З.Ризванов
“И дуьньяда пехил рикIер АвачиртIа, вуч хъсан тир”. Пеленгдин хам алай сикIер ХьаначиртIа, вуч хъсан тир.
Эх жедани Гъуцарин кар, Нез гудани къацарив твар? Цуьквер амаз цацари бар, ГаначиртIа вуч хъсан тир.
Вердишбуру тапарар цаз, Рахшандарив кар кьазва заз, Ихьтин цIукай зун ялав кьаз, КаначиртIа вуч хъсан тир.
Руквад кьунвай рикIин пурчар, Чуьхуьн патал бес жеч чарчар, ЧIехи селди ктIай кIанчIар, ГъаначиртIа вуч хъсан тир.
“Чан-чан” лугьуз ийиз кьасар, КIур гузва хьи, хьана хузар, Эгь, дидейри ихьтин ксар, ХаначиртIа вуч хъсан тир.
15.04.1997
УЬМУЬР ГАРУВ ВУГУЗВАТIА...
КIан хьуналди, са чIавузни ЧIур акъатдач къумадай.
РикIе мурад ава лугьуз, Вар акъатдан кумадай?
Элкъведани жув-жувалди РикIиз такIан кар ийиз? Лагь гьи устIар алахъайд я, Кутардикай квар ийиз?
Гьикьван дамах авуртIани, Вечрекай къвед жедайд туш. Хвалай гьуьлуьз гадарналди, Хъипрекай гъед жедайд туш.
Къилихдикай пай жедайд туш, Акьулдикай садакьа.
Кьегьалвилел, итимвилел Таз жедай туш къадагъа.
Уьмуьр гарув вугузватIа, Тамагь кудна саракай,
Вегь туьтуьниз тIарам мукIватI, Куда на жув таракай.
20.04.1997
КУЬЛУЬ-КУЬЛУЬ
Куьлуь-куьлуь гафар аку, Куьлуь-куьлуь итимрин. Куьлуь-куьлуь крар аку, Куьлуь-куьлуь итимрин.
ТIимилди хьиз таб харада, Акьван кьуна таб храда, Регъуь хьана таб цIрада, Куьлуь-куьлуь итимрин.
Гьар ялайди пар яз акваз, Гьар тукIурди кьар яз акваз, Шегьре рекьер дар яз акваз, Куьлуь-куьлуь итимриз.
КьантIадизни фил лугьуда, Мух акурла сил лугьуда, Чепедиз хупI чил лугьуда, Куьлуь-куьлуь итимри.
Ихьтинбуруз дуьньяда Са къуз акьул къведатIа? Яраб ислягь жедатIа, Куьлуь-куьлуь итимар?
16.06.1997
ХЬАНВА
Фу хуьрерай, яд вацIарай, Вад цуькверай, къад цацарай,
Кьиф къугъвазва мад кьацIара, Крар маса крар хьанва.
Гафари хупI къачуна къал, Къакъатнава къе зарни1 кал2, Къакъажнава чи кIвал, чи сал, Карар маса карар хьанва.
Гьахъуни вил авунва мичI, Дуьньяд навар аквазва гичI, И гурарай жезвач эвичI, КIарар маса кIарар хьанва.
ГьикI рам ийин дуьньяд сирер, Кьуд пад уьлен, кьуд пад вирер, ЧIун гуз ава къе чи хирер, Карар маса карар хьанва.
Къекъверагар гъапаривди, Лам, супаяр япаривди, Девран гана лапагривди, Кьарар маса кьарар хьанва.
25.09.1997
 |
1 Зар - шиир
2 Кал - рифма
ХВАНАХВА
Са хванахва чида заз - Лезги чIал ван хьайила, Жеда пурчара гьатиз, Гзаф яргъариз катиз.
Са хванахва чида заз -
Са лезги акур чIавуз,
ЧIал течирд хьиз лал жеда, ТIакIвада ам, ял жеда.
Са хванахва чида заз - Лезги тежен патал лап, Бади жеда, кур жеда, Са хапIадин тIур жеда.
Са хванахва чида заз - ЧидачиртIа хъсан тир. Чи чили ихьтин бегьер, ГъаначиртIа хъсан тир.
КЬАТIУЗВА
И дуьньядин чIехи-гъвечIи тIалари, И дуьньядин агъзур жуьре чIалари, И дуьньядин кьилел алай къалари, Йифиз-юкъуз гатазва зун, гатазва.
Гьар куьчеда, гьар магьледа тIурфанар, Къай акатна, къайи хьанва хизанар.
Аси хьанва, пехъи хьанва инсанар, Гьавиляй рикI атIузва зи, атIузва.
Къизилдикай таж хьайитIа ви кьилел, Тахт чкIида, кхьенватIа ви пеле.
Са югъ къведа, тухуда зун а пелел, Пуч я дуьнья, кьатIузва за, кьатIузва.
АГАКЬА ЗАВ
Вужар хьана, вужар чакай? Жагъизмач хьи, жуван чка. Цаварин лекь акваз тIакIа, Кьарай квахьна, карих я зун.
Зи фу хьанва къе яванди, Элкъвемир зал, я жуванди, Юзурда вун зи шуванди, Пакад йикъан тарих я зун.
Са диге кьве чIук жедани? Гьикьван эхда, икI жедани? Лезгидикай лукI жедани?
Гагь цIивин я, гагь руьхъ я зун.
Ялзамач вил иервили, Чуькьуьзва зун къе дарвили, Агакьа зав, зи Шарвили, Кьегьалвилик къарих я зун...
07.02.1997
РЕГЪУЬЗВА
Са береда чи хуьре Эрекь хъвадай сад авай. Негьнай а кас вирида, Лагьанай адаз “явад”.
Ам галачиз ийидай Элди вичин мел-мехъер. Такурай чи вилериз, -
Лугьудай, - ихьтин пехъер.
Садбуру лугьуз жедай:
- Ам итим туш, лезги туш. Тамузни кьисмет тахьуй Муг тийижир ихьтин къуш.
Гила тек са кас ава Хъван тийидай, чи хуьре. Мецик эрекь галукьдач, Вердиш хьанва и жуьре.
“Гьуьрмет” авач а касдиз, Ксар авай межлисра.
Ам аквадай вил авач, КIандатIа на силиса.
Гила адаз чи хуьре
“Ам итим туш” лугьузва. Кьуд пад хъвадай ксар яз, А лезгидиз регъуьзва.
17.08.1999
ЧУЬНУЬХГУМБАТI
Зи шиирдин цIарар авай, Са шаирдин чIалара.
Са кIус кьванни регъуьзвачир, Адаз аквар гьаларай.
Ухшар тир ам чарадан пек АлукIнавай аялдиз.
Ихьтин чуьнуьхгумбатI жедайд Къведайни гьич хиялдиз?
Зи манидин аваз авай Са манидин гьавада. АлакьдатIа ша и хаха На гурарай авуда.
РикI алазди тарифзавай Вичин «цIийи манидин». На лугьуди, зурба кас тир, Дережаяр виниди.
Зи кьисайрив рахазвай сад, Зи фикиррал илигна.
Адан тапан мецикай
ГьикI кудда хьи, куьлег на?
ЧуьнуьхгумбатI ксарикай, Эй зарияр, туьквена!
Къакъуднавай эсерривди АцIанва чи туьквенар.
«ВикIегьбуру» кьил хуьзва икI, Акатайди къакъудиз.
Гьахъ гвайбурун тIар жезва рикI, Хажалатар агудиз.
 |
ВУЧ ИЙИДАЙ?
Гьар инсандин рикIин къене, Са гъуьлягъди муг ийида.
Гьар гъуьлягъдин сиве вучиз Са агъудин сас жагъида?
ЧIав атайла юза жеда
А гъуьлягъдин агъудин сас. Мукай къецихъ акъатда ам, Сас акIурдай са бенде кIанз.
Гъил къахчудач, садан чанда Агъудин кIир акIидалди.
Хъел элекьдач гьич сакIани, Ягъай бенде рекьидалди.
Гьар инсандин рикIин къене Са гъуьлягъди муг ийида.
Пара тиртIа а гъуьлягъар, Инсанри, дуст, вуч ийидай?
06.04.1995
ЛУКIАРИН БАЗАРДА