Спаси, Господи, и помилуй рабов Твоих (имена) словами Божественнаго Евангелия, чтомыми о спасении рабов Твоих. Попали, Господи, терние всех наших согрешений, и да вселится в нас благодать Твоя, опаляющая, очищающая, освящающая всего человека во имя Отца и Сына и Святаго Духа. Аминь.
Го́споди, поми́луй (3).
И абие: От Луки свята́го Ева́нгелия чте́ние.
Сла́ва Тебе́, Го́споди, сла́ва Тебе́.
Во́нмем!
Евангелие от Луки, зачало 4 [7] :
1 ³⁹Во дни о́ны, воста́вши Мариа́м, во дни́ ты́я, и́де в го́рняя со тща́нием, во гра́д Иу́дов: ⁴⁰и вни́де в до́м заха́риин, и целова́ Елисаве́т. ⁴¹И бы́сть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха свя́та Елисаве́т, ⁴²и возопи́ гла́сом ве́лиим, и рече́: благослове́на ты́ в жена́х, и благослове́н пло́д чре́ва твоего́: ⁴³и отку́ду мне́ сие́, да при́дет Ма́ти Го́спода моего́ ко мне́? ⁴⁴се́ бо, я́ко бы́сть гла́с целова́ния твоего́ во у́шию мое́ю, взыгра́ся младе́нец ра́дощами во чре́ве мое́м. ⁴⁵И блаже́нна Ве́ровавшая, я́ко бу́дет соверше́ние глаго́ланным е́й от Го́спода. ⁴⁶И рече́ Мариа́м: вели́чит душа́ моя́ Го́спода, ⁴⁷и возра́довася Ду́х мо́й о Бо́зе Спа́се мое́м: ⁴⁸я́ко призре́ на смире́ние рабы́ своея́: се́ бо, отны́не ублажа́т мя́ вси́ ро́ди: ⁴⁹я́ко сотвори́ мне́ вели́чие си́льный, и свято и́мя его́…
⁵⁶Пребы́сть же Мариа́м с не́ю я́ко три́ ме́сяцы и возврати́ся в до́м сво́й.
Сла́ва Тебе́, Го́споди, сла́ва Тебе́.
Молитва по чтении Евангелия:
Господи, Иисусе Христе Боже мой, словесами Божественного Евангелия Твоего излей благодать Твою на сердца сих рабов Твоих (имена) ко истреблению страстей и грехов их, и даруй им силу ко исправлению во Имя Отца и Сына и Святого Духа. Аминь (†).
Сла́ва Отцу́ и Сы́ну и Свято́му Ду́ху.
Глас 6: О́тче, Сло́ве и Ду́ше, Тро́ице Свята́я, очи́сти мно́жества согреше́ний на́ших (†).
И ны́не и при́сно и во ве́ки веко́в. Ами́нь.
Глас то́йже: Моли́твами Богоро́дицы, Ми́лостиве, очи́сти мно́жества согреше́ний на́ших (†).
Стих: Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́ (†).
Стихи́ра Божией Матери, глас 6:
Держа́вная Всецари́це,/ враго́м христиа́нским воспяща́ющая/ и от ко́зней тех рабы́ Твоя́ избавля́ющая,/ не преста́й ускоря́ти на по́мощь и защище́ние/ Тебе́ с ве́рою призыва́ющим († и поклон).
По́се́м молитва сея́:
Спаси́, Бо́же, лю́ди Твоя́ и благослови́ достоя́ние Твое́, посети́ мир Тво́й ми́лостию и щедро́тами, возвы́си ро́г христиа́н правосла́вных и низпосли́ на ны́ ми́лости Твоя́ бога́тыя, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных Си́л безпло́тных, честна́го, сла́внаго проро́ка, Предте́чи и Крести́теля Иоа́нна, святы́х сла́вных и всехва́льных Апо́стол, и́же во святы́х оте́ц на́ших и вселе́нских вели́ких учи́телей и святи́телей, Васи́лия Вели́каго, Григо́рия Богосло́ва и Иоа́нна Златоу́стаго, и́же во святы́х отца́ на́шего Никола́я, архиепи́скопа Мирлики́йскаго, чудотво́рца, святы́х равноапо́стольных Мефо́диа и Кири́лла, учи́телей слове́нских, святы́х равноапо́стольных вели́каго кня́зя Влади́мира и вели́кия княги́ни О́льги, и́же во святы́х оте́ц на́ших всея́ Росси́и чудотво́рцев, Михаи́ла, Петра́, Алекси́я, Ио́ны, Фили́ппа и Ермоге́на, святы́х, сла́вных и добропобе́дных му́чеников, преподо́бных и богоно́сных оте́ц на́ших, святы́х и пра́ведных богооте́ц Иоаки́ма и А́нны, и все́х святы́х. Мо́лю Ти́ ся́, многоми́лостиве Го́споди, услы́ши мя, гре́шнаго, моля́щагося Тебе́, и поми́луй на́с. (Поклон)
Го́споди, поми́луй(12).
Услы́ши ны, Бо́же Спаси́телю наш, упова́ние всех конце́в зе́мли и су́щих в мо́ре дале́че: и мило́стив, мило́стив бу́ди, Влады́ко, о гресе́х на́ших и поми́луй ны. Мило́стив бо и Человеколю́бец, Бог еси́, и Тебе́ сла́ву возсыла́ем, Отцу́ и Сы́ну, и Самому́ Ду́ху, ны́не и при́сно и во ве́ки веко́в. Ами́нь (†).
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Трои́ческою пла́мень пе́щныя попра́ша, пою́ще:/ отце́в Бо́же, благослове́н еси́.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Вопло́щся от утро́бы Твоея́ Госпо́дь, госпо́дствуяй тва́рию,/ и Тебе́, Де́во, Госпожу́ показа́ ви́димым же всем и неви́димым,/ я́ко Ма́терь Свою́ прославля́я Тя.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Согреши́хом, Го́споди, но не отступи́хом от Тебе́/ и ино́го не ве́мы, ра́зве Тебе́,/ не преда́ждь нас до конца́ Ма́тере Твоея́ мольба́ми, отце́в Бо́же благослове́нный.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Гора́ Бо́жия осене́нная, Всечи́стая,/ покры́й су́щия в Горе́ се́нию Твои́х моли́тв/ и от се́ти ловя́щих изба́ви пою́щия:/ оте́ц на́ших Бо́же, благослове́н еси́.
Припе́в: Сла́ва Отцу́ и Сы́ну и Свято́му Ду́ху (†).
Непобеди́мая еси́ кре́пость, Госпоже́,/ и несокруши́мое огражде́ние с ве́рою призыва́ющих Тя:/ разруша́еши бо сове́ты вооружа́ющихся на сла́вящий Тебе́.
Припе́в: И ны́не и при́сно и во ве́ки веко́в. Ами́нь (†).
Уныва́ющим Отра́до, печа́льным Утеше́ние, заблужда́ющим Наста́внице,/ соблюди́ нас, Де́во, от вся́каго зла,/ чту́щих святы́й о́браз Твой.
Катава́сия: Не послужиша твари Богомудрии / паче Создавшаго, / но, огненное прещение мужески поправше, / радовахуся, поюще: / препетый отцев Господь и Бог, благословен еси.
Песнь 8
Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Преблагослове́нная Ма́ти Всеще́драго Бо́га,/ уще́дри ны, недосто́йный, дара́ми милосе́рдия Твоего́,/ да превозно́сим Тя во ве́ки.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Кре́пость и держа́ва бу́ди рабо́м Твои́м, Всецари́це,/ си́ла, ору́жие и меч, враги́ спасе́ния секу́щий,/ да сла́вим Тя во ве́ки.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Сия́ющая па́че А́нгел святы́нею,/ храни́ нас, Всенепоро́чная, от грехо́вных дея́ний, глаго́ланий и помышле́ний,/ да благословля́ем Тя во ве́ки.
Припе́в: Пресвята́я Госпоже́ Богоро́дице, услы́ши моли́тву ра́б Свои́х, моля́щих Ти́ ся́ и спаси́ нас (†).
Освяти́, Всесвята́я, благогове́йно лобыза́ющих святу́ю ико́ну Твою́/ и Твои́м ма́терним дерзнове́нием ми́лостива нам твори́ Сы́на Твоего́,/ да пое́м Его́ во ве́ки.
Припе́в: Благослови́м Отца́ и Сы́на и Свята́го Ду́ха, Го́спода (†).
Отра́до и Утеше́ние моля́щихся Тебе́,/ вре́менных и ве́чных лю́тых изба́ви ны, да хва́лим Тя/ и Сы́на Твоего́ превозно́сим во вся ве́ки.
Припе́в: И ны́не и при́сно и во ве́ки веко́в. Ами́нь (†).
Путь и Живо́т, Де́во, ро́ждшая,/ стопы́ на́ша напра́ви по словеси́ Бо́жию,/ да, живо́т ве́чный насле́довавше, пое́м Тя,/ Сы́на Твоего́ превознося́ще во вся ве́ки.
Та́же: Хва́лим, благослови́м, покланя́емся Го́сподеви, пою́ще и превознося́ще во вся ве́ки (†).
Катава́сия: Отроки благочестивыя в пещи / Рождество Богородичо спасло есть; / тогда убо образуемое, / ныне же действуемое, / вселенную всю воздвизает пети Тебе: / Господа пойте, дела, / и превозносите Его во вся веки.
Песнь 9
Припе́в: Велича́й, душе́ моя́, Де́ву Пречи́стую, Богоро́дицу, Ма́терь щедро́т,/ Отра́ду рабо́в Ея́ и Утеше́ние (†).
Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.
Припе́в: Велича́й, душе́ моя́, Де́ву Пречи́стую, Богоро́дицу, Ма́терь щедро́т,/ Отра́ду рабо́в Ея́ и Утеше́ние (†).
Весели́ся, Ватопе́де,/ неусы́пная бо Афо́на Назира́тельница/ я́же на Тя кова́рство вра́жие ма́нием Свои́м разруши́/ и изгна́нны сотвори́ разруше́ние Тебе́ угото́вавшия.
Припе́в: Велича́й, душе́ моя́, Де́ву Пречи́стую, Богоро́дицу, Ма́терь щедро́т,/ Отра́ду рабо́в Ея́ и Утеше́ние (†).
О, вели́каго дерзнове́ния Твоего́, Де́во, к Бо́гу и благоутро́бия к рабо́м Твои́м!/ Возвеща́ющи бо о вразе́х,/ уклони́ла еси́ лице́ Свое́ от руки́ Сы́на Твоего́,/ я́коже до ны́не зри́шися на ико́не Твое́й.
Припе́в: Велича́й, душе́ моя́, Де́ву Пречи́стую, Богоро́дицу, Ма́терь щедро́т,/ Отра́ду рабо́в Ея́ и Утеше́ние (†).
Пото́к све́тлости, отра́ды и утеше́ния неистощи́мый Ты еси́, Богора́дованная Ма́ти Све́та,/ тьму у́бо страсте́й прожени́ от нас,/ обстоя́щих све́тлое подо́бие лица́ Твоего́,/ и несвети́маго огня́ изба́ви.
Припе́в: Велича́й, душе́ моя́, Де́ву Пречи́стую, Богоро́дицу, Ма́терь щедро́т,/ Отра́ду рабо́в Ея́ и Утеше́ние (†).
Спасе́ние бу́ди при́сное, Госпоже́, от враг на́ших/ и из руки́ всех, ненави́дящих нас,/ и напра́ви но́ги на́ша на путь ми́рен/ милосе́рдия ра́ди ми́лости Сы́на Твоего́ и Бо́га на́шего, Преблагослове́нная.
Припе́в: Велича́й, душе́ моя́, Триипоста́снаго и Неразде́льнаго Божества́ Держа́ву [8] .
Влады́чествующая все́ми я́ко Всецаря́ Ма́терь,/ стране́ на́шей пода́ждь благоде́нствие, мир, спасе́ние/ и на сопоста́ты побе́ды и одоле́ние.
Припе́в: Велича́й, душе́ моя́, Честне́йшую го́рних во́инств, Де́ву Пречи́стую, Богоро́дицу [9] .
Моле́бное пе́ние от души́ принесо́х со стра́хом Тебе́, Де́во, ро́ждшей Христа́ Бо́га,/ Его́же моля́щи, благоприя́тна сотвори́ моле́ния на́ша,/ да Тя пе́сньми немо́лчными велича́ем.
Катава́сия: Всяк земнородный / да взыграется, Духом просвещаемь, / да торжествует же безплотных Умов естество, / почитающее священное торжество Богоматере, / и да вопиет: / радуйся, Всеблаженная, / Богородице, чистая Приснодево.
И стихиры сия:
Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей стене́ и предста́тельству (†).
При́зри благосе́рдием, всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь (†).
Го́споди, поми́луй (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Свети́лен:
Озаря́еми благода́тным све́том от ико́ны Твоея́, Влады́чице,/ благогове́йно зове́м Ти:/ ра́дуйся, светоза́рная луно́, в нощи́ греха́ су́щих путеводя́щая к све́ту покая́ния;/ ра́дуйся, Ма́ти Изба́вителя, избавля́ющая нас от напа́стей неча́емых./ Ра́дуйся, Отра́до и Утеше́ние душ на́ших (†).
Сла́ва Отцу́ и Сы́ну и Свято́му Ду́ху (†).
Па́ки то́йже: Озаря́еми благода́тным све́том от ико́ны Твоея́, Влады́чице,/ благогове́йно зове́м Ти:/ ра́дуйся, светоза́рная луно́, в нощи́ греха́ су́щих путеводя́щая к све́ту покая́ния;/ ра́дуйся, Ма́ти Изба́вителя, избавля́ющая нас от напа́стей неча́емых./ Ра́дуйся, Отра́до и Утеше́ние душ на́ших (†).
И ны́не и при́сно и во ве́ки веко́в. Ами́нь (†).
И па́ки то́йже: Озаря́еми благода́тным све́том от ико́ны Твоея́, Влады́чице,/ благогове́йно зове́м Ти:/ ра́дуйся, светоза́рная луно́, в нощи́ греха́ су́щих путеводя́щая к све́ту покая́ния;/ ра́дуйся, Ма́ти Изба́вителя, избавля́ющая нас от напа́стей неча́емых./ Ра́дуйся, Отра́до и Утеше́ние душ на́ших (†).
И абие похва́ла Пресвя́тей Богоро́дице [10] :
Досто́йно есть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего (†).
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
И стихи́ры самогласны, гла́с 2:
Сти́х: Вы́сшую небе́с и чи́стшую све́тлостей со́лнечных, изба́вльшую нас от кля́твы, Влады́чицу ми́ра пе́сньми почти́м.
Припе́в: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
Сти́х: От мно́гих мои́х грехо́в немощству́ет те́ло, немощству́ет и душа́ моя́ к Тебе́ прибега́ю, Благода́тней, наде́ждо ненаде́жных, Ты ми помози́.
Припе́в: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
Сти́х: Влады́чице и Ма́ти Изба́вителя, приими́ моле́ние недосто́йных раб Твои́х, да хода́тайствуеши к Ро́ждшемуся от Тебе; о, Влады́чице ми́ра, бу́ди Хода́таица!
Припе́в: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
Сти́х: Пое́м приле́жно Тебе́ песнь ны́не, всепе́той Богоро́дице, ра́достно: со Предте́чею и все́ми святы́ми моли́, Богоро́дице, е́же уще́дрити ны.
Припе́в: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
Сти́х: Вся А́нгелов во́инства, Предте́че Госпо́день, апо́столов двоенадеся́тице, святи́и вси с Богоро́дицею, сотвори́те моли́тву, во е́же спасти́ся нам.
Припе́в: Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем († и поклон).
И а́бие и́ны стихи́ры богоро́дице, глас 1:
Мона́шествующих и мирски́х сосло́вия,/ со благогове́нием и любо́вию/ Ма́терь Бо́га на́шего воспои́м,/ Херуви́м и Серафи́м преиму́щую,/ ми́ра Всеблагу́ю Влады́чицу,/ отра́ду рабо́в Ея́ и утеше́ние (†).
Сти́х: Слы́ши дщи и виждь, и приклони́ у́хо Твое́.
Дея́ния и мы́сли исправля́юще,/ благодаре́ние и моли́твы/ от чиста́ се́рдца Пречи́стей принесе́м,/ стра́нное соде́явшей в Ватопе́де чу́до/ во исправле́ние согреша́ющих,/ во отра́ду рабо́в Свои́х и утеше́ние (†).
Сти́х: Лицу́ Твоему́ помо́лятся бога́тии лю́дстии.
Афо́на Храни́тельница и стена́ необори́мая ве́рных/ разбо́йники, окружи́вшая оби́тель Ватопе́дскую,/ всемо́щным заступле́нием Свои́м/ су́етны и ничто́же успе́вшия показа́/ во отра́ду рабо́в Свои́х и утеше́ние (†).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
Гла́с 6: Несть челове́ка, и́же поживе́т/ и не согреши́т Тебе́, Безгре́шный Влады́ко,/ и, а́ще беззако́ния на́зриши[11], кто постои́т?/ Ка́ко убо избега́ли бы мы, гре́шнии,/ пра́веднаго гне́ва Твоего́,/ а́ще не бы умилостивля́ла Тя Ма́терь Твоя́,/ Ея́же моли́твами поми́луй рабы́ Твоя́.
Та́же:
Святы́й Бо́же, Святы́й Кре́пкий, Святы́й Безсме́ртный, поми́луй нас (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
(†) Пресвята́я Тро́ице, поми́луй нас; (†) Го́споди, очи́сти грехи́ на́ша; (†) Влады́ко, прости́ беззако́ния на́ша; (†) Святы́й, посети́ и исцели́ не́мощи на́ша, и́мене Твоего́ ра́ди. (Поклон малый)
Го́споди, поми́луй (3).
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь († и поклон).
(†) О́тче наш, И́же еси́ на небесе́х Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго. (Поклон малый)
Я́ко Твое́ есть Ца́рство и си́ла и сла́ва во веки. Аминь (†).
Та́же па́ки тропари́ и конда́ки
Тропа́рь, гла́с 4 (3): К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний./ Не отврати́ Твоя́ рабы́ тщи,// Тя бо и еди́ну наде́жду и́мамы (†).
Ин тропа́рь, гла́с 4 (3): Яко покро́в благода́тный и спаси́тельный / стяжа́хом честну́ю Твою́ ико́ну, Богоро́дице, / на сию́ у́бо со умиле́нием взира́юще, Тебе́ вопие́м: / Влады́чице, ниспосли́ нам отра́ду и утеше́ние, / на Тя бо упова́ние возлага́ем, гре́шнии и смире́ннии. / На Твое́ предста́тельство наде́емся, недосто́йнии. / Ускори́ нас изба́вити от бед и скорбе́й / и умоли́ Сы́на Твоего́, Христа́ Бо́га на́шего, // поми́ловати и спасти́ ду́ши на́ша (†).
Сла́ва Отцу́ и Сы́ну и Свято́му Ду́ху.
Конда́к, гла́с 8: Взбра́нной Воево́де победи́тельная,/ я́ко изба́вльшеся от злы́х,/ благода́рственная воспису́ем Ти, раби́ Твои́, Богоро́дице,/ но, я́ко иму́щая держа́ву непобеди́мую,/ от вся́ких нас бед свободи́, да зове́м Ти: // Ра́дуйся, Неве́сто Неневе́стная (†).
И ны́не и при́сно и во ве́ки веко́в. Ами́нь († и поклон).
Ин конда́к, гла́с 6: Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас, ве́рно зову́щих Ти;/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя (†).
Вместо ектении глаголи сице:
Поми́луй нас, Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це, гре́шнии прино́сим: поми́луй нас. (Поклон)
Господи, помилуй (3).
Помяни́, Го́споди Иису́се Христе́, Бо́же наш, ми́лости и щедро́ты Твоя́ от ве́ка су́щия, и́хже ра́ди и вочелове́чился еси́, и распя́тие и смерть, спасе́ния ра́ди пра́во в Тя ве́рующих, претерпе́ти изво́лил еси́; и воскре́с из ме́ртвых, возне́слся еси́ на Небеса́ и седи́ши одесну́ю Бо́га Отца́, и призира́еши на смире́нныя мольбы́ всем се́рдцем призыва́ющих Тя. Приклони́ у́хо Твое́, и услы́ши смире́нное моле́ние мене́, непотре́бнаго раба́ Твоего́, в воню́ благоуха́ния духо́внаго, Тебе́ за вся лю́ди Твоя́ принося́щаго. (Поклон)
Господи, помилуй (3).
И в пе́рвых помяни́ Це́рковь Твою́ Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разшири́, умно́жи, умири́, и непребори́му а́довыми враты́ во ве́ки сохрани́; раздира́ния Церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́, и в ничто́же си́лою Свята́го Твоего́ Ду́ха обрати. (Поклон)
Господи, помилуй (3).
Спаси́, Го́споди, и поми́луй богохрани́мую страну́ на́шу, вла́сти и во́инство ея́, огради́ ми́ром их, и глаго́ли ми́рная и блага́я в сердца́х их о Це́ркви Твое́й Святе́й, и о всех лю́дех Твои́х, да и мы в тишине́ их ти́хое и безмо́лвное житие́ поживе́м во правове́рии, и во вся́ком благоче́стии и чистоте́. (Поклон)
Господи, помилуй (3).
Спаси́, Го́споди, и поми́луй Вели́каго Господи́на и Отца́ на́шего Святе́йшего Патриа́рха Кири́лла, и святе́йшия вселе́нския патриа́рхи, преосвяще́нныя митрополи́ты, архиепи́скопы и епи́скопы правосла́вныя, иере́и же и диа́коны, и весь при́чет церко́вный, я́же поста́вил еси́ пасти́ слове́сное Твое́ ста́до, и моли́твами их поми́луй и спаси́ мя гре́шнаго. (Поклон)
Господи, помилуй (3).
Спаси́, Го́споди, и поми́луй отца́ на́шего (его́ са́н и и́мя) настоя́теля свята́го хра́ма (или́ святы́я оби́тели) во и́мя (назва́ние пра́здника или́ и́мя свята́го, во и́мя чего́ (или кого́) освяще́н главны́й престо́л хра́ма (или́ оби́тель), куда́ ча́ще всего́ хо́диши), бра́тию (и/или́ сестры́), тру́дников и прихожа́н хра́ма сего́ (или́ оби́тели се́я), и ве́сь приче́т церко́вный, и вся лю́ди Твоя́ (и покло́н).
Господи, помилуй (3).
Спаси́, Го́споди, и поми́луй отца́ моего́ духо́внаго (имя его), и святы́ми его́ моли́твами прости́ моя́ согреше́ния. (Поклон)
Господи, помилуй (3).
Спаси́, Го́споди, и поми́луй [ аще живы: роди́тели моя́ (имена их),] бра́тию и сестры́ (имена их), и сро́дники моя́ по пло́ти (имена их), и вся бли́жния ро́да моего́ (имена их), и дру́ги (имена их), и да́руй им ми́рная Твоя́ и преми́рная блага́я. (Поклон)
Господи, помилуй (3).
Спаси́, Го́споди, и поми́луй во святого́рских монастыре́х, и в росси́йских, и во ине́х ме́стех живу́щия и пребыва́ющия отцы́ и бра́тию, и сестры́ наша (а́ще зна́еши кого́, рцы их имена́), и моли́твами их поми́луй и мене́, гре́шнаго. (Поклон)
Господи, помилуй (3).
Спаси́, Го́споди, и поми́луй по мно́жеству щедро́т Твои́х вся священнои́ноки, и́ноки же и и́нокини, и вся в де́встве же и благогове́нии и по́стничестве живу́щия в монастыре́х, в пусты́нях, в пеще́рах, гора́х, столпе́х, затво́рех, разсе́линах ка́менных, острове́х же морски́х, и на вся́ком ме́сте влады́чествия Твоего́ правове́рно живу́щия, и благоче́стно служа́щия Ти, и моля́щияся Тебе́ (а́ще зна́еши кого́, рцы их имена́): облегчи́ им тяготу́, и уте́ши их скорбь, и к по́двигу о Тебе́ си́лу и кре́пость им пода́ждь, и моли́твами их да́руй ми оставле́ние грехо́в. (Поклон)
Господи, помилуй (3).
Спаси́, Го́споди, и поми́луй ста́рцы и ю́ныя, ни́щия и сироты́ и вдови́цы, и су́щия в боле́зни и в печа́лех, беда́х же и ско́рбех, обстоя́ниих и плене́ниих, темни́цах же и заточе́ниих, изря́днее же в гоне́ниих, Тебе́ ра́ди и ве́ры правосла́вныя, от язы́к безбо́жных, от отсту́пник и от еретико́в, су́щия рабы́ Твоя́ (а́ще зна́еши кого́, рцы их имена́), и помяни́ я́, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь. (Поклон)
Господи, помилуй (3).
Спаси́, Го́споди, и поми́луй благотворя́щия нам, ми́лующия и пита́ющия нас, да́вшия нам ми́лостыни, и запове́давшия нам недосто́йным моли́тися о них, и упокоева́ющия нас, и сотвори́ ми́лость Твою́ с ни́ми, да́руя им вся, я́же ко спасе́нию проше́ния, и ве́чных благ восприя́тие. (Поклон)
Господи, помилуй (3).
Спаси́, Го́споди, и поми́луй по́сланныя в слу́жбу, путеше́ствующия, отцы́ и бра́тию на́шу (а́ще зна́еши кого́, рцы их имена́), и вся правосла́вныя христиа́ны. (Поклон)
Господи, помилуй (3).
Спаси́, Го́споди, и поми́луй и́хже аз безу́мием мои́м соблазни́х, и от пути́ спаси́тельнаго отврати́х, к дело́м злым и неподо́бным приведо́х (а́ще зна́еши кого́, рцы их имена́); Боже́ственным Твои́м Про́мыслом к пути́ спасе́ния па́ки возврати́. (Поклон)
Господи, помилуй (3).
Спаси́, Го́споди, и поми́луй ненави́дящия и оби́дящия мя, и творя́щия ми напа́сти, и не оста́ви их поги́бнути мене́ ра́ди, гре́шнаго. (Поклон)
Господи, помилуй (3).
Отступи́вшия от правосла́вныя ве́ры и поги́бельными ересьми́ ослепле́нныя (а́ще зна́еши кого́, рцы их имена́), све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти. Правове́рие же утверди́, и воздви́гни рог христиа́нский, и низпосли́ на нас ми́лости Твоя́ бога́тыя. (Поклон)
Господи, помилуй (3).
Небе́сный Царю́, ве́ру утверди́, язы́ки укроти́, мир умири́, святы́й храм сей [ или дом сей, или хра́мину сию́, или святу́ю оби́тель сию́] до́бре сохрани́: пре́жде отше́дшыя отцы́ и бра́тию на́шу в селе́ниих пра́ведных учини́, и нас в покая́нии и испове́дании приими́, я́ко Благи́й и Человеколю́бец. Ами́нь. (†)
Запе́в: Пресвята́я Богоро́дице, спаси́ нас!
МОЛИТВЫКО ПРЕСВЯТОЙ ВЛАДЫЧИЦЕ НАШЕЙ БОГОРОДИЦЕ И ПРИСНОДЕВЕ МАРИИ[12]
1.
О Пресвята́я Влады́чице Госпоже́ Де́во Богоро́дице, Неве́сто нетле́нная, Ма́ти благослове́нная, све́тлая на́ша отра́до, вожделе́нное утеше́ние!
Приими́ ны́не дерзнове́нное и неотсту́пное моле́ние сие́, от гре́шных усте́н и недосто́йных ду́ш Тебе́ приноси́мое пред святы́м и светоза́рным Твои́м о́бразом.
Пощади́ ны́, ми́лостивая и милосе́рдная и щедролюби́вая на́ша Засту́пнице, и не преда́ждь на́с суду́ и гне́ву Сы́на Твоего́ и Спа́са на́шего, Го́спода Иису́са Христа́, Ему́же без конца́ согреши́хом и пови́нни есмы́ осужде́нию и пра́ведному Его́ изрече́нию, да нака́жемся по грехо́м на́шим, превозше́дшим вся́кую ме́ру Его́ долготерпе́ния.
Прини́кни с высо́т Твои́х го́рних, иде́же А́нгели тре́петно сла́вят Тя́, и воззри́ на на́шу до́льнюю нищету́: ка́ко обнища́хом ве́рою, ка́ко бе́дствуем наде́ждою и оскуде́хом любо́вию, ка́ко умо́м омрачи́хомся, се́рдцем же и чу́вством ожесточи́хомся. Уврачу́й на́с моли́твою Твое́ю, Де́во целе́бнице. Возста́ви ны́, па́дшия ду́хом, укрепи́ разсла́бленныя умо́м, возбуди́ уны́лыя и отча́янныя, исцели́ боля́щия душе́ю и те́лом.
При́зри на гра́д на́ш и пощади́ его́ (или́ ве́сь сию́ (или́ оби́тель сию́) и пощади́ ю), Бо́жий отводя́щи Твои́м предста́тельством гне́в. Укроти́ го́рдостная стремле́ния люде́й и богоотсту́пная и́х шата́ния. Возве́й ти́хое дыха́ние благода́ти Твоея́ на смяте́нныя ду́ши и сокруше́нная сердца́.
Сохрани́ супру́жеством чистоту́, матери́нству че́сть, де́вству благослове́ние. Низпосли́ под кро́в жили́щ на́ших освяща́ющий лу́ч боже́ственнаго све́та, да облича́тся дея́ния неподо́бная и устыдя́тся ре́чи ху́льныя, и укротя́тся мы́сли зло́бныя.
О миролюби́вая, бла́гостнейшая и тиша́йшая Де́во Ма́ти, о паде́ниих на́ших скорбя́щая, о спасе́нии на́шем воздыха́ющая! Утоли́ церко́вныя бу́ри, умири́ раско́лы и распаде́ния, собери́ расточе́нныя, обрати́ отпа́дшия и все́х приведи́ в едине́ние Святы́я Це́ркве, да единоду́шно и единому́дренно сла́вится на земли́, я́коже и на небеси́, еди́ное святе́йшее и спаси́тельное и́мя Единосу́щныя Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.
2.
Наде́жда всем конце́м земли́, Пречи́стая Де́во Богоро́дице, Утеше́ние и Отра́до на́ше! Не гнуша́йся нас гре́шных, на Твою́ бо ми́лость упова́ем. Угаси́ пла́мень грехо́вный и покая́нием ороси́ изсо́хшие сердца́ на́ша. Очи́сти ум наш от грехо́вных помышле́ний. Приими́ моле́ния от души́ и се́рдца с воздыха́нием Тебе́ приноси́мыя. Бу́ди Хода́таице о нас к Сы́ну Твоему́ и Бо́гу и отврати́ гнев Его́ от нас Ма́терними моли́твами. Укрепи́ в нас ве́ру правосла́вную, вложи́ в нас дух стра́ха Бо́жия, дух смире́ния, терпе́ния и любви́. Душе́вныя и теле́сныя я́звы исцели́, утиши́ бу́рю злых нападе́ний вра́жеских. Отыми́ бре́мя грехо́в на́ших и не оста́ви нас до конца́ поги́бнути. Пода́ждь нам ми́лость Твою́ и свято́е благослове́ние Свое́ всем зде предстоя́щим и моля́щимся и всегда́ пребыва́й с на́ми, подава́я приходя́щим к Тебе́ отра́ду и утеше́ние, по́мощь и заступле́ние, да сла́вим и велича́ем Тя вси до после́дняго на́шего воздыха́ния. Ами́нь.
3.
О Пресвята́я Де́во, Ма́ти Го́спода, Цари́це Небесе́ и земли́! Вонми́ многоболе́зненному воздыха́нию души́ на́шея, при́зри с высоты́ святы́я Твоея́ на нас, с ве́рою и любо́вию поклоня́ющихся Пречи́стому о́бразу Твоему́. Се бо грехми́ погружа́емии и скорбьми́ обурева́емии, взира́я на Твой о́браз, я́ко живе́й Ти су́щей с на́ми, прино́сим смире́нная моле́ния на́ша. Не и́мамы бо ни ины́я по́мощи, ни ина́го предста́тельства, ни утеше́ния, то́кмо Тебе́, о Ма́ти всех скорбя́щих и обремене́нных! Помози́ нам не́мощным, утоли́ скорбь на́шу, наста́ви на путь пра́вый нас заблужда́ющих, уврачу́й и спаси́ безнаде́жных, да́руй нам про́чее вре́мя живота́ на́шего в ми́ре и тишине́ проводи́ти, пода́ждь христиа́нскую кончи́ну, и на стра́шном суде́ Сы́на Твоего́ яви́ся нам Милосе́рдая Засту́пница, да всегда́ пое́м, велича́ем и сла́вим Тя, я́ко благу́ю Засту́пницу ро́да христиа́нскаго, со все́ми угоди́вшими Бо́гу. Ами́нь.
4.
Молитва молебная ко Пресвятей Богородице, Павла монаха обители Евергетиды, сиречь, Благодетельницы
Нескве́рная, Небла́зная, Нетле́нная, Пречи́стая, Чи́стая Де́во, Богоневе́сто Влады́чице, я́же Бо́га Сло́ва челове́ком пресла́вным Твои́м Рождество́м соедини́вшая, и отри́нувшееся естество́ ро́да на́шего небе́сным совоку́пльшая: я́же ненаде́жных еди́на Наде́жда, и бори́мых по́моще, гото́вое заступле́ние к Тебе́ притека́ющих, и всех христиа́н прибе́жище. Не гнуша́йся мене́ гре́шнаго, скве́рнаго, скве́рными по́мыслы, и словесы́, и дея́ньми всего́ себе́ непотре́бна сотво́рша, и ра́зумом ле́ности сласте́й жития́ раба́ бы́вша; но я́ко человеколюби́ваго Бо́га Ма́ти, человеколю́бне умилосе́рдися о мне гре́шнем и блу́днем, и приими́ мое́, е́же от скве́рных усте́н приноси́мое Тебе́ моле́ние, и Твоего́ Сы́на, и на́шего Влады́ку и Го́спода, ма́тернее Твое́ дерзнове́ние употребля́ющи, моли́, да отве́рзет и мне человеколю́бныя утро́бы Своея́ бла́гости, и презре́в моя́ безчи́сленная прегреше́ния, обрати́т мя к покая́нию, и Свои́х за́поведей де́лателя иску́сна яви́т мя. И предста́ни мне при́сно, я́ко ми́лостивая, и милосе́рдая, и благолюби́вая, в настоя́щем у́бо житии́ те́плая Предста́тельнице и Помо́щнице, сопроти́вных наше́ствия отгоня́ющи, и ко спасе́нию наставля́ющи мя: и во вре́мя исхо́да моего́ окая́нную мою́ ду́шу соблюда́ющи, и те́мныя зра́ки лука́вых бесо́в да