С.М. Люлякинадо ёвтнить тейтерензэ
1922-це иень медьковонь 29-це чистэ Люлякинтнэнь, Марконь ды Олёнань, кудосо чачсь тейтерька. Сон ульнесь семиясост колмоце эйкакшокс. Лемдизь Симакс, Серафимакс, конань мейле Эрзянь Масторонть келес кармить содамонзо моронь, стихень, ёвтамонь ды ёвксонь ладсицякс, лемдясызь эрзянь цёковокс.
Эряви меремс, тетянзо-аванзо туртов сон ульнесь аволь эрявикс эйкакшокс. Сеть шкатнестэ тейтерькатнень лемс мода эзть максне, секс сынь арсесть цёрадо.
Сисем иесэ уш аванок кильдизь велень тевтнес. Важодсь аволь ансяк кудоютксо, паксясояк. Вансь вишка ялаксонзо мельга. Ансяк эйкакшчись вешиль эсензэнть. Секс, кодак прыль чуро ютко шка, оргодиль ялганзо юткс налксеме. Кода мейле ёвтнекшнесь тенек, сехте вечкема налксемаст ульнесь «Паровоз». Ваднильть прясто пильгес содсо, кундсильть кедте-кедьс ды истя, «паровозокс» таргавозь, напустильть лавка ёнов, косо микшнильть тантейкат. Сехте икеле, васенцекс, свал ульнекшнесь сон, эряза пильге аванок. Лавкань азоронть мельс тукшнось «шайтян левкстнэнь» налксемаст, ды сон каванилинзе тантейкасо.
Школасо тонавтнесь эрьва кода. Сехте пек вечксь ловномо. Шкась тень туртов кадновсь ансяк чокшнеланга. Эциль каштлангс ды чеввалдосо (тетязо-авазо эзть мерне стяко пултамс штатолт, ванстасть эйсэст) ловныль. Лия «валдомтомапелекс» стака эйкакшпингесэнзэ ульнесь Анисия Ефимовна сырькаезэ, кона эрясь 105 иеть. Сон вадрясто содылизе эсь раськень кортамо шкинеманть, ладсесь сонськак, ды те сятконть сыремтизе вечкема нуцькинензэ седейскак.
Аванок прядсь весемезэ 5 класст. Покшоль мелезэ поладомс тонавтнеманзо, ансяк эрявсь важодемс, лездамс малавиксэнстэнь.
Иетне мольсть. Вишка тейтернесь кассь ёлганя, мазый, кувака черьпуло марто тейтерекс. Сась шка, ды вастызе вечкеманзояк — Сашань. Вастызе ды вечкизе весе седейсэ, кода цёраськак сонзэ. Ды тесэ зэрькстась войнась.
Сон малав сеске явинзе од ломантнень. Цёранть саизь войнав, аванок — окопонь чувомо. Стакасто важодемадонть, кельмсемадонть, вачопекень кирдемадонть пек ормалгадсь, ды ильтязель мекев кудов. Куломанть кенжестэ идизе Анися сырькаезэ, кона маштыль ормань пансеме. Макссть вийть Сашадо арсематнеяк. Сон ульнесь тензэ чоподасо валдо налнэнь кондямокс. Ансяк курок тетязо-авазо саизь кедьстэнзэ те налнэнтькак — максызь мирденень авечкема ломань экшс. Те ульнесь тетянок — Максим Щербаков, кона эрясь уличисэ: важодсь Нижне-Ягодное велесэ бухгалтерэкс. Войнав эзизь сае шумбрачинзэ кувалма: инвалидэль. Курок сынь тусть эрямо тетянок важодема таркав, Нижне-Ягодноев. Стявтсть кудо. Ансяк лад ютксост арасель. Аванок эзизе вечке тетянок. Тень кисэ сон пандсь тензэ лангсонзо нарьгамосо, чавноськак эйсэнзэ. Ялатеке курок аванок пекиясь. А тетянок… пекстызь. Сестэ ламонь озавтнесть чумовтомо, шкась истямоль. Ды тесэ, теке шержев телень куншкава лёмзёрксонь панжовкс, аванок эрямос таго совась Саша, конань ранявомадо мейле нолдакшнызь кудов пичксеме. Цёрась тердизе сонзэ эсензэ экшс, эсензэкс, келя, карми ловомо лиянь пельде эйкакшонтькак. Содазь, вечкемасо превть арасть, весемесь моли седейстэ. Вана аванок кармакшнось уш курмонзо-кармонзо пурнамо, тесэ шкадо икеле нолдызь пекстамо таркасто тетянок: сон ормалгадокшнось тифсэ. Аванок телеграммасо тердезель поездстэ вастомонзо. Истя эрямось сонсь ладизе весементь таркаванзо. Курок чачсь эйстэнек васенцесь, Толя. Аванок туртов сон кармась улеме эрямонь смустекс. Оймесэ сэредьксэнть лепштясь-потавтсь алашакс важодемасо. Ансяк уцяскась пургавтнесь сельместэнзэ од ды од сельведть.
Толянок туртов топодекшнесть вейксэ ковт, зярдо сон апак учо лоткась неемеде. Врачтнень ланга яксематне эзть лезда. Аванок эзь сода, мезть тейнемс. Кие-бути мерсь тензэ пшкадемс шабра велев, косо, келя, ули паро муниця. Кувать апак арсе, сон кильдсь лишме, саизе цёранзо ды, кадык ушосо кармакшнось уш сундерьгадомо, сыргась се велентень. Пелекилангсо, вирьга ютамсто, лишмесь апак учо тандадозь паркстась, лоткась, потазевсь удалов. Кинть трокс маднезельть верьгизт. Кода мейле ледстнесь аванок, тандадомадонть сон теке канксомокшнось. Ансяк, нать, Пазось кода сонзэ казизе эсензэ сяткосонть — морыцянь-ладсицянь талантсо-ёрокчисэ, кона ламо иеть карми кецневтеме эрзятнень, истя верьгизтнэнененьгак, улема, кучсь сестэ чарьксчи. Апак учо вень сэтьмечинть колызе Толянь ниреждемазо. Ве верьгизэсь, нать, покшост, стясь таркастонзо ды саинзе лиятнень эсензэ мельга виренть потс. Кись чамсь, ды вень чоподанть пачк аванок таго капшазевсь секе велентень. Ансяк якась стяко: тосонь муницясь ялаксонок туртов эзь лезда. Лездась веле-веле ланга та-кодамо лытыця ломань — странник, кона совсесь тенек удомо. Колмо чить петнявтнесь сон Толянок сельмес та-мень байгинеть ды кирдсь эйсэст тапарязь.
Ды ялаксонок таго кармась нееме.
Сон эрясь весемезэ 27 иеть. Кадсь эсензэ мельга урозокс тейтерька, минек седейтнес — а ютыця сэредькс. Чавовсь целинасо, толдо сюронь паксянь идемстэ. Куломадонзо мейле кото иень ютазь тусь эрямосто тетянокак.
Минь вечктяно ледстнеме телень кувака чокшнетнень, зярдо лампань толвалдосо аванок пурнылимизь перьканзо ды кармиль ёвксонь-мезень ёвтнеме. Веенсттнэнь ловнокшнынзе книгасто, омбонсттнэнь ладсилинзе сонсь. Нетнень минь вечкилинек сехте пек. Кудопотмось пешкедиль ки соды мень кашторксто. Лампась кайсиль кувака сулейть. Весе те тандавтниль ды теке шкане пештиль седеенть аёвтавикс ёжомарямосо. Минь истя вечкилинек ды истя учнилинек неть чокшнетнень!
1950-це иетнень прядовомсто — 1960-це иетнестэ колхозникень весе семиятненень максневсь кастомс якстерькай. Тень кис мейле пандсть ярмакт. Покш норовонь саемга якстерькаенть мельга эрявсь вадрясто якамс: чуролгавтомс, кочкомс, таргамс, ванськавтомс, ильтямс примамо таркав. Минек семиянтень савкшнось гектаршка. Якинек мельганзо мирём, покшнек-вишканек. Ды ялатеке аванок свал тукшныль паксяв васенцекс: жалясь эйсэнек… Важодемстэ бажась меленек кепедеме. Пеедькшнесь, шнась эйсэнек, серьгедиль моро, мельганзо максылинек вайгеленек миньгак, эйкакштне, ды те минек вадрясто лиснесь. А стяко шабратнеяк бажасть шаштнемс малазонок.
Велесэ аванок путсть мельс. Сеедьстэ тердтнилизь свадьбав. Сех пек вечкиль оршнемс цыганокс эли цыганавакс. Яксиль ялганзо марто кудодо-кудос, морсиль, киштиль, муниль ды, нама… салсильгак. Мертяно, саразт. Истяк мень цыганават?! Салазенть, нама, мейле свал велявтылизь. Ансяк васня саразтнэнь-мезтнень ёвкстылизь одтнэнень казнекс. Истямо ладсо свадьбанть велявтылизь алкуксонь спектаклякс.
Инечинтень аванок стыль тенек вейкеть палинеть ды артонь алонь ды тантейкинень туртов коцтонь кескавнеть. Те чистэнть минь марилинек прянок сехте мазыекс. Тетянок аштесь тень эйстэ веёно: сон партийноель. Минь жо а ёвтавияк кода учнинек те покшчинть: зярошка те кенярксось — молемс алонь пурнамо! Текенень, кисэнек ульнесь аванокак. Эрсесь натой истя: тетядонок салава сон нолдылимизь ушов вальмава.
Эйзюрковонь 8-це чистэ эли чачома чистэнзэ минь свал бажилинек кенярдовтомс аванок кодамояк казнесэ. Бути савиль пурнамс зярыя ярмашкеть, мезеяк рамилинек. Седе сеедьстэ тейнинек стенгазета, козонь сёрмалинек авадонок валморот, педявтнилинек открыткасто керсевть-артневть цецят. Мазылгавтомапелекс мольсть Од иень налкшкень штелькстнэяк. Ашолгадомаланга, зярдо аванок оштё удыль, понгавтылинек газетанть неявикс таркас.
Пек вечкилинек Од иенть. Эрьва иестэ эйстэнек киньгак тетянок саилизе мартонзо вирев куз мельга. Кильдилинек лишме ды туилинек. Васня токилинек вирьваныентень, ды мейле уш сонзэ марто кочкилинек куз. Истякак кенярксось валсо а ёвтавиль, тетянок седеяк кастылизе. Сон салавине ёртыль кузонть алов сахаронь тапаркске, кепедилизе ды мейле чокшнень перть кемевтиль эйсэнек кудосо: эсь сельмесэ, марят, неизе, кода кузонть алга чийсь кептерне марто нумоло, пупордясь ды кептернестэнзэ правтызе те тапаркскенть. Ды знярошка абунгадома ульнесь валсонзо — аволить кеме, ды кемезевилить. Лездась тенень «нумолонь» сахароськак: кудонсенть танстезэ малавгак а истямоль.
Секс минь а ёвтавияк кода учнинек Од иенть. Вирень кузонь чине, нумолонь пельде казне — тантей ёвкс, аволь ёжо. Валскестэнть — од кеняркс. Эль сыргозилинек, чиилинек кузонть алов. Содылинек: тосо эйстэнек эрьванть учи казне. Казнетнеде мелявксось ульнесь тетянок лангсо.
Вана истя минь касынек. Минь — те вана кить.
Толядо мейле чачсь Света. Аванок туртов савсь майсемс сонзэ мартояк. Вишкинестэ врачтне мусть эйстэнзэ пряудемень орма. Ие савсь ютавтомс тензэ Куйбышев (ней Самара) ошонь пичксема кудосо. Эрявсть ламо ярмакт. Миекшнинек скалонок.
Ансяк уцяскась теде мейлеяк эзь лотка аванок нардевчинзэ варчнемеде. Войнань шкане урозэйкакштнень ильтнесть эйдень кудов. Вейке истямо кудось кирвазсь, палсь. Эйстэнзэ эйкакштне орголесть кие ков. Ульнесь теле. Котошка иесэ ве тейтерькась эртевсь минек кудос. Вармань-даволонь пачк сон ютась комсь вайгельпеть. Мартонзо ульнесь кавто иесэ ялакскезэ, ансяк се эзь ванстово тензэ: кельмесь ды кулось килангсо. Тейтерькась пек берякшкель, вачодоль, кельмезель, чова оршамкасоль. Аванок кодак неизе, совавтызе седе курок кудос, эждизе, шлизе-нардызе, андызе ды тияк… кадызе. Тейтерьканть покш сельмензэ вансть лангозонзо истяшка кемема марто — ков паньсак?! Истя семиянок покшолгадсь оштё вейке ломаньс, кармась улеме Маша сазоронок.
Чачсь Тамара. Весе эйкакштнестэ сон сехте набоель, а пелицяль, видечинь кис аштицяль. Сеедьстэ лиянь чумонть сайниль эсензэ лангс. Тень кувалма понгонеськак тензэ весемеде пек. Уш педучилищасо тонавтнемстэ сеедьстэ сакшныль кудов ялганзо марто. Аванок каванилинзе мезезэ ульнесь. Сонензэ свал марявсь: лиятне эрить пельсвачодо. Куш эсенек эйсэ эзь кольневтне. А мейсэль, кадык тетянок важодськак оймсемань апак сода, сайнесь топавтомс мик лия бухгалтерэнь тевть. Ансяк пандсть аламо, минь жо ламолинек. Весть та-кода чумондыксэлинек тетянок, мекс сон, марят, нарьгсесь аванок лангсо. Ансяк аванок куроксто сусковтынзе келенек. Сон, нать, несь тетянок эйстэ сень, мезенть эзинек нее минь, эйкакштне. Аванок свал вешсь пельденек путомс тетянок мельс, мейсэяк ды зярдояк сонзэ а покорямс.
Тамарадо мейле кавто иень ютазь чачсь Зина. Сон ульнесь, кода мерить, кудоютксо аванок вить кедекс. Яксесь мартонзо тикшень ледеме, пенгес, сонсь пильсесь-лазнось эйсэст. Топавтсь цёраломанень лия тевтькак. Аванок, жалязь, бажась куш аламодо кардамс сонзэ тень эйстэ, ансяк Зина чарькодсь, сондензэ башка лездамс тензэ кудосо а кинень: покш эйкакштне тукшность, лиятне зярс вишкинельть.
1951-це иестэ чачсь Галя. Чачсь шкадо икеле, оймезэ, кода мерить, лыйнесь сурепесэ. Те секс, мекс аванок пекесэнзэ кандтнемстэнзэ прась кузтема лангсто: куземс тензэ ков-бути эрявсь, тевть… Ды таго — апак удо веть, майсемат, врач ланга чийнемат. Врачтне эзть лезда, таго лездась муниця. Те эрямосонть ули, нать, тарка тамашатнененьгак.
Галя кассь превей, ловномо вечкиця тейтерькакс. Сеедьстэ невтиль пря, прок теи урокт, сонсь тонавтнемапелензэ лангс путыль книга ды ловныль. Ансяк те аволь свал прядновиль вадрясто. Бути аванок редилизе манчеманзо, сеске муиль тензэ тев. Ды седе стакине. Галя прядсь медучилища.
Котоцекс ульнесь Володя. Окойники, оштё вейке учовикс цёра. Ансяк аволь кувать кецневтсь тетянзо-аванзо. Кавто иень ютазь кулось тевелявонь ормадо. Эрямонь ризкстнэ-сталмотне яла седе пек лепштясть аванок эйсэ, мендясть сонзэ алов. Тень лангс апак вано, оймезэ кадновсь чевтекс, валдокс, эзь казякадокшно.
Ды уш 1955-це иестэ аванок чачтызе веженсенть, Ленань. Кода мерить, очконардавксокс. Ды макссь тензэ весе кадовикс вечкеманзо, седейлембензэ. Лёка, кода мерсь сон меельце нармушкиненстэнь, пандсь тензэ текеньсэ. Сон вакскак эзь кадново аванзо эйстэ. Якась мельганзо пулопезэнзэ кундазь. Ков покшось — тов вишкинесь. Бульчом, Лёка вишкинестэ уш маштсь лездамояк. Вансь саразтнэнь мельга, ютавтнесь мартост «промкст», конатнесэ тердсь эйсэст седе вадрясто алыямо. Ды бути теде мейле муиль ал марто од пизэ, кенярксонстэнь а эрсиль пе, сон сатыль весень туртов. Тень кисэ весе оршамопелесь, кона ютниль сазорсто сазорс, сатныль сонензэ.
Вадря эрямо мельга пансемс сестэ эзь савкшно. Эзинек сода тантей ярсамкаткак. Ансяк солыль ловось, яксилинек эльденачко, умбрав, аниська, идем чурька ды ярсамокс маштовиця лия тикше мельга. Аванок сеедьстэ пидсесь пиципалаксонь ям, конань ашолгавтнесь ловсосо. Пек тантеельть пряканзо. Парсесь-преявтнесь дураккуярт ды сахаронь якстерькайть, мейле костнесь сынст каштлангсо. Эзь стувтово, кода вийсэ симдтнесь эйсэнек калойде. Ды истямоськак: ашти аванок каштомикеле, нежедизе прянзо ухватнедентень ды теке чувтомсь, паряк, арси, мезде течи минек андомс. Теде башка, эрявкшнынек оршамс, карсемс… Секскак сеедьстэ сон кекшиль цюланс ды салава авардиль… Лисиль тосто уш коське сельме марто ды одов кундыль эрьвачинь тевезэнзэ. Тень юткова таго секе-тев пеедькшниль, морсиль… Седеяк полавтовиль велеушова якамсто, вирьс совсемстэ, ков вечкиль сайнеменек. Весе чачозо прок валдомиль, кенярксось валозь валовиль ойместэнзэ. Ютылинек-теилинек — озылинек кодамояк эрькечиринес эли лисьмапря ваксс оймсеме, мездеяк сускомо. Аванок таго мезеяк ёвтниль тенек, вейсэ таргилинек моро… Те а стувтови.
А мейле… Мейле сась шка, зярдо тетянок-аванок допрок кадовсть кудозонок ськамост. Сыненст ней ансяк савкшнось кецязь вастнемс минек ды ризнэзь ильтнемс мекев килангов. Кизна вечкилинек пурнавкшномс вальмало килеенть алов, конань таго-зярдо озавтокшнызе сонсь аванок. Неть ульнесть тамашань чокшнеть. Ды истя арасель мель тукшномс кудосто! Ансяк мезеяк а теят: эрьвань эйстэнек ульнесь уш эсензэ семиязо. Тень лангс апак вано, кода эйкакшпингестэяк, свал бажинек аванок ёжос, конань седейсэ, содылинек, эрясь тенек, эсь эйдетненень, покштояк покш вечкема. Ды те вечкемась мартонок нейгак.
Туеманок, нама, нусмакавтокшнызе эрямонзо. Лия ёндо, макссь тензэ шка алтамс прянзо шкинемантень, мезентень свал бажась-правтсь. Сон сёрмадсь валморот, конатнес чамдсь потмонзо, ёжомарямонзо, мелензэ-арсеманзо. Сынь теевсть тензэ сехте малавикс ялгакс, седейоякс. Виде, пек виевекс сонзэ васенце валморотнень а ловсыть, тень кисэ сынь ванькст, пешксеть эрямодо, вечкемадо. Эйсэст ули се, мезентень мертяно ойме. Ды теньсэ сынь полонитькак, таргить эстест. Ловномстост редясак: кадык сёрмадыцяст ёрокчизэ аволь покштнестэ, талантозо ули. Сон машты натой ламоксть некшнезенть эйстэ асодавиксэнь редямо ды эсь ладсо ёвтамо. Мертяно, вейке валморосонть коське тикшень штемесь панжови икелеть цецянь кужокс. Каня те аволь поэтэнь невтевкс?!
Весть сон кучокшнынзе ладсевксэнзэ натой Московов. Нама, эзизь печата, кедьсёрмадовксонзо велявтызь мекев. Ансяк те эзизе лепштя аванок бажамонзо улемс марязекс. Сон назойстэ поладсь поэзиянь кияванть молеманзо.
Велень клубсо пурнась хор. Моротнень ды музыканть ладсесь сонсь. Ды аволь ансяк ладсесь, весе марто вейсэ морсеськак эйсэст. Эрзянь оршамопелензэяк стынзе ды мазылгавтынзе сонсь. Курок кулясь — Нижне-Ягоднойсэ эри сказительница — срадсь пек васолга, пачкодсь Саран ошовгак. Тосто кучозель Ягодноев телевидения. Аванок эйстэ снимазель фильма-очерк. Теде мейле тердезель Мордовияв сонськак. Кирдизе тетянок стакасто сэредемазо. Ансяк седе мейлеяк, кода сон кулось (те лиссь 1977-це иестэ), аванок а сеске полавтызе эрямо тарканзо, кавтолдсь. Тень теизе ансяк 1979-це иестэ.
Тесэ, Саранскойсэ, вастызе Иван Корнилович Инжеватовонь. Шкань ютазь сынь сюлмасызь эрямост вейс. Кода учёной-филолог ды эрзянь кель-валонь содыця ломань, Иван Корнилович лездась аванок туртов эрьва ёндо тонавтнемс тиринь литературань келенть, витнемс ды печатамс валморонзо, нолдтнемс сынст башка пусмосо. Нолдтнемс жо ульнесь мезе. Марковна, кода лемдизь аванок шкинемань вечкицянзо, сиземань апак сода сёрмадсь ёвкст, стихть, эйкакшонь морынеть. Мартост яксесь велева, школава, клубга, морсесь эйсэст радиова ды телевидениява. Эрьва косо сонзэ учость, вечксть. Сонгак пандсь тенст текеньсэ, ды сех пек — эйкакштненень, конатнень марто аноколь вастневемс апак лотксе. А уш сёрмат тенст зяро сёрмадсь — а лововитькак.
1982-це иестэ саезь вейке омбоце мельга лисить аванок валморонь, ёвтамонь ды ёвксонь пусмонзо. Шкинемадонзо кортыть, сёрмадыть, путыть мельс, макснить тензэ сехте покш питне. Сон лисни РСФСР-нь ды СССР-нь раськетнень шкинемань ванкшноматнесэ ды фестивальтнесэ изницякс, казеви СССР-нь культурань министерствань «Отличник культурного шефства на селе» тешкссэ (1986), Мордовской АССР-нь Государственной премиясо ды Мордовиянь комсомолонь премиясо (1992), яволявтови республикань культурань заслуженной роботникекс (1990). Эйстэнзэ кортыть кода Пазонть пельде шкинемань ломанде. Ды аволь ансяк ялганзо, конатнеде сонзэ ламольть (сех малавиксэкс жо ульнесть кавто — Саран ошсто Светлана Ламбина поэтессась ды Покш Игнатвелестэ Римма Жегалина тонавтыцясь, конатненень сон панжсь сехте салавань ёжонзо ды мелензэ-арсеманзо), весеяк, кить тейневсть содавиксэкс книганзо марто.
Эзинек стувтне сонзэ миньгак, эйкакшонзо. Сёрмалинек тензэ, гайневтнинек, сакшнынек инжекс. А бути мекскак кувать (кода сонензэ марявсь) тень а теилинек, тарка-эзем эстензэ а муиль. Аванок эрясь кисэнек свалшкань мелявкссо-пелемасо. Минь жо бажинек эсь мелявкстнэс сонзэ пек а совавтнемс, ванстынек эйсэнзэ. Ансяк авань седеенть а манясак. Сестэ сон свал мериль: «Таго партизантнэ мезе-бути сёпить».
Ды апак учо весе те потась васов удалов. 1992-це иень сундерьковсто весементь лепштизе аванок стака ормадо кулясь: рак. Кемемс тенень ашождаль. Ве арсемадонть — минь ёмавтсынек аванок — кирьгапарентень кевериль анилевикс ал, куш цийнек.
Елена марто Тамара сеске сыргасть Саранскоев. Поездсэ ардомсто Лена несь он: аваст чачома чизэ, сынь казить тензэ хрусталень кедьге, эйсэнзэ колмо якстере розат ды колмо пужозь ашо хризантемат — весемезэ кото. Кемемс ононтень арасель мель, вадряс кемемась седе виевель. Сонсь аванок, улема, эсь алкуксонь ормадонть эзь сода. Минь мадстевтинек операцияс, кона, меринек, эряви шумбрачинзэ витеманть кисэ. Сон эзь карма каршо молеме. Хирургось кемевтимизь: 99 процентт, келя, операциясь лезды. Ансяк врачтне аволь пазт. Операциядонть мейле омбоце чистэнть аванок кепететсь псизэ. Пекекедезэ кармась сыявтомо: перитонит. Виевстэ козомадонть керявксонь ставкстнэ явсть…
Мейле ульнесь омбоце операция, колмоце. Нилеценть теизе Саранск ошонь прявт хирургось сонсь, ансяк идемс аванок уш а кодаль. Хирургонть абунгавтокшнызе сонзэ нардевчизэ. Операционнойстэ лисемадо мейле сон мерсь: «Феникс».
Больницясо аванок аштесь кувать. Тень лангс апак вано, вестькак эзизе невтне майсеманзо, эзь пеняця, кодат покш сэредькст савкшны тензэ кандомс-цидярдомс. Лиясто озыль таркачирес, вишкине, кукорьгадозь, оланя сельмевановт марто, ды мезде-бути яла сэтьместэ арсиль. Мезде? Теде кияк эйстэнек эзь сода, сонсь тенек эзь ёвтне. Кодамо тошначинь давол сэвсь-костясь оймензэ?.. Сон, улема, сестэ чарькодсь уш: эрямс тензэ кадовсь а кувать. Сонсь меньгак превс путомат тенек эзь максне. Паряк, секс, мекс пельсь: минь чарькодтяно, сон соды эсь ормадонть.
Минь, эйкакштне, яксинек мельганзо чиполасо. Ульнинек вакссонзо чинек-венек. Сех стакаль тензэ веть. Сон тунь эзь удсе. Чить аштесь капельница ало. Лиясто нуваземиль, ансяк те эрсесь пек чуросто. Вейкесь эйсэнзэ мелявтовтсь: эсь сэредемасонть канды тенек майсемат. Ды тень кувалма свал марясь прянзо икеленек чумокс. Верепаз! Вечкемне аванок. Сон куломстояк мелявтсь минек эйстэ!
Кортыть, ков седе пек Пазось вечксы ломаненть, тов седе ламо кучи тензэ майсемат. Улема, Сон вечкилизе аванок.
Куломадонзо кавто чиде икеле сон мерсь тенек: «А ускиндерясамизь эсенек велев, куш бугорькске тееде тетянк калмонзо ваксс». Меельце валонзо ульнесть истят: «Мон киньгак а неян ды а марян». Кулось сон 1993-це иень якшамковонь 17-це чистэ.
Калминек аванок чачома модазонзо, Нижне-Ягодное велес, ней те Самарань областень «Садовод» совхоз. Энялдоманзо топавтынек. Калминек килейненть алов, конань тезэньгак таго-зярдо озавтокшнызе сонсь, тетянок ды Толя ялаксонок марто шабрацек. (Толя калмазь целинасо, ансяк минь ускинек калмонзо лангсто мода, ялганзо тейсть ды стявтсть тензэ ледстнемапель-памятник.)
Вана истя эзь карма улеме аванок, Серафима Марковна Люлякина эрзянь сказительницась, кона, видькстатано, течияк пек а сатны тенек…