Казимир, б.м. король Полский, великый князь Литовьскый и Руский, княжа Пруское, и Жомоитьскый, и иных, чиним знаменито сим нашим листом, кто на нь посмотрить, или тчучи услышить, ижь мы с князьми и с паны радою нашею великого князьства Литовьского и с всим поспольством согадавши, урядили есмо так:
1. Што с лицом приведуть татя, будеть ли мочи чим платити, ино заплатити истинну; пак ли чего у дому не будеть, а будеть ли то жона ведала з детми ужо изрослыми, ино жоною и детми заплатити, а самого на шибеницю; а што будуть малыи дети, ниже семи годов, тыи в том невинни.
2. А пак ли злодей не имети будеть чим платити, ино и лица у двор не имать, воротити истьцю, у кого украдено, и прокосы половину врънути; а злодеа на обшение, а просока по старому.
3. А в кого будет украдено, а што судьи присудять: ино прво заплатити истьцю, а потом осподарь татя того вину свою бери.
4. А коли выдадуть жону, а любо дети татиныи, а у колце судьи скажють, а потом возмогут ли ся выкупити, а любо осподарь их усхочет выкупити, и они могуть ся выкупити. А будет ли в дому статков татя того, и он домовыми статкы плати; оли бы не было чим платити из дому, ино жоною и детми платити, как у верху писано.
5. А коли бы злодей што у кого украл, а и где украдено, а там его ухватят с лицом, а он у дом не принесл, жона и дети того не поживали: злодей терпи, а жона и дети и дом их невинен.
6. А коли злодей из дому вышел, и украдеть што и потеряеть, а любо што изьесть, а кроме жоны и детей, ино домовыми статкы, што того татя влостное, заплатити; а жона и дети и статкы женьни от того порожни.
7. А коли чий человек у злодейство упадет, а будеть осподарь его тое ведал, а любо и с ним удел имел, а будет на то довод: и тот так терьпи, как который злодей.
8. А который будеть лежьни держати у своем дому тайно, а суседем околици не оповедаеть, а в том часу што у кого изгынеть, а будеть на то довод, ижь лежьни дрьжал; ино дати тому рок, и другий, и третий, иж бы того лежьня поставил, ли с себе извел; а пак ли на рок на последний не поставить заплати ж, а того ищи; а нашод к праву поставити: не дей исправляется, а то уже заплачено.
9. А коли бы наш человек вину дал князьскому или паньскому или боярьскому человеку, а в котором повете, под нашим наместничьством или тивуньством; ино нашему наместнику, а любо тиуну, обослати, ижьбы нашому человеку стало ся право: а пак ли усхочеть на обчий суд, ино их на обчий суд путить и рок дати.
10. А будуть ли на нашом человеце князьскыи или паньскыи или боярскыи люди чого искати; ино тому суд и право перед нашими наместьникы и тивуны, который от нас где што дрьжить; а нашим урядником дати право на обе стороне.
11. А которому человеку князьскому или паньскому или боярьскому до князьскых и до паньскых или до боярьскых людей дело; ино хто ищеть на ком, ехати ему искати правом пред осподарем его; а не уделаеть ли права, ино обчий суд, рок положив со обу сторон, а тогды уделати и справедливость. Пак ли будеть некоторый отводити, ино нам дати децького, а не пригодить ся нас в великом князьстве Литовском, ино воеводам нашим моцно дати децького.
12. А коли злодея выдадуть ис права, а чим его взвелять, казнити по его делом. А кому татя выдадуть, а тот не въсхочет его казнити, а усхочеть на нем заплату побрати, а его пустити, а любо его собе в неволю взяти, а на то будеть доводь: тот уже ис права выступаеть, и нам и с паны радою нашою великого князьства Литовьского о том погадав, как его казнити, а и сказнити его, чого будеть достоин. А над злодеем милости не надобе.
13. А кто украдеть выше полукопья, а любо корову, того узвесити.
14. А который впервое украдеть, а дотоль не крадывал: ино за первую татбу виною его казнити; аже будет ниже полтины, домовыи речи крал, домовыми речьми платити; а будеть выше полтины крал, хотя б пак первое украл, ино его обесити.
15. А который хотя первое украл, а коньская татба, коня украл, а с лицом приведуть, того увесити.
16. А коли татя приведуть, а на кого сок усочить, а домучатся татьбы, а будет перво того крадывал и кому плачивал, а околица то будет ведала, и без лица обесити.
17. А пак ли сок усочить на кого, а лица не будеть, а перво будеть украл, и околица будеть перво злодейства на него не ведала, а будет никому не плачивал, ино ему платити татьбу истьцю и вину; а смертьною раною его не казнити.
18. А коли тать дасться на муку, а зелие знаа, а знатникы будуть добрыи на него, сок усочить, а будеть первей того крадывал, а любо мучиван, а и сьведомо то будеть околици: ино того зелейника хотя не домучатся, ино то обесити.
19. А коли чии паробкы украдуть што у кого, а пак у сем листу верху писано, как за которую татбу казнити: коли первое украдеть, ино его не вешати, а заплатити бондою его; а не будеть бонды, ино осподарь его за него заплатит, а паробка сказнити и пробити; а коли иметь часто красти после того, а выше полукопья, ино паробка узвесити.
20. А тако ж кому будеть до того какое дело, будеть земное дело, ино ездокы побрати; а будуть иныи которыи дела, ино судьи побрати, а искати правом; а порубов и наездов не надобе никому же чинити.
21. А которыи бы сами собою порубы делали, а любо наезды чинили; ино кому сталася кривда, тот и маеть ся нам жаловати; а пак ли не пригодиться нас у великом князьстве Литовьском, и он не маеть паном раде нашей жаловати; и паном воеводам нашим по того послати и велети пред собою моцно поставити, а и досмотрети: будеть ли так чинил, а всадити его у казнь и держати до нашего щастного приеханиа, бо тот ис права земьского выступил и над право сягнул, как у верху писано. Мы пак, снемься с паны радою нашою великого князьства Литовьского, осмотрим того, каккою казнью того тказнити.
22. А коли бы два мели ся правовать, а возмуть собе ездокы и судьи: ино учинити им рок, а дати ведомо за чотыре недели, штобы ся оба два зготовили к тому року, перед тыи судьи; судьам же и ездоком там выехати на реченое местьцо. А который бы из дву тых сутяжаев не выехал, тот без суда виноват; а который выехал, того того оправити в том, чого будет искати: нижь коли придилася наша, а любо земьскаа служба, а любо болесть, тым того не истратить.
23. А коли бы кто коня, а либо клячу знашол блудящюю, или иныи которыи речи изнайдеть, ино оповедати околици: не изнайдет ли ся истець до трех дннев, ино повести на королевскый двор, по давному, да переем свой возми; а пак ли который што утаить, а въсхочеть собе покорыствовать, а будеть на то довод; тот такый злодей, как который.
24. А который будеть люди выводити, а любо челядь неволную, а ухватять с лицом: того на шибеницю; а изнайдеть ли ся сок, ино тому право: как у сем листу верху писано, по тому его судити.
25. А також, где которыи мосты мощивали за дядю нашего, за великого князя Витовта, а за великого князя Жикгимонта, тут бы и не каждый свои мостьници замостили и заделали, как надобе; а штобы не мешкали, сего ж лета уделали. А на чией делници щькода ся станеть, конь ся образить, ногу изломить: тому платити. А пак ли которыи не заделають своих делниць сего лета, а исплошаться: тот ис права выступил, на том нам вины десять рублев.
Про тож, как у сем нашом листу выписано, по тому бы есте рядили, а ис того не выступали.