Святый Боже, Святый Крепкий, Святый Бессмертный, помилуй нас
Святый Боже, Святый Крепкий, Святый Бессмертный, помилуй нас
Святый Боже, Святый Крепкий, Святый Бессмертный, помилуй нас
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
О́тче на́ш, И́же еси́ на небесе́х! Да святи́тся и́мя Твое́, да прии́дет Ца́рствие Твое́ да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. Яко Твое есть Царство и сила и слава во веки. Аминь.
Богоро̀дице Дѐво, ра̀дуйся, Благода̀тная Марѝе, Госпо̀дь с Тобо̀ю.
Благословѐна Ты в жена̀х, и благословѐн Плод чрѐва Твоего̀, я̀ко Спа̀са родила̀ есѝ душ на̀ших.
Живы̀й в по̀мощи Вы̀шняго, в кро̀ве Бо̀га Небѐснаго водворѝтся.
Речѐт Го̀сподеви: Засту̀пник мой есѝ и Прибѐжище моѐ, Бог мой, и упова̀ю на Него̀.
Яко Той изба̀вит тя от сѐти ло̀вчи, и от словесѐ мятѐжна,
плещма ̀ Своѝма осенѝт тя, и под крилѐ Его надѐешися: ору̀жием обы̀дет тя ѝстина Его.
Не убоѝшися от стра̀ха нощна̀го, от стрелы̀ летя̀щия во дни,
от вѐщи во тме преходя̀щия, от сря̀ща, и бѐса полу̀деннаго.
Падѐт от страны̀ твоея̀ ты̀сяща, и тма одесну̀ю тебѐ,
к тебѐ же не приблѝжится, оба̀че очѝма твоѝма смо̀триши, и воздая̀ние грѐшников у̀зриши.
Яко Ты Го̀споди, упова̀ние моѐ, Вы̀шняго положѝл есѝ прибѐжище твоѐ.
Не приѝдет к тебѐ зло, и ра̀на не приблѝжится телесѝ твоему̀,
я̀ко Ангелом Своѝм заповѐсть о тебѐ, сохранѝти тя во всех путѐх твоѝх.
На рука̀х во̀змут тя, да не когда̀ преткнѐши о ка̀мень но̀гу твою̀, на а̀спида и василѝска насту̀пиши,
и поперѐши льва и змѝя.
Яко на Мя упова̀, и изба̀влю ѝ: покры̀ю ѝ, я̀ко позна̀ ѝмя Моѐ.
Воззовѐт ко Мне, и услы̀шу его: с ним есмь в ско̀рби, изму̀ его и просла̀влю его,
долгото̀ю дней испо̀лню его, и явлю̀ ему спасѐние Моѐ.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Огради мя, Господи, силою Честнаго и Животворящаго Твоего Креста, и сохрани мя от всякаго зла.
О Преславная Мати Христа Бога нашего, благих Подателя, милостию Своею всю вселенную сохрани, даруй нам, рабом Твоим (имена) премудрость и разум, светом Сына Твоего души наша просвети, едина Всепетая, от Херувим и Серафим славимая.
О преблаженне святителю Спиридоне! Умоли благосердие Человеколюбца Бога, да не осудит нас по беззакониям нашим, но да сотворит с нами по милости своей. Испроси нам, рабам Божиим (имена) у Христа и Бога наше мирное безмятежное житие, здравие душевное и телесное. Избави нас от всяких бед душевных и телесных, от всех томлений и диавольских наветов. Поминай нас у престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдная и мирныя и блаженства вечнаго в будущем веце сподобит нас, да непрестанно возсылаем славу и благодарение Отцу и Сыну и Духу Святому, ныне и присно, и во веки веков. Аминь.
О, всесвятый Николае, угодниче преизрядный Господень, теплый наш заступниче, и везде в скорбех скорый помощниче! Помози мне грешному и унылому в настоящем сем житии, умоли Господа Бога даровати ми оставление всех моих грехов, елико согреших от юности моея, во всем житии моем, делом, словом, помышлением и всеми моими чувствы; и во исходе души моея помози ми окаянному, умоли Господа Бога, всея твари Содетеля, избавити мя воздушных мытарств и вечного мучения: да всегда прославляю Отца и Сына и Святаго Духа, и твое милостивное предстательство, ныне и присно и во веки веков. Аминь.
О святый Михаиле Архангеле, помилуй нас, грешных, требующих твоего заступления, сохрани нас, раб Божьих (имена), от всех видимых и невидимых враг, паче же подкрепи от ужаса смертного и от смущения диавольскаго и сподоби нас непостыдно предстати Создателю нашему в час страшного и праведного Суда Его. О всесвятый, великий Михаиле Архистратиже! Не презри нас, грешных, молящихся тебе о помощи и заступлении твоем в веце сем и в будущем, но сподоби нас тамо купно с тобою славити Отца и Сына и Святаго Духа во веки веков.
Ангеле Божий, хранителю мой святый, на соблюдение мне от Бога с Небесе данный, прилежно молю тя: ты мя днесь просвети, и от всякаго зла сохрани, ко благому деянию настави, и на путь спасения направи. Аминь
Господи и Владыка живота моего, дух праздности, уныния, любоначалия и празднословия не даждь ми.
Дух же целомудрия, смиренномудрия, терпения и любве даруй ми, рабу Твоему.
Ей, Господи, Царю, даруй ми зрети моя прегрешения и не осуждати брата моего, яко благословен еси во веки веков. Аминь
Ве́рую во еди́наго Бо́га Отца́, Вседержи́теля, Творца́ не́бу и земли́, ви́димым же всем и неви́димым.
И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век; Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша.
Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы, и вочелове́чшася.
Распя́таго же за ны при Понти́йстем Пила́те, и страда́вша, и погребе́нна.
И воскре́сшаго в тре́тий день по Писа́нием.
И возше́дшаго на небеса́, и седя́ща одесну́ю Отца́.
И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́.
И в Ду́ха Свята́го, Го́спода, Животворя́щего, И́же от Отца́ исходя́щаго, И́же со Отце́м и Сы́ном спокланя́ема и ссла́вима, глаго́лавшаго проро́ки.
Во еди́ну Святу́ю, Собо́рную и Апо́стольскую Це́рковь.
Испове́дую еди́но креще́ние во оставле́ние грехо́в.
Ча́ю воскресе́ния ме́ртвых, и жи́зни бу́дущаго ве́ка. Ами́нь.