́здника еди́ножды. Сла́ва, и ны́не, то́йже. На хвали́тех стихи́ры пра́здника, на 4. Сла́ва, глас 6: Вода́ми Иорда́нскими: И ны́не, глас 2: Днесь Христо́с на Иорда́н: И славосло́вие вели́кое. По трисвято́м тропа́рь пра́здника. Ектении́, и отпу́ст. И обы́чное исхожде́ние в притво́р. И час 1-й Тропа́рь и конда́к пра́здника.