На сугубой ектении:
Не хотяй смерти грешных, но еже обратитися и живым им быти, пощади и помилуй рабов Твоих [раба Твоего, рабу Твою] имярек, прежде даже не умрети им безгодно лютою смертию от губительнаго зелия, сиречь наркотиков [или крепкаго виннаго пития], вразуми их, да уразумеют, яко сие от диавола есть, иже, яко лев рыкая, ищет кого погубити. Но предвари, Господи, и спаси их, яко связани суть страстию: помози им востати на путь благочестия во спасение, молим Ти ся, Всемилосердый Господи, услыши и помилуй.
Лик: Господи помилуй, трижды.
Призри, Господи, милостивно на рабов Твоих [раба Твоего, рабу Твою] имярек, прельщенных лестию чрева и плотскаго веселия: даруй им познати сладость воздержания в посте, и проистекающих от него плодов, молим Ти ся, услыши и помилуй.
Еще молимся Тебе, Господу Богу нашему, о еже услышати глас молитвы нашея, и пощадити и помиловати рабов Твоих [раба Твоего, рабу Твою] имярек, простити им всякое прегрешение вольное и невольное, показати на них великую Твою милость, избавити их от всякия зависимости и насилия диавольскаго, и помиловати их.
Ангельскима рукама, верховнаго ученика, Господи, из темницы божественною силою иногда изведый, избави рабов Твоих [раба Твоего, рабу Твою] имярек, люто страждущих от недуга винопития [или: наркомании], молим Ти ся, услыши и помилуй.
Возглaс: Услыши ны Боже Спасителю нaш, уповaние всех концев земли, и сyщих в мори далeче, и милоcтив, милоcтив бyди, Владыко, о гресех нaших, и помилуй ны: милоcтив бо и человеколюбец Бог еси, и Тебе слaву возсылaем, Отцу, и Сыну, и Святому Духу, ныне и присно, и во веки веков.
Лик: Аминь.
Молитва 1:
Владыко Господи, сотворивый человека по образу Твоему и по подобию, избави создание Твое от работы вражия, отверзи его очи мысленная, сопрязи животу его ангела светла, избавляюща его от всякаго навета сопротиволежащаго. Услыши прибегающих к Тебе в скорби и печали, одержимых пагубною страстию пиянства [или: наркомании]. Не отврати от призывающих Тя лице Твое, даждь им крепость, надежду, веру, мужество, произволение, дар рассуждения, и приведи их ко спасительному воздержанию. Попали, Господи, терние всех согрешений их, вольных и невольных, и да вселится в них благодать Твоя, просвещающая, опаляющая и очищающая всего человека. Исцели их от тяжкаго недуга пиянства [или наркомании], свободи от мрачнаго духа нетрезвенности, упрямства и нераскаянности, утверди их, слабых, даруй им, немощным, крепость и силу благую, посли им здравие душевное и телесное, направи их на путь трудолюбия и жизни в Тебе, Боже. Услыши, милостивый Господи, вопли родителей их и сродников, приими молитвы нас, плачущих, о чадех и ближних наших. Твое бо есть еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.
|
|
Лик: Аминь.
Молитва 2:
Господи, Боже наш, к Тебе припадаем и смиренно молим Тя: призри на землю русскую, отведи губительный бич, поражающий наипаче невинных юношей и дев, к смертоносному зелию, сиречь наркотиком, страсть имущих, инии же вред себе творят, вину много внимающе. Праведно Ты, Господи, навел еси наказание сие на землю русскую, за отступление от веры и за беззакония, но ныне прибегаем к Тебе с покаянием и просим: премени Твой праведный гнев на милость, и избави страны наша от сего губительнаго поветрия. Возбрани, Господи, безсердечным людем, иже корысти ради разносят сие смертоносное зелие, ни совести имуще, ниже страха Божия, ни разумеюще, кую участь ближнему и себе уготовляют. Вразуми их, да уразумеют, яко Ты еси Господь Бог,
|
|
праведный Судия, воздаяй коемуждо по делом его, да отступят от сего безрассуднаго делания, и станут на путь честнаго трудолюбия. Призри, Господи, на рабов Твоих [раба Твоего, рабу Твою] имярек, иже неверия ради, легкомыслия и небрежения, ставшия жертвою пагубнаго зелия, сиречь наркотиков [или: тяжкаго пиянства], яко не мощи им своею волею престати, порабощения ради. Помози им, Господи, противостати сим страстем, укрепи их волю и благое помышление, да свободившеся от рабскаго недуга, познают милость Твою, и прославят Тя, и станут на путь спасения.
Лик: Аминь.
Отпуст:
Христос, истинный Бог наш, молитвами Пречистыя Своея Матере, святых славных и всехвальных апостол, иже во святых отца нашего Иоанна, архиепископа Шанхайскаго и Сан-Францисскаго чудотворца, святаго мученика Вонифатия, святых и праведных богоотец Иоакима и Анны, и всех святых, помилует и спасет нас, яко благ и человеколюбец.
Лик: Аминь.
Сей чин одобрен и утвержден Архиерейским Синодом Русской Православной Церкви заграницей (сентябрь 2007 г.) и выпущен издательством «Русский пастырь» (Сан-Франциско) по благословению Высокопреосвященнейшего МИТРОПОЛИТА ЛАВРА († 2007), Первоиерарха Русской Зарубежной Церкви.